الزوجه الاخيره ندى الجمل

فضلت باصة لاختبار الحمل يمكن خمس دقايق كاملة…
يمكن مستنية الخط يختفي، أو أصحى ألاقي نفسي بحلم.
لكن الحقيقة كانت قدامي واضحة وصريحة.
أنا حامل.
الحاجة اللي استنيتها 11 سنة… حصلت بالطريقة الوحيدة اللي كان مستحيل أتخيلها.
وقعت على الأرض وأنا بعيط بهستيريا.
مش عارفة أفرح ولا أخاف.
أول حاجة جت في بالي كانت كريم.
وش أهله.
ونظرات أمه الشامتة.
لو عرفوا الحقيقة… هيدبحوني.
قعدت اليوم كله مستخبية في أوضة النوم.
ولما كريم رجع بالليل، كان بيتكلم في الموبايل وبيضحك بطريقة ما بقتش أعرفها فيه.
أول ما شافني قفل المكالمة فورًا.
وقتها… لأول مرة، قلبي قال الحقيقة اللي كنت بهرب منها سنين.
جوزي بيخوني.
بصلي باستغراب وقال: “مالك؟ وشك أصفر كده ليه؟”
كنت عايزة أصرخ في وشه: “وأنت مالك؟!”
لكن لساني اتربط.
قالي ببرود: “اعملي حسابك… أمي جاية تقعد معانا كام يوم.”
طبعًا.
الناقص فعلًا في حياتي كان حماتي.
تاني يوم الصبح دخلت عليا المطبخ من غير حتى ما تسلم، وبصتلي من فوق لتحت وقالت: “لسه نايمة لحد دلوقتي؟ الست اللي ما عندهاش عيال بتتعب من إيه بالظبط؟”
الكلمة نزلت على قلبي زي السكينة.
كنت هرد… لكن فجأة حسيت بدوخة شديدة.
الدنيا اسودّت قدامي، ووقعت.
فوقت على صوت كريم وهو بينادي اسمي بخضة حقيقية لأول مرة من سنين.
ودّوني المستشفى بسرعة.
الدكتورة خرجت بعد الكشف وهي مبتسمة وقالت: “مبروك… المدام حامل.”
الصمت اللي حصل بعد الجملة دي كان مرعب.
حماتي فتحت بقها من الصدمة.
وكريم فضل يبصلي كأنه مش مستوعب.
بعد ثواني… أمه زغرطت بصوت عالي لفت المستشفى كلها.
وفجأة… بقيت أنا الست العظيمة اللي “وشها حلو”.
نفس الست اللي كانوا بيعايروني بيها بقت دلوقتي “ست الكل”.
رجعنا البيت، وكريم لأول مرة من شهور حضني.
لكن الغريب إن حضنه خوّفني.
لأني كنت شايلة سر ممكن يدمّر كل حاجة.
وفي نص الليل، صحيت على صوت رسالة جاية على موبايله.
كان نايم جنبي.
قلبي دق بعنف… ومديت إيدي بالموبايل.
ولأول مرة في حياتي… فتحت موبايل جوزي.
الرسالة كانت من رقم متسجل باسم “سامي كهربائي”.
لكن محتوى الرسالة خلّى الدم يتجمد في عروقي.
“وحشتني… إمتى هتقدر تيجي تاني؟ البنت سألت عليك النهارده.”
بنت؟!
إيدي بدأت ترتعش وأنا فتحت المحادثة…
ولقيت صور.
صور لكريم… شايل طفلة صغيرة في حضنه.
وصور لست تانية… واقفة جنبه وساندة راسها على كتفه.
وتحت صورة منهم مكتوب:
“أحلى عيلة في الدنيا.”