انت مكافاتي ج١ دفنا عمر
معاذ :يووووه، يا بنتي كوكب زحل مليان منك ..
أروى : ماشاء الله! ..هما بدأو البنية التحتية لزحل كمان !
معاذ: امال يابنتي كوكب الارض بقي زحمة .. خلينا نتمطع شويه وننتشر في كوكب تاني ..
ضحكت مرة اخري قائلة :
ماشي يابرنس ،ننتشر مش غلط بردو .
معاذ بغضب مصطنع :
أيه برنس دي!!.. ماشي يا أروى! بكره ليكي عقاب محترم عندي!
********************
يجلس مقابلا لها باحدي الاماكن العامة ،وبينهما طاوله خشبية لامعة ، يعلوها بعض الفطائر المحشوة بالجبن واخري محشوة بمعجون الشيكولاته .. فهو يعلم ما تحب واحضره لها..وأصر عليها أن تتناول إفطارها أولا، فما أن رآها حتى ابصر شحوبها وحزنها!
انتهت من طعامها القليل، فسألها :
ودلوقتي بقي يابرنسيسة ، احكيلي ايه مزعلك كده ..
اروي : في حد في مشكله بسببي !
معاذ مستفهما : مين ده وبسببك ازاي ؟؟؟
قصت عليه اروى ماحدث من ابن عمتها
من أول ما تحرش بها في مدخل تلك البناية
الى ظهور هذا الشاب الضخم فجأة وهو يأمرها بالرحيل، واخيرا ماسمعته على لسان والدتها عن اصابه بهاء وحبس هذا الشاب!!
معاذ وقد احمر وجهه غضبا من هذا الوغد :
الحيوان الكلب ازاي يتجرأ يعمل كده .. اقسم بالله لأندمه على وقحته واعلمه الأدب واربيه من جديد! ثم نظر لأروى فوجدها تبكي بصمت! فهتف برفق:
حبيبتي اهدي ماتبكيش ..انا هجيبلك حقك! وإن كان على الشاب اللي ضربه علشانك، هتصرف وأخرجه!
اروى وهي تجفف دموعها بكفيها :
طب انا ممكن اروح معاك واشهد في القسم ان بهاء ضايقني ،والشاب ده دافع عني عشان يخرج..حرام مالوش ذنب يتحبس كده بسببي ..!
معاذ بحزم :أروى .. الموضوع خلاص بقا عندي مالكيش انتي دعوه يتحل ازاي..ومعندناش بنات تدخل اقسام شرطه .. انا هتصرف بطريقتي ،قومي دلوقتي اوصلك .. وكويس إنك معرفتيش ماما وبيسان وكلمتيني أنا ..
ثم رمقها بحنان أخوي صادق :
اروي انا هقولها تاني.. انتي اختي الصغيرة اللي مش هسمح حد يمسها بسوء .. اوعي تواجهك اي مشكله وتخبيها عني مهما كانت ،انا اكبر منك ودايما هعرف اتصرف والاقي حلول .. انتي مش لوحدك ،اوعي تنسي ده ابدا في اي لحظه بحياتك ..
اروي بامتنان :
صدقني ، حضرتك الوحيد اللي فكرت فيه.. صحيح انفصلت عن أختي .. وانا معرفش السبب بس هتفضل اخويا الكبير وسندي بعد ربنا!
وكأنها بذكر انفصاله عن بيسان قد هيجت شوقه الشديد لها ..لكنه نفض عنه ذلك الشعور، وهو يستعيد غضبه ثاينا من هذا الذي تجرأ عليها ،وتجاوز معها بهذا الشكل .. ظننًا منه، أن ليس لديها من يحميها!
