غدر الزوج ج١ منال علي

وقفـت قـدام بابي مسـتغربة… بـس الصـدمة الحـقيقية ماكـنتش في السـت، كـانت في اللـي خـلاها تتـكلم بثـقة كده!!! وقفت يمنى على باب شقتها، متسمرة في مكانها، وعيونها مش مصدقة اللي شايفاه. قدامها كانت واقفة ست غريبة، في أوائل التلاتينات، لامة شعرها ديل حصان بسيط، ومن وراها بيطل طفلين، ولد وبنت، بيبصوا ليمنى بفضول واستغراب كأنها هي اللي غريبة عن المكان. حصري علي روايات واقتباسات في الطرقة كانت مرمية شباشب مش بتاعتها، وعلى الشماعة جواكت غريبة، ومن المطبخ طالعة ريحة طبيخ مالية المكان. أيوة.. حضرتك مين؟ الست سألت وهي بتكشر، وشدت بنتها الصغيرة ناحيتها بحذر. إحنا عايشين هنا، الأستاذ جمال هو اللي جابنا.. قالنا إن صاحبة الشقة موافقة ومش ممانعة خالص. دي شقتي أنا! صوت يمنى كان بيترعش من القهر والذهول. وأنا مأذنتش لأي حد يسكن هنا أبداً! الست ارتبكت، وبدأت تبص حواليها بتوتر. شافت اللعب اللي مرمية في كل حتة، والمطبخ اللي فيه هدوم أطفال منشورة بتنشف، كأنها بتدور في التفاصيل دي على حقها في البيت. بس الأستاذ جمال قالي.. ده إحنا قرايبه.. قال إنك مش هتمانعي، وإنك ست طيبة وقلبك كبير وبتفهمي في الأصول. يمنى حست بوجع وكأن حد رمى في وشها جردل مية تلج. قفلت الباب ببطء وسندت ضهرها عليه، وهي بتحاول تستوعب اللي بيحصل. بيتها، خصوصيتها، تعب سنينها.. فجأة لقت نفسها فيه غريبة! من سنة واحدة بس، الدنيا كانت غير كده خالص. يمنى كانت بتقضي أجازتها على البحر، بتفصل من ضغط الشغل بعد ما خلصت مشروع ضخم لترميم عمارة أثرية في وسط القاهرة. في سن الـ ٣٤، يمنى كانت مهندسة ديكور ناجحة، شاطرة، ومعتمدة على نفسها تماماً. كاريرها كان واخد كل وقتها، ومكنتش بتشتكي؛ لأن الشغل كان بيديها ثقة واستقرار مادي ونفسي. قابلت جمال على الكورنيش في ليلة صيف زحمة. كان راجل جذاب، أكبر منها بكثير، ضحكته دافية وعيونه فيها لمعة اهتمام. مطلق من تلات سنين، وعنده طفلين، ولد عنده عشر سنين وبنت سبع سنين، وبيشتغل مقاول في شركة إنشاءات كبيرة. جمال عرف يلف يمنى بأسلوبه الشيك والقديم. ورد كل يوم، عشا في مطاعم هادية، وتمشية بالساعات تحت النجوم. إنتي مفيش زيك. كان بيقولها ذكية، قوية، وشخصيتك مالية مكانك. #حكايات_منــال_عـلـي أنا بقالي كتير مشفتش ست متكاملة كده.. عارفة هي عايزة إيه من الدنيا. يمنى دابت في كلامه واهتمامه. بعد تجارب فاشلة مع رجالة كانوا بيخافوا من نجاحها أو بيحاولوا يكسروا مقاديفها، جمال كان بالنسبة لها عوض من ربنا. كان بيحترم شغلها، ويسمع لمشاكلها مع العملاء، ويدعمها في كل خطوة. بيعجبني فيكي إنك قوية، بس في نفس الوقت رقيقة وكلك أنوثة وحنية. الأجازة خلصت بس الحكاية كملت. جمال بقى يروح لها القاهرة، وهي تروح له السويس. مكالمات فيديو، رسايل طول الليل، وأحلام بتتبني. بعد تمان شهور، عرض عليها الجواز في نفس المكان اللي اتقابلوا فيه. الفرح كان بسيط وشيك.#حكايات_منــال_عـلـي يمنى نقلت السويس عشان تكون مع جوزها، واشتغلت في مكتب هندسي هناك، وسابت شقتها في القاهرة مقفولة. إحنا خلاص بقينا عيلة واحدة. قالها . ولادي هما ولادك، ومشاكلي هي مشاكلك.. إحنا ضهر لبعض. في الأول، يمنى كانت طايرة من الفرحة. كانت مستمتعة بجو العيلة والدفا وصوت الأطفال في البيت. كانت بتساعد جمال في كل حاجة تخص ولاده، بتجيب لهم هدايا، بتقدم لهم في أحسن النوادي، وبتكشف عليهم عند أحسن الدكاترة على حسابها. لكن بالتدريج، الميزان بدأ يختل. بدأت بحاجات بسيطة. جمال يسحب مبالغ من الكارت بتاعها من غير ما يقول. معلش يا حبيبتي، نسيت أقولك، كنت محتاجهم ضروري. ده كان رده لما تسأله عن الخصومات اللي بتوصلها في رسايل البنك. بعد كده، بدأ يطلب منها تساعده في نفقة طليقته. معلش يا يمنى، إنتي عارفة الظروف.. الولاد ملهمش ذنب إن أبوهم الشغل معاه مريح الشهر ده. الشركة مأخرة المرتبات وأنا مش عايز أقصر معاهم. يمنى كانت بتوافق بحسن نية وحب. هي بتحب جمال، واتعلقت بولاده فعلاً. بس الطلبات مبقتش تخلص، وبقت تكبر كل مرة عن اللي قبلها. مصاريف سفر الولاد للمصيف مع جدتهم، هدوم الشتا، دروس الرياضة، ومدرسين الخصوصي.. كله بقى على نوتة يمنى. والأصعب، إن جمال بدأ يحول فلوس لطليقته من موبايل يمنى ومن حسابها مباشرة، ومن غير حتى ما يفتح معاها الموضوع. دول ولادنا يا يمنى! كان بيبرر بغضب لما بتعترض. إنتي مش بتقولي إنك بتحبيهم؟ وبعدين إنتي مرتبك أكبر من مرتبي بكتير، هي يعني الفلوس هتغلى عليكي؟ الموضوع مش موضوع غالية أو رخيصة. كانت بترد بهدوء بيحاول يخبي وجعها. دي فلوسي وتعبي، وكان المفروض تحترمني وتستأذنني الأول. طبعاً، طبعاً.. المرة الجاية هقولك. بس المرة الجاية كانت نسخة من اللي قبلها. يمنى بدأت تحس إنها مش زوجة وشريكة حياة. هي مجرد ماكينة فلوس متحركة. رأيها ملوش قيمة، وقراراتها بتتجاهل، ولما بتحاول تتكلم في ميزانية البيت، جمال بيقلب الترابيزة عليها ويتهمها بالجحود والأنانية، وإنها مش وش نعمة ولا عيلة. أنا كنت فاكرك غير كده. كان بيقول بمرارة مصطنعة. كنت فاكر إن الفلوس آخر حاجة تهمك.. أتاري القشرة بس هي اللي حلوة. وهنا، وقفت يمنى قدام باب شقتها في القاهرة، بتكتشف إن جمال مش بس استنزف مشاعرها وفلوسها. ده كمان استباح بيتها اللي هو مملكتها الخاصة، وفتحه لناس متعرفهمش.. من غير حتى ما يرفع عليها سماعة التليفون. يتبع.......

مقالات ذات صلة

انتقام اثم

وصيه جدي ج١ منى السيد

ليله فرحي جوزي مسك المايك

عزال عروسه سلفي ج٣ منى السيد

قبل خطوبتي ج1 زهره

المراه المسنه

اترك تعليقاً إلغاء الرد