جواهر
سولييه نصار
-اتفضل يا أخويا هكتم خالص.
بصلي بغيظ وقال:
-عزك تساعديني أسرق بيت جدك.
-إيه؟! إنت أكيد مجنون صح؟! عايزني أرجع بلدنا وأسرق جدي كمان! بس لحظة أنت تعرف جدي منين؟!
ضحك وقال ببرود:
-هو فيه حد ميعرفش عبد الرحيم اللبان؟ أشهر من النار على العلم.
-مش فاهمة! (قلتها وأنا خايفة).
ابتسم بشر وقال:
-بيني وبين جدك حكاية خاصة، هو أذاني وأنا لازم أردله الضربة في حفيدته.. فهمتي دلوقتي يا حلوة أنا اخترتك ليه؟
-جواهر: يا لهوي! يعني أنت عشان تنتقم من جدي خطفتني وعايز تجبرني أعمل حاجة غصب عني؟! حرام عليك، اتقي الله إنت معندكش ولايا؟!
-يا ربي على القرف اللي أنا فيه.. مالك يا بت؟ إيه حكاية الخوف دي معاكي؟!
-أومال أنت عايز عيوني؟!
-أحييه يا بت متشلنيش! بقولك هتساعديني.
-ولو رفضت؟!
مد السكينة وقال بصوت مخيف:
-يبقى قولي على نفسك يا رحمان يا رحيم.. ها، قولتي إيه يا شاطرة؟ هتساعديني ولا أخلص من الموضوع كله؟
ساعدته، مكانش قدامي حل إلا إني أوافق.
-هساعدك يا أخويا، هو أنا أقدر أرفض؟!
-تمام، هنتحرك الصبح، بس قبل كده عايز طلب صغنن منك.
-اؤمر يا أخويا.
-أنا اتصلت بالمأذون دلوقتي.
-خير؟ أنت ناوي تتجوز وأنا هكون الشاهدة صح؟!
ضحك وقالي:
-لا يا عينيا، إنتي هتكوني العروسة.
-يا نهارك أسود! إنت أكيد اتجننت أنا مستحيل أعمل كده!
وجه السكينة عليا فاتوترت وقلت:
-اتقي الله، حرام عليك! أنا عملتلك إيه؟ أذيتك في إيه؟ أنا واحدة يتيمة كبرت على إيد واحد بيكره البنات، أنا عمري ما عشت زي باقي البنات، مكانش ليا أصحاب بسبب جدي، حتى الحاجة الوحيدة اللي اتمنيتها إني أكمل تعليمي جدي حرمني منها.. ودلوقتي إنت جاي تكمل عليا!
-الكلام ده مش هيأثر عليا، هييجي المأذون ونتجوز، وديني يا جواهر لو حاولتي تتكلمي هتندمي.. فهمتي؟!
هزيت رأسي بيأس وأنا حاسة إن الدنيا اسودت في وشي.
تاني يوم جهزت نفسي وركبنا عربية عمر ومشينا للبلد. بعد كام ساعة وصلنا بلدنا، وقفت قدام بيت جدي وأنا بترعش من الخوف. مسك عمر إيدي وقال:
-يالا يا عروسة.
لمحة نيوز
-أنا مبقتش فاهمة حاجة!
-ادخلي وهتفهمي كل حاجة.
جرني وراه وأنا بحاول أفهم فيه إيه.. خطفني وبعدين هددني إني أشتغل معاه وأجبرني إني أتجوزه.. طب ليه؟! معقول هيساوم جدي عشان يطلقني؟! طيب هو يعرف جدي منين؟!
