بيت اهلي ج٢ صافي هاني
باسم جري على الراجل وقال بسرعة
أكيد في حاجة غلطش
العربية دي مافيهاش أي حاجة
الراجل بصله وقال
إحنا مانعرفش التفاصيل كلها
اللي بلغنا إن الكمين طلب حضور المالكة لأن في حاجة محتاجة تتراجع
أبويا بصلي وقال
يلا يا جنا
أنا هاجي معاكي
باسم حاول يمنعنا
استنوا لما أفهم الأول
لكن أبويا قال بمنتهى الحزم
مفيش حاجة اسمها تستنى
العربية باسم بنتي
ولازم هي اللي تعرف كل حاجة
بعد نص ساعة كنا واقفين في ساحة المرور
العربية كانت واقفة بعيد شوية
ولما شفتها حسيت بوجع في قلبي
دي أول عربية امتلكها في حياتي
كنت كل يوم أمسحها بإيدي
وأفرح وأنا بسوقها
وفجأة بقيت واقفة كأنها غريبة عني
ظابط المرور سلم على أبويا باحترام
وبعدين بصلي وقال
حضرتك الأستاذة جنا
هزيت راسي
فتح شنطة العربية قدامنا
طلعت فيها شنط هدوم
وأكياس أكل
وكرتونة أدوات مطبخ
كلهم تبع حماتي
باسم تنفس الصعداء
وقال
أهو… قلتلكم مفيش حاجة
لكن الظابط ماقفلش الشنطة
شال الكرتونة الكبيرة اللي كانت في الآخر
وتحتها طلع ظرف بني سميك
وقال
هو ده اللي خلانا نطلب صاحبة العربية
أنا اتفاجئت
عمري ما شفت الظرف ده
الظابط فتحه قدامي
كان مليان أوراق
وأول ورقة ظهرت خلت باسم يرجع خطوة لورا
كانت عقد بيع ابتدائي
باسمي
بس التوقيع اللي عليه ماكنش توقيعي
إيدي بدأت ترتعش
قلبت الورقة
ولقيت عقد تاني
وبعدين توكيل
وبعدين استمارات نقل ملكية
كلها باسمي
وكلها متزور فيها توقيعي
باسم بقى بيعرق
وقال بسرعة
أنا معرفش الورق ده جه إزاي
حماتي كانت واقفة بعيد
ولما شافت العقود نزلت عينيها في الأرض
الظابط قال
واضح إن كان في محاولة لنقل ملكية العربية
بس الإجراءات وقفت لأن البيانات ماكملتش
أبويا مد إيده وأخد ورقة
وبص للتوقيع ثواني
وبعدين بصلي
وقال
إنتي عمرك مضيتي على أي ورقة من دي
قلت بثقة
والله العظيم لأ
