سبيل صهيب ج٢ لبنى دراز
شاهندة بملامح مضطربة ونبرة توتر: امري لله، اتفضلوا.
ورجعوا بالفعل يقعدوا سوا ع ترابيزة لوحدهم هما التلاتة.
شافهم رسلان وقرب منهم بهدوء وجه كلامه لـ هاني وهو عينه ع شاهندة: بجى إكده يا هاني؟! تسيبني واجف كيف الغريج وتچري.
هاني باعتذار: معلش يا رسلان غصب عني، كنت لازم الحق حبيبتى قبل ما تمشي زعلانة مني… وبص لـ شاهي بضحك وهو بيكمل كلامه: مع اني مش عارف سبب زعلها، بس أخاف ع نفسي يا عم احسن تروح تقول لأخوها يعقلني.
شاهندة برفعة حاجب وتنهيدة غضب: هو حد قالك ان اخويا همجي يا هاني؟
هاني: يا حبيبتى مالك واخداها قفش كدا؟! انا بهزر.
سها بهدوء: خلاص يا جماعة، اكبروا شوية وبلاش حركات العيال دي، اقعدوا خلينا نتفاهم.
رسلان بص لـ شاهندة بإعجاب حاول يداريه: خلاص يا أنسة شاهندة أجعدي وجولي طلباتك ولو هاني ما نفذهاش ارفعلك عليه جضية واسحلهولك فـ محكمة الأسرة.
هاني بضحك: جرا ايه يا عمونا انت جاى تعمل شغل ع قفانا ولا ايه؟ خليك محضر خير يا ابن خالي الله يهديك ويكعبلك فـ اللى بتدور عليه.
سها: مش تعرفنا يا هاني!!
هاني: اه سوري يا مدام سها نسيت اعرفك…. وهو بيشاور ع ابن خاله: رسلان ابن خالي محامي.. ولـ رسلان وهو بيشاور عليها: مدام سها الشهاوي مرات صهيب اخو شاهي
رسلان بابتسامة: تشرفنا يا هانم.
سها بابتسامة من غير ما تتكلم هزت راسها ترحب بيه.
هاني: طيب مش هنقعد ولا هنفضل واقفين كدا؟
سها: هنقعد طبعا يا هاني ونصالحكم كمان ع بعض.
وفعلا قعدوا الاربعة وابتدوا يتكلموا فـ كل حاجة باستثناء سبب الزعل بين هاني وشاهندة، والغريب فـ الموضوع ان شاهندة اندمجت مع رسلان ونسيت خالص خطيبها ومرات أخوها اللى قاعدين مش فاهمين حاجة وفجأة سمعوا.
شاهندة بابتسامة صافية ونبرة صوت هادية: وحضرتك بقى نقلت مكتبك هنا عشان مافيش قضايا فـ الصعيد، ولا لسبب تاني؟
رسلان عينه لمعت لمعة غريبة وهو بيتكلم مع شاهي وبهدوء غريب اول مرة يلاحظه هاني من وقت ما استقر فـ القاهرة: لو ع الجضايا يا انسة شاهندة، فأكيد الصعيد مليان جضايا كَتير، خصوصي جضايا الورث والتار….
شاهندة قاطعت كلامه بهدوء: معنى كدا انك نقلت شغلك القاهرة لسبب تاني.
رسلان بابتسامة: هو إكده بالظبط، نجلت شغلي لسبب تاني، اهنيكي ع ذكائك.
شاهندة بدلته نفس الابتسامة ونسيت خالص هاني كأنه مش موجود: مش محتاجة ذكاء يا استاذ رسلان، طالما سِبت بلدك اللى مليان قضايا وجيت هنا، يبقى أكيد جاى لسبب غير الشغل، وغالبا قعدتك هتطول وعشان كدا حبيت تستغل الوقت ده وتفتح مكتب هنا، مظبوط كلامي؟.
