خدمه حياتي المزيفه انجي الخطيب
قلت لها بهدوء معلش، بس أنا ماطلبتش حد ييجي، ومحمود ماقالليش إن فيه حد جاي. ابتسامتها اختفت للحظة، وبعدها قالت يا حبيبتي، إنتِ لسه والدة، ومش في حالتك اللي تسمحلك تقرري كل حاجة لوحدك. حماتك أدرى بمصلحتك، وهي اللي طلبت مني أجي.
الكلمة الأخيرة وقعت على قلبي زي الحجر. مش في حالتي اللي تسمحلي أقرر؟ بصيتلها وقلت أنا تعبانة، آه، لكن واعية وفاهمة كويس. ولو فيه أي حاجة تخص ابني، لازم أبوه يكون عارف بيها. سحر قفلت الشنطة اللي كانت بتحطها على الكنبة، وقالت بنبرة مختلفة تمامًا بصي يا مدام ندى، أنا مش جاية أعمل مشكلة، لكن حماتك قالتلي إنك ممكن تعترضي في الأول، وإنك محتاجة حد ياخد منك البيبي فترة لحد ما تتعافي.
حسيت إن الأرض بتلف بيا. ياخد مني ابني؟! حاولت أرفع صوتي، لكن الچرح وجعني، فمسكت بطني واتكلمت بصعوبة مين قالك إني موافقة على الكلام ده؟ ابني مشي أي مكان! سحر رفعت إيديها بسرعة وقالت اهدي، اهدي، أنا ماقولتش هيتاخد ڠصب عنك، أنا بقول إن ده اتفاق مبدئي، وحماتك هتفهمك كل حاجة.
اتفاق مع مين؟ وإيه الاتفاق ده أصلًا؟ قبل ما ترد، سمعنا صوت مفتاح بيتحط في الباب. سحر بصت ناحية المدخل، ووشها اتغير. أما أنا، فكنت متأكدة إن اللي جاي مش هيكون مجرد زيارة عادية. الباب اتفتح، ودخلت حماتي.
أول ما شافت سحر واقفة قدامي، بصتلها بحدة وقالت إنتِ عملتي إيه هنا؟ مش قلتلك تستني لما أكلمك؟ سحر ردت بتوتر أنا جيت زي ما اتفقنا، وكنت لسه بشرحلها. حماتي بصتلي، ولما لقتني واقفة قدامهم، اتنهدت بضيق وقالت يا سلام!
هو أنا مش هعرف أعمل حاجة من غير ما تقفيلي فيها؟ بصيتلها بذهول. أقفلك في إيه يا ماما؟ دي ست جاية تقول إنها هتاخد ابني مني! حماتي اتجمدت لحظة، وبعدها بصت لسحر وقالت إنتِ قلتي لها كده؟ سحر بدأت تتلجلج أنا… أنا كنت بحاول أوضحلها إننا ممكن نساعدها شوية.
حماتي قربت مني وقالت بصي يا ندى، إنتِ فاهمة الموضوع غلط. الست دي جاية تساعدك، مش أكتر. إنتِ بقالك كام يوم قاعدة في السرير، ومش قادرة حتى تهتمي بنفسك، والولد طول اليوم بيعيط. أنا خاېفة عليه، مش أكتر. حسيت بدموعي بتتجمع في عيني، لكن المرة دي ماكنتش دموع ضعف.
كانت دموع ڠضب. أنا مش قادرة أهتم بنفسي عشان لسه عاملة عملية كبيرة، ومحتاجة أتعافى! ولو ابني بيعيط، فده لأنه جعان ومحتاج يرضع، مش لأن أمه مش عارفة تهتم بيه! حماتي ضحكت بسخرية وقالت أهو إنتِ بنفسك بتقولي إنك مش قادرة ترضعيه كويس!
