خطايا بريئه ج٥

طرقات منتظمة على باب الشقة جعلت الصغيرة تهرول تفتح الباب لتجد سيدة تقول من طرف أنفها:

-ماما موجودة يا شاطرة

أجابتها “طمطم” وهي تتطلع لذلك الفراء الثمين التي تضعه على ذراعيها بأنبهار تام:

-ايوة ثوانِ وانديهالك… هو ده فرو أيه ده حلو اوي

صدر سؤالها عفوي للغاية وببراءة كانت تتلمس بأناملها الصغيرة ملمسه مما جعل الأخرى تنفض يدها بقرف وتأمرها بشمئزاز:

-أففف ابعدي ايدك هتوسخيه وروحي نادي امك وخلصيني

-مين يا “طمطم” على الباب

قالتها “شهد” وهي تخرج من المطبخ وتحمل بيدها مغرفة الطعام التي كانت تعده لتوها وما أن اقتربت فغر فاهها واتسعت عيناها عندما علمت هويتها وهمست بشدوه:

-“دعاء”

حانت من الأخرى بسمة متعجرفة وهي ترشقها بتدني واضح وقالت بنبرة تحمل التحذير بين طياتها:

-أه “دعاء ” مش هتقوليلي اتفضلي يا “شهد” متهيئلي في عندي كلام مهم لازم تسمعيه… ده لو عايزة مصلحة أخوكِ.
————————–

🦋الثالث والعشرون🦋
ليس كل شيء في القلب يقال، لذلك خلق الله التنهيدة، الدموع، النوم الطويل، الإبتسامة الباردة، ورجف اليدين.”

– نزار قباني
—————–
-هو ده أخر المعروف يا هانم أنتِ واخوكِ

قالتها “دعاء” بنزق بعدما استقبلتها “شهد” وادخلتها تجلس بردهة منزلها.

عقدت “شهد” حاجبيها وردت مستفهمة:

-قصدك إيه يا “دعاء” تعالي دوغري أنا لا بحب اللف ولا الدوران

أجابتها “دعاء” بغيظ:

-أنتِ عارفة أنا بتكلم عن ايه…

تنهدت “شهد” وضربت على قدميها قائلة بنفاذ صبر:

-اللهم ما طولك يا روح ما تخلصي يا “دعاء” وتقوليلي سر الزيارة الغريبة وايه الكلام المهم اللي عايزة تقوليه؟

أجابتها “دعاء” بنظرة تحمل خبث مقيت:

-أخوكِ لافف على بنت جوزي و فاكرها هبلة وهيعرف يضحك عليها وياخد فلوسها بس انا عمري ما هسمحله بده

شهقت “شهد” وأردفت بدفاع قوي وهي تلوح بيدها:

-نعم قِرشين أيه اللي اخويا طمعان فيهم ….حَد الله يا حبيبتي بينا وبين فلوسكم

قلبت “دعاء” عيناها وتأففت قائلة:

-أففف أيه الحركات البلدي دي يا “شهد” هو انتِ مش هتتغيري ابدًا

-وايه اللي يغيرني إن شاء الله هو في حد بيتبرى من أصله وبعدين يا تتكلمي كلام عدل يا متتكلميش

قلبت “دعاء” عيناها من تلميحاتها التي تتفهم المغزى منها وردت بمسايرة:

– أنتِ اتحمقتي ليه كده هي ملهاش تفسير تاني تقدري تقوليلي واحد زيه هيبقى عايز أيه من واحدة زيها غير الفلوس