انت مكافاتي ج٢ دفنا عمر
************************
بهاء : أظن أنا مش محتاج أفهمك شكل حياتنا هيكون ازاي يا سجدة!!
أومأت برأسها دون التفوه بشيء ، وعيناها شاردة بما يقصده، هي لا تتوقع معه حياة زوجية سعيدة، هو تزوجها شفقة لإنقاذها، وهي تقدر له صنيعه الطيب، ولن تنكر عليه استحقاقه كل الثناء والشكر ..
تنحنحت بعد صمتها القصير :
ماتقلقش، أنا فاهمة قصدك، وعارفة إن جوازنا هيكون مؤقت ..
بهاء مقتربا من مجلسها فوق الفراش الوحيد بالغرفة :
بردو أفضل التوضيح أكتر .. شوفي يا بنت الناس، أنتي مالكيش عندي أي حقوق أكتر من إني اتقي الله فيكي وبمعاملتي ليكي ، لكن حقوق والتزامات وواجبات بنا گ زوجين .. مافيش!!
مش عايز احس بالذنب ناحيتك أو إني ظلمتك معايا، الجواز ده حاجة بعيدة عن حياتي، عمري ما هكون زوج لواحدة ، وأنتي أي وقت هتحسي إنك بقيتي قادرة تواصلي حياتك من غير مساعدة ، أطلبي حريتك مني، وهتاخديها كاملة!!
كم قاسي هو إحساس الرفض والزهد من أحدهم على نفس الأنثى!! حتى وإن زهدت هي قبله..!
فلا ترتوي براعمها إلا بالاهتمام والرغبة فيها گ سمة أي امراءة خُلقت على وجه الأرض.. ولا يقتل روحها، ويجرح كرامتها ، سوى شعور النبذ..!
تنهدت، وحاولت ألا تظهر حزنها لكلماته متمتمه :
ياريت ماتوضحش أكتر من كده لأني قلتلك فاهمة!
ثم رفعت وجهها إليه ،مصوبة لعيناه نظرة قوية :
أنت كمان مالكش أي حقوق عليا كزوج، ليك كل الحرية في تصرفاتك، إلا إنك تحاول تهين كرامتي .. طاعتك في أمور محددة، واحترامك، واجب عليا قصاد الناس، وحتى من وراهم ، مادام مافيش تعدي على الحدود اللي بيني وبينك!!
صمت قليلا، ثم أكملت :
وعشان ده أول حق ليك عندي .. أنا بشكرك على واقفتك قصاد خالي، وسامحني على المهر الكبير اللي دفعته لواحدة اضطريت تتجوزها إنقاذ موقف!
وفلوسك اللي خسرتها ، للأسف مش هقدر في يوم ارجعهالك مهما أشتغلت!
تبدلت ملامح بهاء، وملئت عيناه نظرة حزينة متذكرًا ماضيه :
ياريت كل الخسارة فلوس! في حاجات كتير أهم، بنخسرها، ومابنعرفش نرجعها مهما عملنا..!
رمقته سجدة بشفقة .. فملامحه تكاد تصرخ بمأساة تركت بصمتها داخل نفسه!
احترمت صمته الذي طال قليلا، واستكانت بجلستها على الفراش تراقبه، وهو يقف متطلعًا عبر نافذة غرفتهما ..
وبعد برهة أخرى ، أدار زاوية وجهه إليها، وتسائل بعد أن عاد الهدوء لملامحه : أنتي بتشتغلي أيه يا سجدة؟!
