روضتني عشقا ج٢ نورهان العشري
وضع يده فوق يدها بحب، مظهرًا تأييده لما قالته.
☼بـ-ـقـ-❥ـلـ-ـم نـ-❥-ـورهـ-❥ـان مـ-ـحـ-❥-ـسـ-ـن☼
مساءً فى منزل باسم
خرجت إبريل من الغرفة، وقلبها ينبض بشدة، محاولة تهدئة أنفاسها التي تسابقها، حينما توجهت إلى الصالة، رأت باسم جالسًا على الأريكة، حاسوبه مفتوح على قدميه، وعينيه مسمرتين على الشاشة في تركيز عميق، بينما الهدوء يغلف المكان حوله.
أطبقت شفتيها بتفكير، ثم اقتربت منه بخطوات بطيئة، فابتسم عند شعوره بها،
رفع حاجبيه وهو يضع الحاسوب جانبًا، ونظر إليها بنظرة شبه ساخرة لا تخلو من الشوق، وهتف بصوته العميق المميز : اخيرا بندقتي ظهرت .. كنتي جوا كل دا بتعملي ايه؟!!
هزت ابريل كتفيها، وردت بعدم اكتراث تخفى وراءه توترها : ولا حاجة.. كنت براجع شوية حاجات في الشغل .. وهدخل احضرلنا العشا..
جذبها باسم نحوه فجأة قبل أن تخطو بعيدًا عنه، وأجلسها على قدميه، بينما هى تمسكت بكتفه لا إراديًا، ثم سألها بفضول : مش هتقوليلي الموضوع اللي عاوزة تكلمني فيه؟!
بحثت في عقلها عن إجابة تفتح بها ما ترغب في قوله، بينما كان هو يتابع بشغف حركة شفتيها المرتجفتين وهى تتحدث بتلعثم : انا… انا كنت .. كنت هقولك اني صرفت نظر عن نزولي موقع المشروع الجديد من نفسي .. زي ما كنت عاوز
إبتسم لها بخفة، وهو يقرص وجنتها بمشاكسة : حلو انك اخيرا اقتنعتي اني يهمني صحتك قبل كل حاجة
أمسكت بأصابعه قبل أن تكمل بجدية ممزوجة بإضطراب عفوى : انا متأكدة من كدا يا باسم معنديش شك والله .. بس في حد تاني هو بصراحة اللي خلاني اقتنع
رفع باسم حاجبيه بدهشة، وسأل بصوت مستنكر : حد!! يطلع مين دا؟
تسللت إجابتها الخجولة بين شفتيها، وعينيها تلاحقان تعابيره بتركيز : الدكتور… اصله قالي .. الحركة لازم تكون بحساب الشهور الجاية .. عشان احافظ علي الجنين
زوى بين حاجبيه بملامح جامدة، قبل أن يسألها بتمهل : انتي حامل..؟
_اه
غادرت الكلمة شفتيها لتُسكن داخل قلبه، فصاح بحماس : وساكتة من الصبح؟!
تعبثت بياقة قميصه، وهى تضحك بخجل : كنت بستجمع شجاعتي
غمرها بين ذراعيه بشغف جنونى، همس في أذنها بأنفاس ملتهبة : بحبك يا ابريل .. اقسم بالله انا بعشقك
حذرته إبريل بضحكة رقيقة : براحة براحة يا باسم
ابتعد عنها قليلاً، وهو يداعب شعرها بأصابعه، تسمرت عينيه عليها للحظة باهتمام، قبل أن يتكلم بنبرة متحمسة : تاه عن بالي والله من فرحتي بحلاوة الخبر .. مش متخيلة فرحان قد ايه عشان هبقي اب وهجيب منك انتي نونو يا اوزعة
