روضتني عشقا ج٢ نورهان العشري
كلماته لم تهدئ نيرانها الحانقة ، بل اشتعلت في صدرها غضب مكبوت ، تراقص على حافة الانفجار ، قبل أن تجد كلماتها طريقها إلى الرد : مافيش جروح اتقفلت من الاساس يا صلاح .. كل اللي وصلنالو دا عشان مقدرتش تقول زمان انك بتحبني .. فضلت عليا وسام لانها بنت عمك وورثها كله هيبقي تحت ايدك لما تتجوزها
ابتلعت غصة خانقة ، وأضافت ، والدموع متجمعة في عينيها ، تأبى الانهمار : عشان الفلوس سيبتني اتجوزه .. لا انت رحمتني ولا اهلي اللي ماصدقوا لاقو عريس مفهوش غلطة جاي لبنتهم وماتقدرتش ترفضه..
توقفت لثوانٍ لتلتقط أنفاسها ، وتوهجت عيناها بحدة كسكينين يخترقان أعماقه ، ثم استأنفت بصوت منخفض يحمل قهرًا تراكم في قلبها سنوات : ماصعبتش عليك وانا عايشة معاه بجسمي وعقلي وقلبي مافيهمش حد غيرك؟
انسابت دموعها ببطء مع إستكمالها الحديث بألم يلتهم روحها : ولا حتي لما سافر مأمورية في الجيش واستشهد .. وانا عشت ذنبه طول عمري عشان مات وهو مقهور لما عارف ان قلب مراته ملك لأخوه .. وبرده عشان الفلوس انت أجلت ان الكل يعرفوا اننا هنتجوز .. وبعديها بأسبوعين كنت واخدني عند المحامي واتجوزنا عرفي
صرخت فجأة بجنون ، فاندلع توتره حتى وصل إلى قمته المشتعلة كبركان : ازاي بعد دا كله طايق تعيش؟ مابتحسش بخنقة من كتر القرف اللي عملنا!! دوسنا علي كل حاجة شرع ودين وقانون عشان ايه في الاخر؟ عشان ايه؟ عشت معاك عمري كله في الضلمة بتيجي تشوفني وانت متكهرب زي الحرامية؟!! عمرك ماحسيت بإبنك اللي اتربي يتيم في حضنك .. والاخر مطلع نفسك الضحية وانا الخاينة
لم يتحمل صلاح أكثر ، فانهار صبره ورفع كفه ليهوي بصفعة قاسية على وجهها ، جعلتها ترتد إلى الخلف وتسقط على الأريكة ، بينما اشتعلت عيناه بنيران الغضب ، وخرج صوته كنصل قاطع بصرامة : اخرسي!! سيبتك تخرفي علي مزاجك عشان تستريحي .. بس احنا مش صغيرين علي الجنان دا .. اهدي وفوقي لنفسك
وضعت يدها المرتجفة على خدها المحترق بالألم ، ورفعت عينيها المثقلتين بالدموع نحوه بإصرار خنقه العبرات : مفيش وقت كنت فايقة فيه قد اللحظة دي .. استكفيت من حبك الملعون وانا راضية بكل حاجة معاك .. كفاية مابقاش عندي طاقة اتحمل بيها تاني .. طلقني .. طلقني يا صلاح…
رددت كلماتها بتصميم حاسم جعل أعصابه تهتز ، فحاول أن يخفي اضطرابه خلف نبرته الباردة ، قبل أن يتركها ويرحل : انتي باين عليكي أعصابك فلتت منك علي الاخر .. هسيبك تراجعي نفسك وماشي قبل ما أفقد أعصابي معاكي أكتر من كده
