درس العمر منى السيد
مريم قطعت الصمت بذكاء وضحكت بخفة: يا ستي كل البيوت فيها أسرارها، المهم إنكم منورينا الليلة.. كل يا محمود متتكسفش، رامي صاحبك برضه ومفيش بينكم أسرار!
محمود كمل أكله وهو باصص في طبقه ومفتحش بؤه بكلمة تانية طول السهرة، ونهى كانت مروقة وبتشرب عصيرها بانتصار.
الساعة جت حداشر، محمود ونهى استأذنوا ونزلوا. محمود كان نازل ع السلم وراسه في الأرض، حتى مرفعش عينه يودع رامي بحرارة زي ما دخل.
رامي قفل الباب، ولف ضهره.
الشقة كانت هادية، وأطباق العزومة المتوسخة كانت مالية السفرة والمطبخ.
مريم وقفت قدامه، وبصتله من غير ما تتكلم. عينيها كانت بتقوله أدي صاحبك اللي كنت بتهد بيتك عشانه، وأدي النتيجة.
رامي مشي بخطوات تقيلة، ووقف قدامها. عينيه كانت مكسورة، الغرور الكداب اللي كان مالي صوته أول الشهر اتبخر ومبقاش منه غير راجل اتعلم درس عمره.
ـ مريم.. أنا آسف.
الكلمة طلعت منه بصوت واطي بس صادقة لأول مرة.
ـ أنا كنت أعمى يا مريم.. كنت غبي وتافه وبجري ورا كلام فارغ ومنظرة ملهاش أي تلاتين لزمة. محمود ده طلع مسكين وأنا كنت أهبل منه لما سمعتله وجيت أفرضه عليكي في بيتك. أنا نسيت إنك إنتي اللي شيلتيني، ونسيت إن تعبك وشقاكي في التجمع هو اللي ساترنا، وإني من غير تدبيرك مكنتش هعرف أعيش أسبوعين على بعض بمرتبي ده.
مريم قربت منه، ونظرتها لانت شوية، بس الحزم كان لسه موجود في نبرتها: الاعتذار حلو يا رامي، بس الأفعال هي اللي بتثبت. أنا مش عدوتك، ولا عمري كنت داخلة معاك في ندية. إحنا دخلنا البيت ده شركاء، بنشقى سوا ونتعب سوا عشان نعمل بيت نظيف ومستقبل لينا. لكن إنك تدوس عليا، وتستقل بيا وبتعبي، وتفتكر إن الفلوس بتديك حق إنك تقلل من قيمتي، ده اللي مكنتش هسمح بيه أبداً، حتى لو كان التمن إني أسيب البيت ده ومارجعلوش تاني.
رامي مسك إيديها الاتنين وباسهم: حقك عليا.. والله العظيم فهمت، والدرس علم في دماغي ومش هنساه ليوم الدين. من النهاردة مفيش كلمة تتقال بعد كلمتك في إدارة قرش البيت، وكل اللي اتفقتِ عليه هيتنفذ بالحرف، من بكرة الصبح.
مريم ابتسمت ابتسامة خفيفة، وسحبت إيدها بهدوء، وشاورت بصباعها على السفرة المليانة أطباق ومخلفات العزومة: من بكرة الصبح إيه يا رامي؟ الرهان بيبدأ من اللحظة دي بالذات!
