سبيل صهيب ج٢ لبنى دراز
______________________
فـ قصر الشهاوي.
اوضة صهيب.
بعد يوم طويل فـ الشركة، رجع صهيب القصر متأخر شوية عن معاده المعتاد، باين عليه التعب والعصبية، وبدل ما يعدي يسلم ع جدته وأمه زي كل يوم، طلع أوضته ع طول، أول ما دخل، شاف سها بتتكلم فـ الموبايل، وسمعها بتقول
سها ضهرها لباب الأوضة، وما أخدتش بالها من وجود صهيب: خلاص يا حبيبي، ولا تزعل نفسك، هاجي واقضي معاك اليوم كله، بس كدا… أنا ليا مين يعني غيرك يا قلبي؟
صهيب وقف مكانه Nـاره قايدة وغيرته بتغـ*ـلي: سهاااا!.
سها قفلت الفون بهدوء وقربت منه بابتسامة وهدوء، وهي بتلف دراعها حوالين رقبته: حمد الله ع السلامة يا حبيبي. اتأخرت أوي النهاردة، قلقتني عليك.
صهيب بنبرة كلها عصبية وغيرة: كنتي بتكلمي مين؟
سها وهي بترجع خطوة ورا: مالك يا صهيب؟! في إيه؟
صهيب بصوت أعلى: سهااا…. ما ترديش السؤال بسؤال! كنتي بتكلمي مييين؟!
سها بتحاول تمسك أعصابها لكن ما قدرتش تتحكم فـ نبرة صوتها واتكلمت بنرفزة: هكون بكلم مين يعني يا باشمهندس؟! أكيد بابا طبعًا، إنت عارف إنه عايش لوحده من بعد جوازنا، وكنت بصالحه عشان زعلان مني لأني مش بروح له من بدري.
صهيب خد نفس طويل وحاول يهدي نفسه، قرب منها وقعد جنبها ضمها في حضنه، وبأسف: آسف يا حبيبتي غصب عني اتعصبت عليكي، معلش سامحيني، أعصابي تعبانة شوية.
سها بعدت عنه والدموع في عينيها: لأ، أنا زعلانة منك، معقول تشك فيا؟ وتتعصب عليا بالشكل ده؟
صهيب بصوت هادي وبتنهيد: حقك عليا يا قلبي، انتي عارفة أنا بحبك قد إيه وبغير عليكي حتى من نسمة الهوا لما تلمس خدك.
سها وهي بتمسح دموعها بدلع: لأ، أنا زعلانة.
صهيب وهو بيحاول يراضيها: طب قوليلي إيه اللي يرضي القمر عشان يحن عليا؟
سها بتهز كتافها بدلع: لأ، مش هتصالح.
صهيب بابتسامة صغيرة: وعشان خاطر بيبو حبيبك؟
سها ابتسمت بدلع: غير لي العربية وأنا أتصالح، وده عشان خاطرك بس.
صهيب باندهاش: هو مش أنا يا حبيبتي لسة الشهر اللي فات مغيرلك العربية؟
سها بثقة وغرور: وإيه المشكلة لما تغيرها الشهر ده كمان؟ هو أنا أقل من مين يعني؟! دي توتو صاحبتي جوزها كل أسبوع يغيرلها عربيتها، إشمعنى أنا؟!
صهيب رفع حاجبه باستغراب وضحكة صغيرة: مش وسعت منك دي يا حبيبتي شوية! ومع ذلك… حاضر يا روحي، هغيرهالك، بس كدا انتي تؤمري أمر.
