سبيل صهيب ج٢ لبنى دراز
هاني كان بيشرب عصير واول ما سمع كلام شاهي، وقف العصير فـ زوره وشِرِق وكح كتير لغاية ما قدر ياخد نفسه.
رسلان بملامح مستغربة: واه، مالك يا هاني؟! خبر ايه عاد؟!
هاني بياخد نفسه بصعوبة وبنبرة توتر: مافيش حاجة ما تقلقش…. قطع كلامه فجأة وهو شايف صهيب بيقرب منهم.
ابتسمت شاهندة اول ما شافت اخوها وبنبرة هادية: ابن حلال، لسة كنا فـ سيرتك.
قرب منها صهيب وباس جبينها وبابتسامة صافية: ويا ترى قردتي جايبة سيرتي ليه؟!
شاهندة ضيقت بين عينيها وبنبرة غيظ مصطنع: هو انت مش ملاحظ ان في ناس قاعدة معانا يا بشمهندس؟!
صهيب قرب منها اكتر ومال بجسمه عليها: انا كام مرة قولتلك انتى اختي حبيبتى ولو قاعدة بين ملايين البشر هتكلم واحب فيكي براحتي يا قردتي، ها عندك اعتراض!!
شاهندة بتهز راسها وهى سعيدة: تؤتؤ، هو انا اطول القمر ده كله يغازلني قصاد الناس.
سها بملامح كلها غيظ ونبرة غيرة: يا سلام يا سي صهيب يعنى بتسلم ع شاهي وتغازلها ومراتك حبيبتك لأ، انا كدا زعلانة منك.
صهيب اتعدل فـ وقفته وقرب منها باسها فـ خدها وبحب واضح جدا فـ نظرة عينه ونبرة صوته: وانا اقدر برضو يا روحي، هو انا اصلا جاى النادي عشان مين؟! مش عشانك انتي يا حبيبتي!
سها بهزار: خلاص عفونا عنك، اقعد بقى لما نعرفك ع استاذ رسلان قريب هاني.
صهيب مد ايده سلم ع رسلان واتعرف عليه، وهو بيقعد بص لـ شاهندة: قوليلى بقى كنتي جايبة سيرتي ليه يا شقية؟
شاهندة: بصراحة يا هيبو يا حبيبى استاذ رسلان عنده مشكلة وقولتله انك ممكن تحلهاله، بس كدا.
صهيب ابتسم لها وهز راسه بالموافقة وبص لـ رسلان بنظرة جدية: تحت امرك، احكيلي ايه المشكلة وان شاء الله تتحل.
شاهندة بملامح مبتسمة ونبرة متسرعة لـ رسلان: قول له اسم اختك ومامتها يا استاذ رسلان وهو هيقدر يلاقيهملك.
صهيب بملامح كلها استغراب وعدم فهم: ممكن افهم ايه الحكاية طيب الاول!!
رسلان ابتدى يحكي الموضوع من اوله بكل تفاصيله للأخر، وملامحه كانت كلها غيظ وغضب ووجع ونبرة صوته مليانة حزن: بس هى دي كل الحكاية وبصراحة انسة شاهندة جالتلى انك تجدر تساعدني الاجي اختي.
صهيب اتأثر جدا بكلام رسلان وشرد فـ سبيل للحظة وافتكر انه هو كمان بيدور عليها ومش عارف يلاقيها وبنبرة همس من غير وعي: ياريتني اقدر الاقيها.
