انت مكافاتي ج١ دفنا عمر
بهاء : خلاص يا ماما ، ايه رايك نزورهم بكرة بالليل؟
قالت بسعادة حقيقية : وماله ياحبيبي، هتصل اعرفهم أننا هنزورهم!
تري ما الذي سيترتب على تلك الزيارة من ابن العمة المدلل.. وماذا سيكون رد فعل أروى ؟؟؟؟؟
الفصل الثالث
_________
السمج ده جاي عندنا ليه.. ؟
اعتراض أطلقته أروى فور علمها بزيارة بهاء!
الحاجة عائشة : عيب كده يا أروى ، ده ابن عمتك!
أروى : أنا مابحبوش يا ماما ولا برتاحلوا ، كفاية معاملته الوحشة لعمتي شمس! ده المفروض يتسمى ابتلاء مش بهاء!
بيسان متدخلة : بصراحة يا ماما أروى عندها حق .. بهاء ابن عمتي تصرفاته ما تشرفش وأنا كمان بضايق منه بسبب معاملته السيئة لأمه ..
الحاجة عائشة : مالناش دعوة بكده، أهو في الاخر ابنها ولو انتي عاملتيه وحش عمتك شمس نفسها هتزعل منك.. ده ضيف هياخد واجبه ويمشي ، كتر خيره جاي يطمن عليا اما عرف إني تعبت ..!
أروى وهي تتعلق بعنق والدتها بدلال وحب :
طب سيبك من كل ده وطمنيني عليكي يا شوشو، بجد بقيتي كويسه دلوقتي؟
قالت بابتسامة حنونة :
متخافيش ياحبيبتي انا بقيت زي الفل، شوية تعب وراحوا لحالهم ..
اروي بصدق: ارجوكي يا ماما ، اوعي تهملي علاجك تاني ، انا كنت هتجنن عليكي!
ثم احتصنت والدتها بشدة قائلة :
انتي اغلى انسانة عندي في العالم، ومش عايزة اشوفك تعبانه تاني ، انا بخاف عليكي اوي يا ماما ..
ربتت على ظهرها برفق : يا حبيبة ماما كل الناس بتتعب، متخافيش يا أروى، ربنا يمد في عمري لحد ما اطمن عليكي أنتي واختك ..
**********************
_ وأخيرا خلصنا أخر وش نقاشة للمحل .. وبقى جاهز نرص فيه البضاعة!
بلال : الحمد لله يامعتصم ….أحنا وفرنا تمن النقاشة وعملنا بأدينا أحلى شغل ولا اجدع نقاش فيكي يا بلد!
معتصم : بس حيلنا اتهد ياعم ، احنا مطبقين 3ليالي عشان نخلي المحل ده ينفع لبضاعتنا..
بلال وهو يجلس على أحد المقاعد :
مش مهم ، نتعب دلوقت، عشان نرتاح بعدين، مافيش حاجة بتيجي بالساهل ياصاحبي!
معتصم وهو يجلس بتهالك :
بس يارب يجي بفايدة ، احنا حطينا كل قرش معانا وعملنا جمعيات لسة ماخلصتش ، ده غير إيجار المحل ده نفسه..
بلال : وبعدين يامعتصم ، أنت هتشيل هم من دلوقتي .. كله هيبقي تمام، احنا قاصدين الحلال وهنتعب، وربنا اكيد هيجازينا خير ويفتح أبواب رزقه لينا ، بس انت قول يارب!
معتصم : يارب..
………………………..
