ابن المعلم الى رجع من الموت ج١

»
رجب رد من غير ما يلف:
«من ساعة ما أمه ماتت، ما نامش غير وهو بيعيط.»
كلارا سكتت. وبعد شوية، قالت:
«ممكن… تشغلوا قرآن واطي؟»
رجب بص لها من المراية.«ليه؟»
«عشان يهدى.»
رجب أشار للسواق.

«شغّل.»
صوت القرآن ملأ العربية بهدوء. ليو غمض عينه، وكلارا فضلت تمرر إيدها على شعره بحركة خفيفة. بعد عشر دقايق، الطفل نام. رجب كان بيراقبهم من المراية. ولأول مرة من شهور، شاف ابنه نايم من غير ما جسمه ينتفض. لكن الهدوء ماكملش.

عربية بيضا ظهرت وراهم. وبعدين قربت. حمدي بص في المراية الجانبية، ووشه اتغير.«يا معلم… في عربية لازقة فينا.»
رجب لف راسه. العربية البيضا كانت وراهم من أول كوبري أكتوبر. وبعد ثواني، زادت سرعتها. رجب قال للسواق:
«ما تغيرش طريقك. خلي بالك.»
حمدي حط إيده على سلاحه.

كلارا رفعت راسها، وحست إن الجو اتبدل.«في إيه؟»
رجب ما ردش. العربية البيضا قربت أكتر. وفجأة، شباكها نزل. حمدي صرخ:
«انزلوا راسكم!»
صوت رصاصة دوّى في الشارع. الزجاج الخلفي للعربية اتكسر، وكلارا ضمت ليو لصدـ,,ـــرها من غير تفكير. رجب لف ناحية ابنه، وصوته خرج لأول مرة مليان خوف حقيقي:

«ليو!»
حمدي فتح باب العربية بسرعة، وبدأ يرد على المهاجمين. السواق زوّد السرعة، والعربية اندفعت وسط الزحمة. كلارا كانت حاضنة ليو، اللي صحى مرعوب وبدأ يصرخ.«ماما! ماما!»
رجب مد إيده لورا.«كلارا! انزلي تحت!»
كلارا كانت بتحاول تحمي راس الطفل بجسمها.

«أنا ماسكاه!»
رصاصة تانية خبطت في باب العربية. ليو بدأ يختنق من العياط. كلارا قربت وشها منه، وقالت بسرعة:
«بصلي يا حبيبي… خد نفسك. أنا هنا، سامعني؟ أنا هنا.»
رجب كان بيبص لهم، لكن عينه لمحت حاجة غريبة. ليو، وسط الخوف والصريخ، كان ماسك في رقبة كلارا.

وفجأة، قال كلمة واضحة. كلمة خلّت رجب يحس إن الدم اتسحب من جسمه.«ماما… قالتلي…»
كلارا رفعت راسها. رجب قرب بجسمه ناحية الكرسي الخلفي.«قالتلك إيه يا ابني؟»
ليو بص لأبوه، وعينيه مليانة دموع. وبصوت متقطع، قال:
«ماما… قالتلي… كلارا هتيجي.

»
العربية كلها سكتت. حتى حمدي، اللي كان بيبص وراهم، لف للحظة. رجب مسك ضهر الكرسي بإيده.«إيه؟»
ليو كمل وهو بيشهق:
«ماما… قالت… كلارا هتحميني.»
كلارا حسّت بقشعريرة في جسمها. هي عمرها ما شافت نادية. على الأقل، ده اللي كانت فاكرَاه.