اللقمه ج١ منى السيد
والغريب.. إنه مكنش لوحده!
دنيا كانت معاه.
لابسة طقم شيك ونضارة شمس رافعاها على شعرها، وماشية جنبه وهي بتضحك معاه.
دخلوا مكتب طارق.
طارق كان قاعد ورا مكتبه، وشه هادي وخالي من أي تعبير، وقدامه ملف القرض وشوية ورق مرتبين.
ممدوح مد إيده بحرارة:
«أهلًا يا باشا! صباح الفل والياسمين على أحسن مدير ائتمان في مصر!»
طارق مبادلش المصافحة، واكتفى بهزة راس:
«صباح الخير يا ممدوح.. اتفضلوا».
ممدوح ارتبك للحظة، لكنه قعد، ودنيا قعدت على الكرسي اللي جنبه وحطت شنطتها على المكتب.
قال ممدوح:
«أحب أعرفك برضه يا طارق بيه، دي دنيا هانم، شريكتي الجديدة اللي هتتولى إدارة قطاع التوريدات في التوسع الجديد اللي هنعمله بفلوس القرض».
دنيا مدت إيدها:
«أهلًا يا طارق بيه، ممدوح دايمًا بيكلمني عن ذكائك ووقفتك جنبه».
طارق فتح الملف قدامه وبدأ يقلب في الورق بهدوء:
«تمام. خلينا ندخل في الموضوع على طول عشان عندي اجتماع مجلس إدارة كمان ربع ساعة».
ممدوح فرك إيديه بلهفة:
«خير يا رب.. كل الأوراق مستوفية والشيكات جاهزة؟ القرض بتاع العشرة مليون هيتصرف النهارده ولا بكرة الصبح؟»
طارق رفع عينه وبصله في هدوء:
«هو الصراحة يا ممدوح.. فيه مشكلة عطلت الصرف».
وش ممدوح اتغير للحظة:
«مشكلة إيه يا طارق؟ إحنا مراجعين كل حاجة مع المحاسب القانوني، وكل الضمانات موجودة!»
«المشكلة الأولى.. في الضامن».
طارق طلع ورقة وحطها قدامه:
«الضامن المتضامن في شركتكم هي سارة السيوفي.. وسارة النهارده الساعة 8 الصبح قدمت إخطار رسمي للبنك برفع مسؤوليتها عن أي تسهيلات ائتمانية جديدة للشركة، وسجلت اعتراض رسمي على القرض».
ممدوح اتوتر وقال:
«سارة؟! سارة بتتصرف كده بسبب خلاف عائلي حصل إمبارح؟! طارق، متدخلش شغل البنك في المشاكل العائلية».
دنيا اتدخلت بصوت هادي:
«سارة متهورة وبتاخد الأمور على أعصابها بزيادة، مش معقول تضيع مستقبل شركة بسبب خلاف بسيط».
طارق بص لها بهدوء، ثم رجع لممدوح:
«التوكيل اللي معاك يا ممدوح.. ملغي من شهرين في توثيق الأهرام بالجيزة. واستخدامك لتوكيل ملغي في تقديم أوراق رسمية للبنك موضوع لازم يتراجع قانونيًا».
ممدوح بدأ يتوتر:
«ملغي؟ ملغي إزاي؟! هي مقالتليش!»
«ومش هتقولك».
الصوت مكنش صوت طارق.
الصوت كان صوتي أنا، وأنا بفتح باب الأوفيس الداخلي وبخرج بهدوء وثقة.
