رفضت ادى مرات بابا فستان زفاف ماما

رفضت أدي مرات بابا فستان فرح ماما بعد ما عدلته من ورايا…

أنا عندي 25 سنة مامتي اتوفت وأنا عندي 16 سنة. أغلى حاجة سابتهالي أمي كانت فستان فرحها القديم. الفستان بقاله سنين محطوط عندي في كيس مخصص لحفظ الفساتين جوه دولابي و كنت مخطعامله حسابي إني ألبسه يوم فرحي.

بابا اتجوز واحدة تانية اسمها كارين عندها 48 سنة من حوالي أربع سنين.
كارين عندها بنت اسمها ليلي عندها 23 سنة واتخطبت من فترة قريبة.
الشهر اللي فات كارين عرضت إنها تاخد فستان أمي لمحل متخصص وغالي علشان يتنضف ويتجدد شوية وتقول إنها حابة تعمل معايا حاجة حلوة أنا حسيت إن دي لفتة لطيفة منها ووافقت واديتها الفستان.

عدى أسبوعين وكل مرة أسأل كارين الفستان خلص ولا لأ كانت تتهرب من الإجابة أو تقول إن محل التنظيف محتاج وقت زيادة.
امبارح روحت بيت بابا من غير ما أقولهم علشان أسلمهم جواب كان وصل عندي أول ما دخلت الصالة لقيت ليلي واقفة قدامي لابسة فستان أمي.

بس الفستان ماكانش فستان أمي اللي أنا أعرفه.
كارين كانت أخدته عند ترزي وقامت فكت الدانتيل اللي كان في ضهره بالكامل وقصت الأكمام الطويلة وحولته لفستان بحمالات ومنطقة صدر على شكل قلب وشالت ذيل الفستان خالص علشان يناسب طول ليلي وذوقها.

أنا حرفيًا كنت هقع من طولي من الصدمه كارين بصتلي بكل بجاحة وقالتلي

أوه كنا عايزين نفاجئك ليلي حبت قماش الحرير جدًا وبصراحة إنتِ لسه حتى مش مخطوبة فقلنا مالوش لازمة القماش الحلو ده يفضل مركون من غير استخدام.
أنا اتعصبت جدا وقلت لليلي تقلع الفستان فورًا.
أول ما قلعته أخدت الفستان منها وحطيته في العربية وقفلت عليه.

كارين بدأت تزعق وتقول إني مكبرة الموضوع بشكل اوفر وإن القصات اتعملت خلاص وإن الفستان دلوقتي متفصل على مقاس ليلي وإن كوني أخده منها مش هيكون غير مجرد انتقام مني.
ليلي دلوقتي قاعدة بتعيط لأن معاد بروفتها اتلخبط وباظ .

وبابا كلمني امبارح بالليل وفضل يتحايل عليا إني أسيب الفستان لليلي وقال إنه ممكن يشتريلي فستان فرح جديد لما ييجي وقت جوازي وقالي
اللي حصل حصل وإنتِ كده بتبوظي فرح أختك علشان حتة قماش أصلًا مبقتش مناسبة لمقاسك.

قلت لهم كلهم يبعدوا عني وحطيت الفستان البايظ تاني في دولابي وقلت لهم إنهم بالنسبالي انتهوا لو مش هيدفعو تكلفة إرجاع الفستان لحالته الأصلية لو كان ده ممكن أصلًا.
دلوقتي كل قرايبي تقريبًا بعتولي وبيقولوا إني قاسية وإن مفيش داعي إني أحتفظ بفستان أنا أصلًا مش قادرة ألبسه بحالته الحالية لمجرد إني أعاقب عروسة.