غلطه بنك
افتكرت شروق في اللحظة دي إن الإشعار ممكن يكون مجرد غلطة من البنك لكن أول ما فتحت التطبيق حسّت إن قلبها وقع في رجليها مكتوب قدامها محاولة سحب بمبلغ ستة وتسعين ألف جنيه من حسابها عن طريق ماكينة صراف آلي واترفضت العملية بسبب إدخال الرقم السري بشكل غلط أكتر من مرة
بصت للشاشة وهي مش مستوعبة
الحساب ده محدش يعرفه غيرها
وفجأة افتكرت
كريم
افتكرت اليوم اللي كانت واقفة فيه بتشتري جهاز جديد للشقة وكارتها كان واقف فادتهولها وقال لها بابتسامة
قوليلي الرقم السري بسرعة عشان الطابور طويل
ومن ساعتها عمرها ما غيرته
إيديها بدأت ترتعش وهي كلمت خدمة العملاء
لو سمحتوا اقفلوا كل الكروت دلوقتي
الموظف نفذ الطلب في أقل من دقيقة وقال لها إن فيه تلات محاولات سحب حصلوا من ماكينة في مدينة نصر وكلهم اترفضوا
شروق قفلت المكالمة وهي حاسة إن جسمها بارد
يعني كريم أول ما دخل الشقة وملقهاش بدل ما يقلق عليها جري على فلوسها
أما في الشقة
كان كريم بيقلب المكان زي المجنون
ندى كانت ماشية وراه وهي بتزعق
هي راحت فين
رد بعصبية
مش مهم دلوقتي
طلعي الكارت
قالت
أنا بدور أهو
فتح الأدراج
كسر شماعة الدولاب
قلب المخدات
لكن الكارت اختفى
وفجأة لمح المحضر والدبلة فوق السفرة
مسك الورقة وقراها
وشه اصفر
ندى خطفتها من إيده
إيه ده
دي بلغت عنك
قال من بين سنانه
هتندم
في نفس اللحظة رن موبايله
كان صاحبه سامح
إيه يا كريم هو إيه اللي حصل سمعت إن البوليس كان عندك
اتوتر وقال بسرعة
ولا حاجة سوء تفاهم
لكن سامح رد
يا ابني البواب شافهم وهما خارجين مع مراتك
قفل كريم المكالمة وهو حاسس لأول مرة إن الأمور خرجت من إيده
في اليوم التاني شروق راحت الشركة
مديرها أول ما شاف الحرق وقف مصدوم
مين اللي عمل فيكي كده
كانت أول مرة متكدبش
قالت
جوزي
السكوت اللي حصل بعدها كان تقيل
المدير طلب منها تقعد وحكى لها إن الشركة عندها محامي يقدر يساعدها لو احتاجت
ولأول مرة من سنين شروق حسّت إن حد واقف في ضهرها
بعد الضهر راحت القسم عشان تكمل الإجراءات
الضابط كان بيبص في التقرير الطبي وقال
الحرق واضح ومثبت
والمحضر قوي
بس أهم حاجة متتنازليش
هزت راسها وقالت
مش هتنازل
وأثناء كلامهم دخل عسكري وقال
يا فندم الشخص المطلوب موجود بره
دخل كريم وهو لابس نضارة سودا ووشه مليان ثقة مزيفة
أول ما شاف شروق ابتسم ابتسامة مستفزة
