طبق الكرنب وحساب السنين ج٢ نرمين همام

السماعة سكتت نص دقيقة كاملة!

وبعدها انفجر صريخ حماتي:

— “إبراهيم! البت دي عملتلك عمل؟! إزاي تتكلم مع أمك كده؟! أنا ربيتك على الفاضي يا جاحد! استنى عليا، أنا وأبوك نازلينلك دلوقتي وريني هتقول الكلام ده في وشنا إزاي!”

إبراهيم اتنفس بعمق وقال بنبرة أول مرة أسمعها منه:

— “أمي، لو جايين عشان تزعقوا وتعملوا مشكلة، الباب مش هيتفتح. القرار ابلّغ لأبويا، وفكروا وشوفوا هتعملوا إيه.. مع السلامة.”

وقفل الخط في وشها من غير ما يستنى شتيمة تانية!

إيديه كانت بترتعش، بس وشه كان ثابت بشكل مش طبيعي. وسقط على الكنبة وهو بينهج والعرق نازل من جبهته.

قربت منه، ولأول مرة من أيام، مسكت إيده الساقعة الرطبة.

بصلي وعينيه حمر.. وأنا عرفت إن المكالمة دي سحبت كل شجاعته، بس في نفس الوقت، الطفل اللي كان بيستخبى ورا أمه مات، ومكانه ولد راجل حقيقي بيعرف يحمي بيته.

حماتي ما اتصلتش تاني، وما جاتش زي ما هددت.. واضح إن موقف إبراهيم الحاسم خضها وخلا حمايا يفرملها.

مرت الأيام، والمايه بدأت ترجع لمجاريها بالراحة. إبراهيم بدأ يتغير، مش بكلام، بل بأفعال: يرجع في ميعاده، يشيل معيا شغل البيت، ومبقاش يرد على استغلال أهله، وكل حاجة بقت على المكشوف بيننا.

وبعد أسبوعين، حسين سلفي وافق ينزل يشتغل في المحل تحت شروطي!

صديقي المحامي جهز العقود: المحل باسمي (سمر)، وحسين مدير تنفيذي بمرتب 3 آلاف جنيه ونسبة من الأرباح لو المحل كسب، وأي تقصير يحق لي رفصله. حسين جه قعد ووشه في الأرض، ووقع وهو مقهور بس مجبور، وقال وهو مخنوق:

— “أنا هوريكي يا سمر إني مش صايع.”

رديت ببرود:

— “أنا مش عايزاك تثبتلي حاجة يا حسين.. أنا عايزاك تاكل عيش بعرقك وتفكك من شقا أخوك.”

المحل اتأجر في منطقة شعبية شغال فيها صيانة موبايلات وإلكترونيات. الثمانين ألف قسمتها صح: قسط إيجار وتأمين، وقسط توضيب وشراء بضائع، وقسط سيولة للمحل. وإبراهيم كان بينزل معايا ويساعد في التوضيب والإشراف على العمال بكفاءة مهندس محترم، وكنا نشتغل أيد واحدة.

وفي يوم.. رن تليفوني وكان المتصل حمايا:

— “سمر يا بنتي… الحقوا أمك أم إبراهيم، الضغط علي عليها ونقلوها المستشفى!”

إبراهيم كان في اجتماع، بس أول ما عرف اتخض.. قلتله: “أنا جاية معاك.”

بصلي بذهول: “سمر، مش لازم تضغطي على نفسك…”