درس العمر منى السيد
رامي حط إيده على راسه كأنه هيموت من الصداع: مريم.. ابوس إيدك بلاش العند ده دلوقتي.. ادفعي العزومة دي من الكارت بتاعك أو من حسابك التاني، والله هرجعهملك أول الشهر.. متصغرنيش قدام الراجل، محمود هيمسكها عليا ذلة في الشركة ومش هخلص من لسانه!
مريم بصتله بنظرة كلها شموخ وقوة: أدفع من حسابي؟ اللي قولتلي عليه إنه ملاليم وإني عايشة بفضلك وبفضل مرتبك؟ اللي قولتلي أسبوعين وهتيجي تبوس إيدي عشان أديكي قرشين؟ إنت نسيت كلامك يا رامي؟
رامي بلع ريقه وصوته انكسر لأول مرة: كنت بهزر.. كنت متعصب وغبي ولساني فلت.. وحياتي عندك يا مريم، الليلة دي بس.. مش هنسهالك طول عمري!
مريم طلعت من جيبها الورقة المطوية اللي كانت مجهزاها، الورقة اللي فيها كشف الحساب المسحوب بخط إيدها، وحطتها في صدره: عايزني أدفع وأسندك؟ تمام. بس بشروطي أنا، وبالورقة والقلم يا رامي. مفيش رجوع لنقطة الصفر تاني. هتدفع تمن الدرس ده لحد آخر مليم، وأخوك ملوش مليم واحد يطلع من البيت ده تاني، وإذا كنت عايز تديله يبقى من مصروف جيبك الخاص بعد ما تدفع نصيبك في البيت بالقرش. ثانياً الحساب المشترك هيتلغى، وكل أول شهر مرتبك هيتقسم تلتين وتلت؛ تلت لمصاريف البيت الحقيقية اللي أنا هحسبها وأديرها بنفسي، والتلت لأقساط ديونك، والتلت الأخير ده مصروفك الشخصي. ثالثاً وأهم شرط الرهان هيتنفذ بالحرف، من بكرة الصبح ترجع تقاسم معايا شغل البيت، وتنضف الشقة بنفسك لمدة ست شهور زي ما راهنتني!
رامي برّق: أنضف الشقة؟! ومحمود هنا أقوله إيه دلوقتي؟!
مريم رفعت موبايلها: تقول موافق وتبوس إيدك وش وضهر، يا إما هخرج للصالة حالاً، وأقول لمحمود ونهى معلش يا جماعة، رامي الباشا اللي مرتبه ضعف مراته، الفيزا بتاعته اتصفرت ومعهوش تمن وجبة، واتفضلوا بقى ننزل ناكل فول وطعمية على حسابه برضه!
رامي حس إن السقف بيقع عليه. الغرور بتاعه اتكسر حتت صغيرة تحت رجلين مريم. مكانش قدامه أي مفر. مريم كانت ماسكة كل الخيوط في إيدها؛ الورق، الفلوس، والكرامة اللي كانت ضايعة.
هز راسه باستسلام تام وهو باصص في الأرض: موافق.. موافق على كل حاجة يا مريم.. بس طلعينا من الليلة دي الله يسترك!
مريم ابتسمت ابتسامة الانتصار الهادي، طلعت كارتها البنكي الخاص من محفظتها، وفتحت الأبلكيشن الخاص بأشهر مطعم مشويات، وطلبت تشكيلة فاخرة من الكباب والكفتة والمقبلات، ودفعت الحساب كامل بضغطة زرار واحدة من فلوس شقاها اللي كانت بتديرها بذكاء.
