سبيل صهيب ج٢ لبنى دراز
شاهندة بوجع: انا حاسة ان هاني فيه حاجة متغيرة يا سبيل، اسلوبه اتغير معايا، بقى عصبي زيادة عن اللزوم وع طول يتكلم عن معاد الفرح بطريقة غريبة، وكل شوية يسأل عن الفلوس والشركات، تخيلي!! عايزني أكلم بابا عشان يكتب لي شركة بأسمي هدية الجواز، ومش بس كدا ده كمان عايز اكبر شركة فـ المجموعة، وكل ما ارفض يتعصب عليا، قوليلى اعمل ايه يا بيلا أرجوكي؟
سبيل وقفت كتابة وعملت مكالمة فيديو واول ما فتحت شاهندة المكالمة، ردت بنبرة صوت موجوعة: انا من يوم ما شوفته ما ارتحتلهوش يا شاهي بس لاقيتك فرحانة ما رضيتش أعكر عليكي فرحتك، وقولت لنفسي يمكن أكون غلطانة.
شاهندة شافت سبيل فـ الفون وبدموع ولهفة: وحشتيني اوي يا سبيل، شكلك عامل كدا ليه؟ طمنيني فيكي ايه؟
سبيل بابتسامة حزينة ونبرة هادية: اهدي يا حبيبتي ما تقلقيش انا كويسة صدقيني، وعمري ما كنت كويسة زى دلوقتى، اطمني.
شاهندة: انتي فين يا سبيل؟ جدو وشهاب قلبوا الدنيا عليكي ومش لقيوكي، ارجوكي قوليلى انتي فين، تيتة وبابا وماما تعبانين اوى من وقت ما جدو رجع من السفر.
سبيل: مش مهم تعرفي انا فين المهم انك عرفتي اني بخير، بس عشان خاطري ياريت ما تقوليش لحد انك كلمتيني يا شاهي.
شاهندة بملامح مستغربة ونبرة اندهاش: ولا حتى صهيب؟!
سبيل بنبرة صوت مليانة توتر ونظرات عينها كلها حزن ودموع: لأ يا شاهي، ده بالذات لأ، ارجوكي مش عايزاه يعرف عني حاجة ولا حتى سيرتي تيجي قصاده خالص عشان خاطري لو بتحبيني بلاش يعرف اى حاجة.
شاهندة بحزن واضح ع ملامحها ونبرة صوتها: ليه يا سبيل؟ ده هيتجنن عليكي، ماسابش مكان الا ودور عليكي فيه، صهيب ندم ع اللى عمله فيكي ونفسه ترجعي النهاردة قبل بكرة عشان يعتذرلك.
سبيل مش قادرة تمنع دموعها اللى مش بتقف وبنبرة كلها وجع: ما بقاش ينفع خلاص يا شاهي، اخوكي كـ*ـسرني وعمره ما هيقدر يصلح اللى كـ*ـسره جوايا، حتى لو قدم روحه اعتذار عن اللى عمله فيا، ندمه اللى بتتكلمي عنه ده نابع من احساسه بالذنب ناحيتي مش اكتر، ولو حد قاله مثلا اني سامحته هيرجع وكأنه ما عملش حاجة وحتى هيبطل يدور عليا.
شاهندة: لا يا سبيل، صهيب فعلا قلقان عليكي وندمان وبيتمنى ترجعي تاني، صهيب رافض يطلقك وعايز يكمل حياته معاكي.
سبيل بتنهيدة وجع: كفاية يا شاهي ارجوكي، سيبك مني انا وخلينا فيكي انتي وخطيبك.
