نهايه الخدمه ج٢ منى السيد
الصوت على الطرف التاني اتبدل لحدة تخلي الدم يتجمد في العروق: — مد إيده عليكي في شقتك؟! هو الجربوع ده نسي نفسه للدرجة دي؟! سلمى، افتحي باب الشقة على آخره ومتدخليش في نقاش معاهم.. القوة اللي كلمتك عنها تحت العمارة أصلاً من عشر دقايق مستنيين إشارتي، وعماد المحامي ومعاه قوة من قسم الدقي طالعينلك في الأسانسير دلوقتي حالا. نفذي ومتقفليش السكة.
الخط فضل مفتوح، وسلمى نزلت الموبايل وبصت لهم في صمت.
سميحة وشها جاب لون الكفن، ولطمت على خدها بصوت مكتوم: — يا مصيبتي السودا! البوليس تحت العمارة بجد؟! قوم يا واد يا حازم، قوم نغور في داهية البت دي شكلها نيتها وحشة وهتودينا ورا الشمس!
حازم اتنتر من مكانه زي الملسوع، وشه غرقان عرق، وراح جاري على باب الشقة يفتحه عشان يتأكد، بس أول ما فتح الباب، لقى قدامه اتنين أمناء شرطة ببدلهم الميري، ووراهم راجل لابس بدلة كحلي شيك وماسك في إيده شنطة سامسونايت ومحافظ أوراق.. كان الأستاذ عماد، المحامي الخاص بالمرحوم المستشار فريد الألفي.
— مساء الخير يا أستاذ حازم — عماد قالها بابتسامة جليدية باردة وهو بيزيح حازم بكتفه ويدخل الصالة كأنه صاحب البيت — كنا نتمنى نتقابل في ظروف أهدى من كدة، بس الواضح إن الأصول مبقتش توكل عيش معاك.
حازم اتراجع لورا ولسانه تقل تماماً: — إيه ده.. إنتوا داخلين بيتي تتهجموا عليا كدة ليه؟! إنتوا معاكم إذن نيابة؟! أنا هشتكيكم لوزارة الداخلية!
أمين الشرطة الكبير بصله من فوق لتحت بقرف وقال بصوت جهوري: — وطي صوتك يا أستاذ وبلاش جعجعة على الفاضي.. إحنا معانا بلاغ رسمي بتعدي وإتلاف وسرقة وتبديد أمانة، وحضرتك في عقار خاص مملكته مسجلة باسم المدام سلمى فريد الألفي، ومعانا أمر رسمي بتمكين المالك وإخلاء الدخلاء، تحب تتفضل بالذوق من غير شوشرة ولا نلبسك الحديد وننزل بيك قدام بوابين وبتوع شارع مصدق كلهم؟
سميحة شهقت شهقة سمعت العمارة كلها، وجريت على حازم تمسك فيه وتستخبى وراه، وعينيها بتلف في الصالة برعب.
عماد المحامي حط الشنطة على الترابيزة وفتحها، وطلع منها دوسيه أحمر مقفول، وبص لحازم وهو بيعدل نضارته الطبية: — بص يا حازم.. عشان منضيعش وقت الباشوات ومنعملكش فضيحة في المنطقة.. إنت قدامك سكتين مالهومش تالت. السكة الأولى: تمضي حالا على إقرار استلام كافة متعلقاتك الشخصية، وإقرار بالتنازل عن أي دعوى زوجية أو شقاق، وتمضي على ورقة طلاق رسمي عند المأذون اللي مستنينا تحت في العربية، وتسلم مفاتيح الشقة ومفاتيح العربية اللي مركونة تحت واللي اتلغى توكيلها رسمي النهاردة الصبح في الشهر العقاري.
