بقعه قهوه كشفت الجريمه ج١ شروق خالد
ـ مين اللي قالكم تفتكروا؟
الراجل نزل عينه في الأرض وسكت.
كريم مد إيده، ولف مقبض الباب.
الباب كان مقفول من جوه.
ضربه بكتفه مرة.
ما اتفتحش.
ضربه مرة تانية.
وفي التالتة الباب اتخلع.
دخل بسرعة.
الأوضة كانت ضلمة.
ريحة دوا.
وكوباية مية على الترابيزة جنب السرير.
وصوت أنفاس ضعيفة.
كانت سعاد…
مديرة البيت.
نايمة على السرير، وشها أصفر، وشفايفها ناشفة، وجسمها مولع من السخونية.
قرب منها بسرعة.
ـ يا مدام سعاد…
فتحت عينيها بالعافية.
أول ما شافته حاولت تقوم.
ـ آسفة… والله كنت هقوم الشغل…
وقفها بإيده.
ـ اسكتي.
حط إيده على جبينها.
النار كانت طالعة منه.
لف ناحية الحارس.
ـ هات العربية… حالًا.
الحارس جري.
لكن سعاد مسكت طرف جاكيته.
ـ لا…
بلاش مستشفى.
كريم بص لها باستغراب.
ـ إيه يعني بلاش؟
قالت وهي بتنهج:
ـ لو خرجت…
هيلاقوني.
اتعقد حاجباه.
ـ مين؟
بصت ناحية الباب، كأنها خايفة حد يسمعها.
ـ الناس اللي قتلت جوزي.
ساد الصمت.
ـ إيه اللي بتقوليه؟
دموعها نزلت.
ـ هما فاكرين إن معايا حاجة…
ولو عرفوا إني لسه عايشة…
هيقتلوني أنا وملك.
في اللحظة دي…
رن موبايل كريم.
طلع التليفون.
بص للشاشة.
رقم خاص.
رد بهدوء.
ـ أيوه.
جاله صوت خشن:
ـ واضح إنك فتحت باب كان لازم يفضل مقفول.
وقف كريم مكانه.
ـ مين؟
الرجل ضحك.
ـ ابعد عن الست والبنت…
وإلا هتدفنهم بإيدك.
وقبل ما كريم يرد…
سمع صوت انفجار مدوٍ هز جنينة الفيلا كلها.
الزجاج اتكسر.
والنور قطع.
وبرة…
بدأ الرصاص ينهمر على المكان.
حكايات شروق خالد
دوى الرصاص في المكان بشكل متواصل.
الحراس جَروا ناحية مصدر الضرب، وكل واحد فيهم استخبى ورا عربية أو عمود.
واحد منهم صرخ:
ـ هجوم… اقفلوا البوابة… بسرعة!
كريم خطف ملك من على الأرض، وضمها لصدره.
البنت كانت بترتعش.
دفنت وشها في رقبته وهي بتعيط.
ـ عمو… أنا خايفة.
شد عليها بإيده وقال بهدوء غريب:
ـ طول ما إنتِ معايا… محدش هيقربلك.
بص ناحية سعاد.
كانت بتحاول تقوم، لكن جسمها خانها.
راح لها بسرعة وسندها.
ـ هنخرج من هنا.
قالت وهي بتنهج:
ـ لأ… هيستنوك عند الباب.
في اللحظة دي دخل رئيس الحراسة، ووشه كله تراب.
ـ يا باشا… العربيات اللي برة مولعة.
ـ كام واحد؟
ـ مش أقل من خمستاشر.
كريم بص من الشباك.
شاف رجال لابسين أسود، ووشوشهم مستخبية، بيتحركوا بين الشجر.
