سبيل صهيب ج٢ لبنى دراز
يمنى بصت لهم بملامح كلها غيظ ونبرة نرفزة طفولية: يعني انتوا الاتنين بتضحكوا عليا ومش تقولولي، عااااااااااا، انا زعلانة منكوا… وقامت وقفت بعد ما شالت طرف السماعة من ودنها وهى بتدبدب برجلها فـ الارض: انا مش هكلمكوا تاني بس ها.
عمران ضحك بعلو صوته ع يمنى وع تصرفها الطفولي: هههههههههههه، خلاص ما تزعليش المرة الجاية مش هخبي عليكي حاجة، بس تعالي فـ حضن جدو حبيبك عشان نطمن ع صهيل.
يمنى ملامحها كلها غيظ طفولي، ربعت ايديها ولفت بضهرها وهى بتدب فـ الأرض: لأ انا مقموصة.
عمران بص لـ شاشة الفون وهو بيضحك: خلاص يا بيلا خليها مقموصة براحتها، وطمنيني انا ع حبيب جده صهيل عامل ايه؟
سبيل حطت ايدها ع بطنها واتنهدت بوجع رغم ابتسامتها اللي مالية وشها: صهيل بيسلم ع جدو وبيقول له ما تقلقش انا كويس ومامي واخدة بالها من نفسها عشاني.
يمنى قربت من عمران ونظرات عينيها كلها فضول، بصت له شوية ونقلت نظرها لـ سبيل شوية، وبرفعة حاجب: ومين صهيل ده كمان؟
سبيل ضحكت ع شكل يمنى وشاورت لها تحط السماعة.
يمنى قعدت جنب عمران وهى مقموصة ومبوزة وحطت طرف السماعة وبنبرة غيظ: مين بقى سي صهيل ده؟
عمران ميّل عليها وهو مبتسم وعينه ع سبيل: ده يبقى ابن اختك، بس ده سر يا يويو ماحدش يعرفه غير انا وشهاب وتيتة، وانتي دلوقتي.
يمنى مثلت انها ما تعرفش حاجة وبصت لـ سبيل كأنها مذهولة: أبنك!! جبتيه منين؟
عمران حس من رد فعلها انها كانت عارفة وبنبرة مكر لـ سبيل: شكلنا هنقدم قريب فـ معهد التمثيل لأحدهم، بس انصحه يتدرب كويس لانه ممثل فاشل.
يمنى فهمت ان جدها كشفها وبغيظ مصطنع: واحدة بواحدة يا سي جدو، انت عارف حاجة ومخبي عليا وانا كمان كنت عارفة حاجة ومخبية، بس ها.
عمران بسعادة: وماله يا حبيبتى، المهم تفضلي مخبية كدا ع طول مش عايزين حد تاني يعرف حاجة دلوقتي خالص، ماشي يا نور عيني؟
يمنى قربت منه باسته من خده وبصت لـ سبيل: ما تخافش يا جدو السر فـ بير…. وهى بتتكلم شافت باب اوضتها اتفتح فجأة ودخلت منه نرمين، اتوترت وصوتها ارتعش: مامي!! خخخير في حاجة؟
نرمين دخلت مرة واحدة فجأة وعينها ع يمنى وما انتبهتش لـ عمران اللى قاعد جنبها، وبملامح كلها غيظ ونبرة مليانة غضب: بتكلمي مين فـ الوقت ده يا بنت؟
عمران عينه احمرت من شدة غضبه وبنبرة صوته العالية كأنها زئير اسد غضبان: نررميييييين، ايه ما فيش زوق خاااااالص، داخلة تهجمي زى المخبرين كدا من غير ما تستأذني؟!
