خطايا بريئه ج٢

-الاكل عجبك؟

هزت رأسها وأجابت ببسمتها الآسرة التي تعبث بثباته:

-جدًا…طعمه يجنن وكمان تناسق الطبق وطريقة تقديمه حلو يظهر أن الشيف ده متمكن وعنده خبرة كفاية

أبتسم وشرد لوهلة ببسمتها تلك ثم أخبرها بعفوية شديدة كأنهم زوجين حقًا ويشاركها تفاصيل يومه:

-دي بنت جديدة بقالها كام يوم بس في الشغل وبصراحة فاجأتني رغم انها مشتغلتش في حتة قبل كده

وأدت بسمتها تدريجيًا وهدرت بعدم رضا:

– ازاي يعني مشتغلتش في حتة قبل كده انت أزاي بتجازف كده بسمعة مطعمك وتشغل اي حد معندوش خبرة

تنهد من جديد وبرر لها:

-البنت كويسة وانتِ شهدتلها بده وهي كانت محتاجة شغل وانا متعودتش أرد حد محتاج مساعدة

– كنت ممكن تساعدها بطريقة تانية غير انك تجازف

قالتها وهي تقلب عيناها وتستند أكثر على ظهر مقعدها تطالع محيط المكان الخالي من الزبائن ولم يشغره غيرهم ليلفت نظرها تقدم امرأة ممشوقة القوام ذات ملامح هادئة وحجاب يزين رأسها وترتدي مريول مطبخ نقش عليه أسم مطعمه لتتقين أنها هي التي يعنيها فنظراتها نحوه تدل على امتنان عظيم، ولكن ليس ذلك الغريب بالأمر بل عندما وجدته يتتبعها بنظرات هادئة مُرحبة وقوله ما أن وقفت أمامه وحيتهم بمجاملة:

-اهلًا يا “رقية”أخبارك إيه؟

أجابته “رقية” بإمتنان:

– تمام يا “يامن” بيه مش ناقصني حاجة والبركة في ربنا ثم حضرتك طبعًا

أومأ لها دون أي تكلف وتساءل بعملية:

– طيب الحمد لله… قوليلي بقى اخبار الأوردر بتاعنا اللي هيروح البيت أيه؟

ابتسمت واجابته:

– جاهز يا فندم زي ما أمرت وأنا اللي نفذته بنفسي، وبصراحة ممنونة لثقة حضرتك واتمنى الأكل يعجب مدام “ثريا”

تنهد وأضاف ببسمته البشوشة بكل عفوية:

-لا متقلقيش هيعجبها، انا واثق من ده علشان عجب “نادين”

تناوبت “رقية “النظرات بينهم ببسمة ممتنة استقبلتها “نادين” بأخرى متعالية وتلاها قولها بعجرفة دون أي لباقة:

-اه فعلًا، بس ده ميمنعش انه مفهوش أي شيء مبتكر يستاهل المدح الزايد بتاعك

قالتها وهي تشملها من اخمص قدمها حتى أعلى رأسها بطريقة لم تعجب “يامن” قط، وجعلته ينظر لها نظرة صارمة تعرف المغزى منها حين قال رأيه بصدق كي يلاحق الموقف:

-ويمكن ده سر حلاوته وسبب ثقتي انه هيعجب امي علشان يشبه أكلها

كانت “رقية “مستاءة من نظرات “نادين” لها ومن عجرفتها معها وكادت أن ترد رد يليق بها ولكن وجدته يتحدث بالنيابة عنها لتعلق عيناها به بامتنان، فرغم منصبه وسُلطته على العاملين داخل مطعمه إلا انه متواضع غير متكلف، ومراعي للجميع ليس معها فقط