سبيل صهيب ج٢ لبنى دراز
هاني بهدوء: ده رسلان ابن خالي جاي من الصعيد فتح مكتب محاماه من كام شهر وقرر يستقر هنا.
شاهندة بابتسامة هادية من غير ما تمد ايدها: اهلا وسهلا استاذ رسلان، القاهرة نورت.
رسلان اول ما عينه وقعت ع شاهندة حس بنغزة فـ قلبه ورعشة فـ جسمه كله مش عارف سببها وصوته خرج بصعوبة: احم، القاهرة منورة بناسها.
هاني لاحظ تغيير حالة رسلان ونظرات عينيه، قرب منه وحط ايده ع كتفه وبيعرفه بشاهندة: دي بقى يا رسلان، خطيبتي حبيبتي شاهندة الشهاوي، خد بالك يا استاذ دى ملكية خاصة مش مسموح لأى حد يكلمها كدا عادي.
شاهندة بصت لـ هاني بنظرات غيظ وبنبرة عصبية: ايه ملكية خاصة دي يا هاني؟ انا ملك نفسي وبس، مش ملك حد، وياريت لو سمحت بلاش الكلمة دي….. وقامت وهى متعصبة استأذنت من صديقاتها ومشيت.
هاني جري وراها حصلها وهى بتفتح باب عربيتها، مسكها من دراعها: استني يا شاهي لو سمحتي.
شاهندة: بعد اذنك يا هاني، سيب دراعي، روح لـ قريبك وسيبني امشي.
هاني قرب منها ومرسوم ع ملامحه حزن مصطنع وبنبرة حزينة: هتفضلي زعلانة مني كدا كتير؟
شاهندة: ارجوك يا هاني سيبني امشي.
هاني: لأ يا شاهي، مش هسيبك تمشي من غير ما تسمعيني الاول، وتفهمي وجهة نظري.
شاهندة لسة هترد شافت سها داخلة النادي وقربت منهم ركنت العربية ونزلت وبملامح مستغربة ونبرة اندهاش: واقفين هنا بتعملوا ايه؟!
هاني بابتسامة: اهلا مدام سها، ابدا يا ستي، شاهي زعلانة مني وبحاول اصالحها لكن هى بقى سايقة الدلال وتقلانة عليا.
رسلان واقف من بعيد متابع الموقف وجواه مستغرب وبيسأل نفسه ايه اللي حصل له اول ما شاف شاهندة وليه اتضايق لما هاني قال انها خطيبته.
نرجع لـ هاني وشاهندة.
سها بملامح هادية ونبرة جادة: تعالوا نقعد سوا وتفهموني حصل ايه لكل الزعل ده؟
شاهندة بنرفزة: ما حصلش حاجة يا سها، بس لو سمحتوا سيبوني امشي.
سها شالت إيد شاهندة من ع باب العربية وقفلته: اسمعي الكلام يا شاهي وتعالي نقعد ونسمع هاني عايز يقول ايه، ولو كلامه ما عجبنيش… وبصت لـ هاني بخبث: هجيب له هولاكو، قصدي صهيب يعلقه، ما تخافيش.
هاني بضحك: اهون عليكي يا شاهي تسيبي اخوكي يعلقني كدا؟ تعالي يا حبيبتي ربنا يهديكي خلينا نقعد ونتكلم.
سها بهدوء لـ شاهندة: اسمعي كلام هاني يا شاهي وتعالي نقعد واتفاهموا سوا وانا قاعدة معاكي ما تقلقيش.
