جواهر
سولييه نصار
أسئلة كتير بتدور في رأسي مش لاقيالها حل.. بس كل ده بسببي.. بسبب غبائي واستهتاري! إزاي عملت كده؟! حتى لو جدي غلطان كنت حاولت أتكلم معاه أو أوصل لحل، بس أنا اخترت الهروب ووثقت في واحد معرفهوش، وده جزائي جزاء تسرعي وطيشي.
عيوني دمعت وعمر بيسحبني لبيت جدي الكبير، حسيت إن خلاص نهايتي قربت، جدي عمره ما هيسامحني على طيشي ده أبدًا.
دخلت بيت جدي وأنا بترعش حطيت عيني في الأرض وغمضتها مش عايزة أشوف حاجة ولا عايزة أسمع حاجة.
-الجد: عملتها يا ابن العلايلي! قدرت تضحك على حفيدتي وتستغلها.. قدرت تقنعها تهرب معاك!
رفعت رأسي وأنا ببص لجدي بدهشة وقلت:
-والله ما حصل، أنا مهربتش معاه!
-طيب بالنسبة لجوازك منه ده يبقى إيه؟!
بصيت لعمر بذهول، لقيته بيبتسم بسخرية! فهمت إن دي خطة أقنع جدي إني هربت معاه واتجوزته! طب ليه؟! وإزاي جدي يعرفه؟!
-أنا مش فاهمة حاجة.
بصلي جدي بخيبة أمل وقالي:
-أنا هفهمك.. الأستاذ المحترم استغلك وضحك عليكي عشان تهربي معاه واتصل بيا وقالي إنكم اتجوزتوا، وكل ده عشان يضغط عليا أديه الأرض بتاعتي اللي عينه عليها.
-لا يا عبد الرحيم بيه، ياريت تقولها الحقيقة.. قولها أنت عملت إيه في أبويا؟! خلي حفيدتك تعرف وشك الحقيقي!
بصيت لجدي وأنا مش فاهمة.. ضحك عمر وقال:
-إيه؟ مش ناوي تقولها يا باشا؟ مش ناوي تخليها تشوف حقيقتك؟ من حق حفيدتك تعرف إن جدها المحترم كان نصاب نصب على أبويا وأخد أرضه وشرده وخلاه يطفش من البلد كلها ويموت بحسرته!
-بصيت لجدي بصدمة وأنا بقوله: صحيح الكلام ده؟! أنت فعلًا عملت كده؟!
مردش جدي.
قرب عمر منه وهو بيقوله بغيظ:
-رد يا باشا حفيدتك بتسألك يالا!
-الجد: أنا منصبتش على حد.. أبوك كان محتاج فلوس وباعلي الأرض والبيت.
-كداب! إنت استغليت حاجته للفلوس وضحكت عليه أخدت منه البيت والأرض بملاليم.. أبويا مات بسببك!
-لا، لحد هنا كفاية.. أنا مليش دعوة بموت أبوك، يعلم ربنا إني مأجبرتهوش على حاجة، هو احتاج فلوس وباعلي أملاكه، لو كنت أعرف إنه هيتشرد بسبب كده ويسيب البلد، مكنتش عملت كده.
-عمر: قدامك فرصة تصلح غلطك.. هات الأرض والبيت وخد حفيدتك.
-الجد: موافق.
بعد ساعة كانت كل حاجة خلصت، عمر أخد حقه وأنا اتطلقت منه. رحت على أوضتي من غير ولا كلمة، اللي عيشته في الأربعة والعشرين ساعة اللي فاتوا كان صعب أوي. كان مفروض أقول لجدي الحقيقة، بس كأن لساني اتربط لمدة طويلة مقدرتش أتكلم.
