عيناك ملاذي ج٣ ساره علي
” استني أعرفك على توليب هانم … لازم تشوفك وتوافق تشغلك ..”
” هي ممكن متوافقش ..؟!”
سألتها تالا بصوت خائف لتقول جنان مطمئنة إياها :
” متقلقيش ، مش هترفض ان شاء الله ..”
سارت الاثنتان سويا حيث توجد السيدة توليب في صالة الجلوس الرئيسية تتناول قهوتها ..
دلفت جنان تتبعها تالا حيث اقتربت جنان من توليب بينما بقيت تالا جامدة في مكانها تشعر بالخوف وعدم الراحة …
تحدثت جنان بصوتها الجاد :
” دي تالا يا توليب هانم ..
تحبي تتكلمي معاها قبل متوافقي تشغليها ..”
اومأت توليب برأسها وهي تشير الى تالا قائلة :
” قربي يا تالا ..”
اقتربت تالا منها بخطوات مترددة ووقفت أمامها لتسألها توليب :
” عندك كام سنه يا تالا ..؟؟”
أجابتها تالا بجدية :
” دخلت فالعشرين …”
” متجوزة..؟!”
تطلعت تالا الى جنان بتردد قبل ان تعاود النظر الى توليب وتهز رأسها ثم تكمل فجاة :
” مؤقتا ..”
” ازاي يعني مؤقتا ..؟!”
سعلت تالا قليلا قبل أن تهمس بخفوت :
” يعني انا هطلب الطلاق ..”
حل الصمت المطلق للحظات قبل ان تهتف توليب بعملية :
” بتعرفي تشتغلي مش كده ..؟!”
أومأت تالا برأسها وقالت بسرعة :
” اكيد … ”
” خديها على الأوضة ترتاح شويه قبل متبتدي شغلها ..”
قالتها توليب لجنات التي نفذت على الفور ما أرادته حيث جذبت تالا من يدها وسحبتها خلفها متجهة بها الى غرفة نومها ليلج أمير بعد لحظات ويقترب منها بنبرة عصبية قائلا :
” انتِ ازاي تسمحي لنفسك تراقبي مراتي ..؟!”
ابتلعت توليب ريقها وقالت بتوتر:
” كنت براقبها عشان أتأكد من سمعتها وإنها مش بتستغلك..”
صاح أمير بإنفعال :
” دي مراتي .. عارفة يعني إيه مراتي ..؟! يعني مش من حق أي حد يعمل معاها كده ..”
” اهدي شوية يا أمير … فيه حاجات مهمة لازم تعرفها بخصوص مراتك .. هي فين صحيح .. ؟!”
قالت جملتها الأخيرة بنبرة ذات مغزى ليجيبها بملامح متجهمة :
” فالبيت طبعا ..”
” متأكد ..؟!”
سألته وهي بالكاد تكتم إيتسامتها الخبيثة ليسألها بفتور :
” انتِ عايزة ايه ..؟؟”
” لحظة ..”
قاطعته وهي تحمل هاتف المنزل وتجري اتصالا بالمطبخ تخبر جنان بجدية :
” ايوه يا جنان .. اعملولنا انا وامير عصير وخلي البنت الجديدة تجيبهولنا .”
صاح أمير بغضــ . ــب :
” عصير ايه وزفت ايه ..؟!”
” اقعد الاول ..”
” مش قاعد وانا هروح حالا بس لازم تعرفي اني لو سمعت انك قربتِ من بيتي او مراتي مش هرحمك ..”
” مراتك التانيه ولا الاولى ..”
صدمه ما قالته بشدة فيبدو أنها تعرف بكل شيء ..
