اخت جوزي ج١ منال علي
مـن أول جـوازها وأنا بخـدم أخـت جـوزي… لحـد ما كـلمة منـها خـلتني أنـدم على كـل اللـي عمـلته!!!!!!!
أنا اسمي نادين، عندي 27 سنة، ومتجوزة بقالـي تلات سنين من أحمد، وعندنا بيت صغير فوق بيت حماتي.
من أول يوم جواز وأنا عارفة إن العيلة عندها مترابطة جدًا، وخصوصًا إن أحمد ابنه الوحيد، وأخته الكبيرة سارة كانت متجوزة جديد وساكنة في منطقة قريبة مننا.
أنا بطبعي بحب أساعد اللي حواليا، ومش بحب أقول «لأ» لحد، خصوصًا لو حد من أهل جوزي.
بس اللي مكنتش أعرفه إن طيبتي دي هتخليني بعد فترة أحس إني بقيت مسؤولة عن بيتين بدل بيت واحد.
سارة كانت عروسة جديدة، ومن تاني يوم جوازها تقريبًا، بعتتلي هدومها هي وجوزها مع أمها.
وقتها بصيت للكيس باستغراب وقلت:«هو ده إيه؟»
حماتي ضحكت وقالتلي: «هدوم سارة وجوزها، اغسليهالها يا نادين عشان لسه جديدة ومش واخدة على بيتها.»
بصيت للكيس، وبعدين بصيت لحماتي.
مكنتش متوقعة إن ده يبقى بداية حكاية طويلة.
قولتلها: «حاضر.»
وغسلتهم فعلًا.
نشرتهم، وطبقتهم، وحطيتهم في كيس نظيف.
تاني يوم سارة جت أخدتهم، وقالتلي: «تعبتك معايا.»
ابتسمت وقلتلها: «ولا تعب ولا حاجة، إحنا أخوات.»
وفعلًا كنت بقولها من قلبي.
لكن بعد كام يوم، بعتت هدوم تانية.
وبعدها هدوم تالتة.
وبعد أسبوع بقت الهدوم تيجي بشكل شبه يومي.
وأنا كل مرة أقول: «معلش… عروسة جديدة.»
وبعدين بدأت سارة تيجي عندنا من الصبح.
جوزها كان شغله بياخد اليوم كله، وكان بيرجع قبل المغرب، فكانت تقعد عند أمها من الصبح لحد ما يقرب يرجع.
وطبعًا الغدا كان بيطلع معاها.
حماتي تقول: «نادين، حطي لسارة وجوزها من الأكل.»
أحط.
ولو عملت بسبوسة أو كيكة، حماتي تقول: «حطي حتتين لبنتي.»
أحط.
ولو جوزها بيحب أكلة معينة، سارة تقولها لأمها، وأمها تقولهالي.
وأنا أعمل.
ومع الوقت، بقى بيتنا بالنسبالها كأنه مطبخ بيتها.
لكن الغريب إن سارة عمرها ما كانت بتطلب مني الحاجة بشكل مباشر.
كانت دايمًا تخلي أمها تقول.
وأنا كنت بعمل نفسي مش واخدة بالي.
لحد ما عدّى حوالي ست شهور.
وفي يوم، سارة اختفت كام يوم ومبقتش تيجي زي عادتها.
عرفت بعدها إنها بتتابع مع دكتور بسبب تأخر الحمل.
وبعد فترة عرفت إنها هتعمل حقن مجهرية.
وقتها نسيت كل حاجة.
لا افتكرت هدوم.
ولا أكل.
ولا إنها كانت بتاخد من وقتي ومجهودي.
