بيت اهلي ج٢ صافي هاني
كل حاجة كانت بتتركب قدام عيني
أبويا قال
يعني العربية ماكنتش أول حاجة
باسم نزل راسه
وقال
لا
دي كانت آخر محاولة
أنا فتحت شنطتي بسرعة
طلعت الملف اللي كنت شايله معايا من سنين
وحطيته قدام الظابط
قلتله
الملف ده فيه كل التحويلات والإيصالات اللي كانت بتخرج من حسابي
وفيه صور للمحادثات اللي كان بيطلب فيها مني فلوس
وفيه كشف حساب آخر سنتين
الظابط أخده وقلب فيه كام صفحة
وبعدين رفع عينه ناحية باسم
وقال
واضح إن الموضوع محتاج مراجعة كاملة
في اللحظة دي رن موبايل باسم
بص للشاشة واتجمد
حاول يقفل المكالمة
لكن الظابط قال
رد
يمكن تكون ليها علاقة بالموضوع
باسم فتح الخط وحط الموبايل على ودنه
وفجأة سمعنا صوت راجل بيقول بعصبية
إنت فين
الشيكات كلها اترفضت
والبنك جمد الحساب
ولو الفلوس مادخلتش النهارده إحنا جايين ناخد كل الضمانات اللي قدمتها
باسم حاول يوطي صوت الموبايل بسرعة
لكن كان فات الأوان
كل اللي واقفين سمعوا الجملة الأخيرة
“وأول حاجة هنحجز عليها… العربية.”
ساعتها بصيت لأبويا
ولأول مرة فهمت إن باسم ماكانش بيحاول ياخد عربيتي علشان أمه…
كان بيحاول ينقذ نفسه من كارثة مالية أكبر بكتير، ولسه ماعرفناش حجمها الحقيقي.فضل المكان ساكت كام ثانية
باسم كان باصص في الأرض ومش قادر يرفع عينه
أبويا قال بهدوء
يعني الحقيقة بدأت تظهر
مش موضوع أمك
ولا موضوع احتياجها للعربية
إنت كنت بتحاول تنقذ نفسك على حساب بنتي
باسم رفع عينه وقال بسرعة
والله كنت هقولها
بس كل مرة كنت بخاف
قلت لما المشروع يكسب هرجع كل حاجة وكأنها ماحصلتش
قلتله وأنا دموعي بتنزل
والمشروع ده اسمه إيه
سكت
الظابط كرر السؤال
اسم الشركة
باسم قال بعد تردد
شركة استيراد
دفعت فيها كل اللي معايا
واستلفت من صحابي
وبعدين خسرت
لكن أخويا طلع موبايله وقال
استنى كده
أنا أعرف واحد في السجل التجاري
قالي من أسبوع إن الشركة دي مقفولة بقالها شهور
