اللقمه ج١ منى السيد
الساعة كانت داخلة على اتنين بالليل لما طارق وصل.
دخل الأوضة، بص على مريم وباس جبينها بحنية، وبعدين بص على هدومي المليانة طين.
قلع البالطو بتاعه وحطه على كتافي:
«حقك هيرجع يا سارة».
«مش حقي لوحدي يا طارق.. حق كرامتنا كلنا».
طارق طلع موبايله وحطه قدامي:
«من نص ساعة كلمت المستشار القانوني بتاع البنك، وراجعت الورق اللي ممدوح رافعه. لقيت مشكلة تانية».
بصيتله باهتمام:
«إيه هي؟»
«ممدوح مش بس متلاعب في الميزانية عشان يخفي مصاريف شقة دنيا.. ممدوح كاتب الشقة دي باسم إياد، والوصية عليها هي دنيا، ودفع تمنها من شيكات مرتبطة بالشركة المشتركة معاه».
ضحكت بمرارة:
«يعني كان بيستخدم أرباح تعبي وشقاي عشان يأمن مستقبل ابن أخوه ومراته؟»
طارق كمل:
«وأزيدك من الشعر بيت؟ التحويلات اللي كانت بتطلع من حساب الشركة باسم مؤسسة الأمل للتوريدات، اللي كنتي فاكراها شركة خامات، اتضح إن فيها مخالفات في السجلات. والموضوع محتاج تحقيق قانوني كامل».
في اللحظة دي حسيت كأن مية ساقعة ادلقت على دماغي، لكن المرة دي صحتني من غفلة سنين.
المسألة مكنتش مجرد تصرف سيئ في مطعم، ولا مجرد خلاف عائلي.
كانت فيه تصرفات مالية محتاجة مراجعة قانونية دقيقة، وكان لازم أحمي حقوقي وحقوق بنتي.
«طارق.. الورق ده كله يجهز منه نسختين. نسخة للإدارة القانونية، ونسخة للجهات المختصة».
«جاهز من دلوقتي.. بس الصبح أنا هبدأ بالإجراءات في البنك».
«لا»، قلتله وأنا بقف على حيلي والوجع اتبخر من جسمي تقريبًا.
«أنا اللي هروح البنك الصبح».
«إنتِ؟ سارة، إنتِ تعبانة و…»
«أنا بقيت كويسة جدًا.. أنا عمري ما فوقت في حياتي زي الليلة دي».
الساعة 9 الصبح، شمس خريفية باهتة كانت طالعة فوق القاهرة.
كنت روحت البيت القديم بتاع بابا في مصر الجديدة، أخدت شاور، غيرت هدومي ولبست تايير كحلي فورمال، ولميت شعري، لكن ملامحي كانت ثابتة.
مريم سبتها مع ماما وأختي في أمان، وكانت صحتها بقت أحسن كتير.
وصلت الفرع الرئيسي للبنك في التجمع الخامس.
دخلت بثقة، والموظفين رحبوا بيا لأني معروفة عندهم، ودخلت قعدت في الأوفيس الداخلي الملحق بمكتب طارق، بحيث أكون متابعة اللي بيحصل من ورا الإزاز.
الساعة 9:45، دخل ممدوح.
كان ماشي واثق من نفسه، لابس البدلة الكحلي اللي عرفتها، وراشش البرفان الغالي اللي كنت أنا شرياهوله في عيد ميلاده اللي فات، وماسك في إيده شنطة جلد سودا شيك.
