سبيل صهيب ج٢ لبنى دراز
الكلام نزل على قلب صهيب زي الصاعقة، قرب منه بسرعة، حضنه وكأنه بيحاول يحميه من الفكرة نفسها: بتقول كدا ليه يا جدي؟ إحنا محتاجينك معانا.
عمران شال إيده بصعوبة وساندها على كتف صهيب، وهو بيكمل بتعب: العمر ما بقاش فيه يا ابني، وانت الكبير، انت اللي هتكمل بعد مني، وتمسك زمام العيلة، ما تخليش الدنيا تفلت من بين إيديك، عايزك تاخد بالك من اليتيمة دي مالهاش غيرنا، ما تسمحش لأبوها ومراته أنهم يدمروها، أنا كنت واقف لهم بكل قوتي، بس دلوقتي…. سكت شوية، وأخد نفسه بصعوبة، وكمل بصوت كله رجاء: في أي لحظة ممكن أروح، عايز أمشي وأنا عارف إنك هتحميها، عايز أسيبكم وانا مطمن عليها يا صهيب.
صهيب مسك إيد جده بكل قوته، دموعه بتهـ*ـدد إنها تنزل، وبيرد بصوت مهزوز: بعد الشر عنك يا حبيبي، إن شاء الله هتخف وترجع لنا بالسلامة، وهتشوفها وهي بتكبر قصاد عينيك، وانت اللي هتجوزها بنفسك للراجل اللي يحميها ويصونها.
“عودة للوقت الحالي”
فاق صهيب من شروده، عينيه مليانة بدموع الندم، قلبه مضغوط بين ألم الذكريات ووجعه اللي بيقـ*ـطع فيه من جواه، فجأة وقف يرمي كل حاجة ع المكتب وهو بيصرخ بكل قوته، صرخة كانت زي الطلقة، هزت أركان المكتب وسكنت الجدران:
آاااااااااااااااااااااااااااااااااه.
مسك راسه بإيديه وهو بيهزها زي اللي بيحاول يهرب من كل حاجة، لكن صوت جده كان لسه بيرن في ودانه، بص للأرض وعينه على الفراغ: سامحني يا جدي، ما قدرتش أحافظ على أمانتك، ضيعتها من بين إيديا، سااااااااامحني، سامحني، ما طلعتش زي ما كنت بتتمنى، حطيت ثقتك في الشخص الغلط، وده اللي خلاك تسافر وانت تعبان عشان تدور عليها بنفسك، وسبتني فـ حيرتي وندمي… وقف فجأة يمسح دموعه بعصبية وهو بيتكلم بصوت مكسور لكن كله إصرار: بس انا مش هسكت، هقلب الدنيا عليها لحد ما ألاقيها وارجعها، وأرجع كرامتها وأرجع ثقتك من تاني فيا، وأوعدك، أنى احافظ عليها هتبقى بنتي وأختي ومش هسمح لعمي يقرب منها تاني، ولا أي حد يأذيها، مهما كلفني الأمر، حتى لو كانت حياتي هى التمن.
الكلام خرج منه زي الـNـار حـ*ـرق قلبه قبل ما يسيب شفايفه، قعد مكانه تاني بتعب وهو عارف إن جواه حر*ب مش هتنتهي غير لما يلاقي سبيل ويعوضها عن كل حاجة، مهما كان التمن، قرر بعدها يخرج يروح المطار يسأل بنفسه ويعرف هى راحت فين لكن ظنه خاب لما وصل وعرف انها ما خرجتش برة مصر خالص، وقف مكانه مصدوم مش عارف يفكر، ومش عارف يعمل ايه ولا يدور عليها فين.
