بيت اهلي ج٢ صافي هاني
رفع عينه ناحية باسم
وقال
آخر مرة سألك
إيه حكاية الورق ده
باسم فضل ساكت
ثانية
واتنين
وثلاثة
وفجأة قال
أنا…
لكن قبل ما يكمل
سمعنا صوت ست بتجري وهي بتصرخ من آخر الممر
كانت حماتي
وشها كله دموع
وجريت ناحيتنا وهي بتقول
بلاش يخبي أكتر من كده
أنا هقول الحقيقة كلها
أنا اللي طلبت منه يعمل العقود…
وساعتها باسم لف ناحيتها بصدمة وهو بيزعق
إنتي بتعملي إيه يا أمي…!حماتي وقفت مكانها وهي بتنهج من كتر الجري
وبصتلي لأول مرة من غير تكبر
وقالت بصوت كله ارتباك
أنا غلطت… بس اللي حصل أكبر من العربية
باسم قرب منها وهو بيحاول يسكتها
وقال من بين سنانه
ولا كلمة زيادة
لكن الظابط وقف بينهم وقال
سيبها تتكلم
لو في حاجة هتتقال يبقى قدام الكل
حماتي قعدت على أول كرسي وهي بتمسح دموعها
وقالت
أنا فعلًا كنت عايزة العربية
بس باسم هو اللي قالي إن الموضوع سهل
قالي هنعمل كام ورقة مؤقتة لحد ما جنا توافق
ولما توافق نمزقهم
أنا صدقته
بصيت لباسم وأنا مش مصدقة
قلتله
يعني كنت ناوي تنقل العربية من ورا ضهري
هز راسه بعصبية
وقال
لا… إنتي فاهمة غلط
أبويا رد لأول مرة بنبرة حادة
فاهمين غلط إيه
دي أوراق قدامنا
والتوقيع مزور
باسم بدأ يتوتر أكتر
وقال
أنا كنت مضغوط
وعندي ديون
ولازم أجيب فلوس بسرعة
وأمي كانت محتاجة العربية
وأنا قلت لما الدنيا تتحل هرجع كل حاجة
سألته
ديون إيه
إنت كنت كل شهر بتقولي إن شغلك ممتاز
وسافرت مرتين في السنة اللي فاتت
وجبت موبايل جديد وساعة غالية
الفلوس راحت فين
سكت
أخويا قال
رد
راحوا فين
باسم أخيرًا قال بصوت واطي
دخلت في شراكة
وخسرت
وأخدت قروض
وبقيت كل شهر أسدد من فلوس جنا من غير ما تعرف
أنا حسيت إن الأرض بتميد بيا
افتكرت التحويلات البنكية
وافتكرت الإيصالات اللي كنت مخبياها
وافتكرت كل مرة كان يقنعني إني ناسية أو فاهمة غلط
