شمس وادم انجي الخطيب
ندى ردت: ـ معرفش قيمتها، بس سمعت أمك بتقول إن الفلوس دي حقك، وإنها هتروح توثق كل حاجة عند محامي. وبعدها ماما هددتها، وقالتلها إنها لو فتحت بُقها هتندم. آدم بص لزينب بتركيز شديد، ثم سأل ندى: ـ وإنتي سمعتي الكلام ده بنفسك؟ ـ أيوه.
ـ أيوه. ـ وعندك أي حاجة تثبت الكلام؟ ندى ترددت لحظة، ثم قالت: ـ فيه ورق قديم في دولاب ماما، كانت بتخبيه في درج مقفول. وأنا مرة شفتها وهي بتحطه هناك. مش عارفة فيه إيه، بس أعتقد إنه متعلق بأم شمس. زينب اندفعت ناحيتها وهي بتصرخ: ـ كفاية بقى!
إنتي اتجننتي؟! لكن آدم وقف بينها وبين بنتها. ـ محدش هيلمس حد. واللي عنده حاجة يقولها قدام الجهات المختصة. في اللحظة دي، أبويا أخيرًا اتكلم. ـ استنوا! لفينا كلنا ناحيته. كان واقف ووشه شاحب، وعينيه محمرتين، كأنه كبر عشر سنين في دقائق. بصلي وقال بصوت مكسور: ـ شمس…
تعالي يا بنتي، خلينا نتكلم. رجعت خطوة لورا، وقلبي مليان خوف وغضب. ـ بنتك؟! افتكرت إني بنتك دلوقتي؟! من شوية كنت رابطني بإيدك في الزريبة، وسايبني أمو. ت من الجوع والعطش! نزل راسه. ـ أنا غلطت. ضحكت بمرارة. ـ غلطت؟
! إنت فاكر اللي حصل ده غلطة عادية؟! إنت حتى مسألتنيش، مصدقتش دموعي، ولا حاولت تسمعني. حكمت عليّا قبل ما تعرف الحقيقة! رفع عينيه ليا، والدموع بدأت تتجمع فيها. ـ أنا عارف إني مش هقدر أصلح اللي عملته بكلمتين، بس أنا أبوكي يا شمس.
قلتله بصوت مليان وجع: ـ الأب مش مجرد راجل بنناديه يا بابا. الأب أمان، والأمان عمره ما كان موجود في حياتي وأنا جنبك. الكلام نزل عليه كأنه ضربة. حاول يقرب مني، لكن آدم وقف بهدوء وقال: ـ الحاج حكيم، شمس محتاجة تخرج من هنا وتطمن على صحتها.
الكلام بينكم ممكن يحصل بعدين، لما تكون هي مستعدة. أبويا بصله، ثم بصلي، وفي عينيه ندم واضح. لكنه ما حاولش يمنعنا المرة دي. خرجت من البيت وأنا مسنودة على آدم، وندى ماشية ورانا وهي شايلة شال حطته على كتفي.
وقبل ما أركب العربية، بصيت ناحية البيت اللي قضيت فيه سنين من عمري. مكان كنت فاكرة إنه بيتي، لكنه في الحقيقة كان أكبر سجن عشت فيه. ركبت العربية، وآدم قفل الباب بهدوء، ثم لف ناحية السواق وقال: ـ على المستشفى الأول، وبعدها هنروح لجدتها.
بصيتله بسرعة. ـ جدتي! يا نهار أبيض! تيتة أكيد ماتت من الخوف عليّا! آدم طمني: ـ أنا اتصلت بيها من شوية، وبلغتها إني لقيتك، وإنك معايا وفي أمان. هي مستنيانا، وطلبت مني أرجعك لها فورًا بعد ما نطمن على صحتك. حطيت إيدي على وشي وعيطت.
