ماسه العمر نداء علي

بسم الله الرحمن الرحيم
لا اله الا انت سبحانك اني كنت من الظالمين
البارت الثالث
نوفيلا ماسة العمر.. نداء علي

مصعب سهران مع اصحابه بيتعشوا في مطعم فخم اتفاجئ ان ماسة قدامه قاعدة مع بنت وولد
كان محتار يروح يكلمها ولا يطنشها
مصعب بيكلم نفسه ومحتار : لو رحت كلمتها ممكن ترد عليا بقلة ذوق وتحرجني؛ ولو مرحتش هتقول متكبر ومكسوف اكلمها.
مصعب فضل باصص عليهم فترة وقرر يعمل الواجب؛ قرب منهم وابتسم وقال :
مساء الخير يا جماعة؛ ازيك يا ماسة…
ماسة اتفاجئت واتكسفت : مساء النور ازيك يا مصعب بيه
مصعب بصدمة : مصعب بيه ازاي يابنتي؛ انتي ناسية اني ابن خالتك؟
كريم اتدخل : اهلا يا فندم اتفضل اقعد
مصعب : متشكر جدا انا مع اصحابي وشاور لكريم علي الطرابيزة بتاعته هو وابراهيم واصحابهم
كريم وقف ورحب بمصعب لما عرف انه قريب ماسة
ماسة بشراسة حاولت تقللها : بس غريبة اوي حضرتك جاي مطعم بسيط زي ده ليه؟
مصعب مكنش واخد باله من طريقة سؤالها فرد عليها بتلقائية
اصحابي قالولي ان اكله نضيف وانا في الاول كنت خايف اكل هنا بس بصراحة لما جربته لقيته ممتاز وافضل من مطاعم راقية وغالية جدا
كريم : احنا معزومين؛ الاستاذة ماسة عزمانا لأن النهاردة كتب كتابنا
مصعب : الف مبروك؛ اسمحيلي بقي يا ماسة اعزمكم انتوا التلاته بالمناسبة دي
ماسة بإصرار : لا طبعا متشكرين لحضرتك.
مصعب فاهم انها هترفض بس صمم لأنه عاوز يكسر الحاجز اللي بينهم ونفسه يخليها تسامحه وتتقبل تتعامل معاه فابتسم بهدوء وقالها : ارجوكي توافقي؛ علشان خاطري
ماسة وشها اتغير وانكسفت لأنه احرجها ولأنها كانت مصممة ترفض طلبه.
ماسة : لو سمحت يا مصعب انا عزماهم لان جوازهم بالنسبة ليا فرحة كبيرة اوي وتستاهل اضحي بفلوسي علشانها
كريم كمل كلامها : اصل احنا بقالنا ٧ سنين مخطوبين
مني : بالظبط؛ قصة كفاح وماسة كانت معانا من اول يوم
مصعب : خلاص انا هدفع تمن العزومة وانتي تجيبلهم هدية بفلوسك ايه رأيك؟
ماسة وافقت لأنها شافت ان دي فرصة تساعد بيها مني ولو بطريقة غير مباشرة
انتهت سهرة مصعب واخد اصحابه ومشيوا وماسة مشيت مع مني وكريم
وصلوا عند البيت وقبل ما تطلع شقتها قالت لمني
خدي ياست مني انا كنت عاملة حسابي ان العزومة ممكن توصل ل ٧٠٠ جنيه والحمد لله اول مرة الواد مصعب يعمل مصلحة ووفر الفلوس
مني بسعادة : ربنا يسعدك يا ماستي كفاية انك فرحتينا وبعدين ماهو ابن خالتك ولولاكي مكنش هيدفعلنا تمن العزومة
ماسة : الفلوس اهي هاتي بيها اللي يعجبك لو في حاجة ناقصة لشقتك هاتيها
مني بدموع : لا طبعا؛ كفاية الفلوس اللي استلفتها منك
ماسة : السلف هتسديهم؛ لكن دول مني ليكي وخلصي علشان اطلع اناااام
مني حضنت ماسة بحب وقالتلها : ربنا يجبر بخاطرك يا ماسة ويسعدك
ماسة بحب : انتي اختي يامني وبعدين نفسي تتجوزي بقي انا تعبت يابنتي من الانتظار؛ ابو شكلك انتي وكريم؛ يلا بقي تصبحي علي خير ياعروسة