جواهر
سولييه نصار
بتجري ليه يا آنسة؟!!.
وقفت فجأة وأنا مخضوضة لما شوفت عربية ملاكي ماشية جمبي وشاب بيكلمني.
-يعني واحدة لابسة فستان فرح وبتجري هتكون بتجري ليه؟ أكيد هربانة من فرحها! إيه الذكاء ده؟
حسيته اتصدم بس مهتمتش بيه ومسكت فستاني وكملت جري.
بالمناسبة اسمي جواهر، بنت بسيطة أهلي ماتوا من وأنا عندي ستاشر سنة وعشت مع جدي. جدي عيشني أسوأ أيام حياتي، بالنسباله البنت مكانها المطبخ، بسببه مكملتش تعليمي، ودلوقتي عايز يجوزني لواحد معرفهوش. ساعتها قررت إن كده كفاية، الموت أهون ولا أتجوز بالطريقة دي؛ قررت أهرب منه وأسافر القاهرة..
لقيت العربية لسه بتمشي ورايا، قلبي وقع لما لقيت العربية وقفت فجأة ونزل منها واحد غريب. رجعت لورا بخوف وأنا بقول برعب:
-عايز إيه يا جدع أنت؟! أبعد وإلا هصوت وألم عليك أمة لا إله إلا الله! ولا عشان شايفني عروسة هربانة هتفتكر إني هخاف!
قرب مني أكتر، ساعتها مقدرتش أسيطر على نفسي وقعدت على الأرض وأنا بلطم وبقول:
-يا رب في اليوم اللي أقدر أهرب فيه من استبداد جدي يطلعلي واحد غريب وعايز يأذيني أو يخطفني، يا رب إيه الحظ ده!!
-يأذيكي ويخطفك إيه؟! إنتي عايزة تلبسيني جريمة!!! أنا شوفتك بتجري في حتة مقطوعة زي دي وشهامتي خلتني أسألك، لكن أنا غلطان صحيح خيرا تعمل شرا تلقى، أنا ماشي، سلام!!
وفعلاً كان هيركب عربيته، قمت ووقفته وأنا بقول:
-استنى يا أستاذ!! أنت إيه مفيش رجولة مفيش نخوة إزاي تسبني في حتة مقطوعة زي دي؟ اعتبرني أختك يا أخي!
-مفيش فايدة!! إنتي مجنونة يا آنسة!!! ما أنا نزلت من عربيتي عشان أساعدك وإنتي هزقتيني!
-ما هو أنا كنت خايفة منك، افتكرتك واحد خطر ومجرم وناوي يعمل فيا حاجة.
اتعصب عليا وقال:
-يا ستي هو ده منظر واحد خطر ولا أسلوب واحد مجرم؟!
-مش بالشكل على فكرة، ياما ناس شكلها محترم وفي الآخر بتطلع عكس كده خالص.
-أيوة، إنتي عايزة إيه دلوقتي؟!
-لو أنت مش مجرم عايزاك تساعدني!
-نفخ وهو متضايق وقال: أساعدك إزاي؟
-عايزاك توصلني محطة الأتوبيس وأنا هتصرف من هناك، مرضيتش آخد تاكسي لأحسن حد يعرفني ويوديني لجدي.. لو سمحت يا أستاذ وصلني وجميلك ده مش هنساه ومستعد أديك فلوس كمان!
-يا ستي فلوس إيه بس؟ اتفضلي اركبي.
ركبت بسرعة عربيته ومن غير تفكير ركب هو جمبي وساق عربيته، وفي الطريق بص عليا وقالي:
