بقعه قهوه كشفت الجريمه ج١ شروق خالد
واضح إنهم حافظين المكان.
وده معناه حاجة واحدة…
في حد من جوه الفيلا سرب لهم كل حاجة.
شد فكه بغضب.
ـ اقفلوا كل المداخل.
ـ اتنفذت.
ـ افتحوا المخزن السفلي.
الحارس اتردد.
ـ يا باشا… المخزن ده…
قاطعه كريم:
ـ نفذ.
خرج الحارس يجري.
بص كريم لسعاد.
ـ مين دول؟
غمضت عينيها للحظة.
ولما فتحتهم قالت بصوت مبحوح:
ـ قبل ما جوزي يموت… كان شغال محاسب عند عصابة كبيرة.
وفي يوم…
اكتشف إن زعيمهم بيهرب آثار من مواني إسكندرية.
احتفظ بنسخة من كل الحسابات.
وأول ما عرفوا…
قتلوه.
كريم سألها:
ـ والنسخة فين؟
سعاد سكتت.
قبل ما ترد…
سمعوا صوت تكسير الباب الخارجي.
واحد من الحراس صرخ:
ـ دخلوا… دخلوا الفيلا!
ملك حضنت كريم أكتر.
وهي بتعيط قالت:
ـ عمو… هما هيقتلونا؟
نزل كريم لمستواها، ومسح دموعها بإيده.
ـ لا يا بطلة.
طالما أنا واقف…
ولا رصاصة هتوصل لك.
في نفس اللحظة…
دخل الحارس تاني وهو بينهج.
ـ يا باشا… في مصيبة.
ـ إيه؟
ـ لقينا واحد من رجالتنا مقتول في غرفة المراقبة.
وكاميرات الفيلا كلها اتقفلت.
كريم فهم فورًا.
الخيانة كانت من داخل البيت.
ولسه قبل ما ينطق…
خرج صوت من سماعات الفيلا كلها، رغم إن الكهرباء كانت مقطوعة.
صوت راجل بيضحك.
وقال ببرود:
ـ مساء الخير يا كريم الدمنهوري…
فات عشرين سنة وإنت فاكر إن أمك ماتت بسبب حادث…
لكن الحقيقة…
اللي قتل أمك…
واقف دلوقتي جوه بيتك.
حكايات شروق خالد
كريم حس إن الدم اتجمد في عروقه.
بص حواليه بسرعة.
الحراس بصوا لبعض في ذهول.
الصوت رجع يتكلم من السماعات:
ـ دور كويس… الخاين عمره ما كان بعيد عنك.
وانقطع الصوت فجأة.
ساد صمت تقيل.
قطع الصمت صوت ملك وهي ماسكة إيد كريم.
ـ عمو… هو مين بيزعق؟
نزل لمستواها، وربت على شعرها.
ـ محدش هيأذيك… أنا معاكي.
بص لرئيس الحراسة.
ـ اقفلوا كل المخارج. محدش يدخل ولا يخرج… حتى رجالتنا.
ـ حاضر يا باشا.
في اللحظة دي، سعاد قالت بصوت ضعيف:
ـ كريم… افتح الدولاب.
بص لها باستغراب.
ـ أي دولاب؟
أشارت ناحية دولاب خشب قديم في ركن الأوضة.
راح ناحيته.
فتحه.
ما لقاش غير هدوم قديمة وبطاطين.
قال:
ـ مفيش حاجة.
قالت:
ـ شيل الرف اللي تحت.
مد إيده، وشال الرف.
ظهر صندوق حديد صغير.
طلعه وحطه على الترابيزة.
كان عليه تراب كأنه متفتحش من سنين.
سعاد طلعت سلسلة من رقبتها، وكان فيها مفتاح صغير.
