اخطر رجل في القاهره
“أنا على كده هتعلم أصلح العربية بنفسي.”
نوال ما ردتش.
لكن إيدها فضلت ماسكة إيدي.
وفجأة…
لقيت ظل طويل واقف عند الباب.
سكت.
إيدي اتجمدت.
نوال شدت على صوابعي.
الباب اتفتح ببطء.
ورفعِت عيني…
لقيت آسر الجبالي واقف قدامي.
لابس بدلة سودا، وملامحه جامدة، وتحت الجاكت كان باين شكل المسدس اللي شايله.
عينه نزلت على وشي.
وبعدين على إيدي الملفوفة بالمناديل.
محدش فينا اتكلم.
آسر دخل الأوضة بهدوء.
قفل الباب وراه.
ولف المفتاح في القفل.
وبعدين رفع عيني وبصلي مباشرة.
وقال بصوت هادي خلاني أحس بقشعريرة:
“تمانية أيام.”
بلعت ريقي.
كمل:
“أنا كنت بتفرج عليكي بقالِي تمانية أيام.”
قلبي وقع.
لأول مرة فهمت إن الراجل اللي كل الناس في القاهرة بتخاف منه…
كان عارف عني أكتر بكتير مما أنا كنت أعرف عنه.
وكان واضح إن خروجه من غرفة المراقبة ما كانش علشان يسألني عن الجرح.
كان جاي علشان يواجهني في حاجة أخطر بكتير.
حاجة أنا نفسي ما كنتش أعرف إنها حصلت.
#حكايات_شروق_خالد
آسر فضل واقف قدامي ثواني طويلة، لدرجة إني حسيت إن الأوضة نفسها ضاقت علينا.
بصيت لنوال، لقيتها لسه ماسكة إيدي، وكأنها حاسة إن وجوده ممكن يخليني أمشي.
رجعت بصيت له وقلت بصوت واطي:
“أنا… أنا عملت حاجة؟”
آسر ما ردش فورًا.
قرب خطوة.
وبعدين خطوة تانية.
عينه كانت ثابتة عليّا بشكل خلاني مش عارفة أهرب منها.
قال:
“أيوه.”
قلبي دق بسرعة.
“إيه؟”
وقف قدامي مباشرة، وبص على إيدي المجروحة.
“إنتِ عملتي حاجة ما حدش في البيت ده قدر يعملها من شهور.”
استغربت.
“إيه هي؟”
بص لنوال.
كانت قاعدة بهدوء، لأول مرة من غير صراخ أو مقاومة.
وقال:
“خليتي أمي تثق في حد.”
سكت.
وبعدين كمل:
“بس دي مش المشكلة.”
حسيت معدتي اتقبضت.
“أمال إيه؟”
آسر مد إيده في جيب الجاكت وطلع موبايله.
ضغط على الشاشة، ولفه ناحيتي.
كان فيديو من كاميرا المراقبة.
أنا واقفة في المطبخ قبل يومين، وبحط طبق أكل لنوال.
لكن الفيديو وقف عند لحظة معينة.
آسر قال:
“ركزي.”
بصيت للشاشة.
كان فيه راجل غريب واقف عند باب المطبخ.
اتجمدت.
“مين ده؟”
آسر قال:
“ده السؤال اللي كنت مستني إجابته منك.”
هزيت راسي بسرعة.
“أنا ما أعرفوش.”
“متأكدة؟”
“والله ما شفته قبل كده.”
فضل ساكت.
وبعدين شغل جزء تاني من الفيديو.
الراجل كان واقف في ممر القصر، وباصص ناحية كاميرا المراقبة.
