طردوه من الفندق ج٢ صافي هاني
إبراهيم ابتسم وعينيه لمعت بالدموع، بس كانت دموع راحة: “لأ يا حبيبتي، الورد ده عمل واجبه وزيادة الليلة دي.. وصحى قلوب ناس كتير. تعالي ننزل تحت، هخليكي تكتبي بنفسك الورد الجديد اللي هيملى المكان كله.”
المشهد الأخير.. بداية عهد جديد
الساعة بقت سبعة الصبح. صالة الاستقبال في “جراند ريجنسي” كانت بتلمع تحت ضوء الشمس اللي داخل من الواجهات الزجاجية.
عند مكتب الريسبشن، كان المشهد يدرس. نيرمين ورانيا كانوا واقفين، بس المرة دي لابسين اليونيفورم النبيتي بتاع قسم النظافة، وشعرهم ملموم، وماسكين الفوط والمساحات والكسرة مالية عينيهم. وقدامهم كانت واقفة الست أمينة، ليرفكت ببدلة فورمال شيك جداً، والبادج الدهبي الجديد منور صدرها: “الحجة أمينة – مديرة جودة الضيافة”.
أمينة كانت بتتكلم معاهم بلهجة صارمة بس من غير قسوة: “هنا في الفندق ده، الضيف اللي بيدخل بجاكيته المقشر بنشيله فوق راسنا قبل اللي داخل ببدلته.. اللبس بيتغير في ثانية، بس الأصل مبيتغيرش. يلا على الشغل.”
في اللحظة دي، باب الأسانسير اتفتح. خرج منه إبراهيم منصور، لابس قميص أبيض نضيف وبنطلون أسود، ودقنه محلوقة، ووشه منور. وفي إيده اليمين كانت ليلى بتتنطط بفرحة وهي لابسة فستانها الملون، وفي إيده الشمال الشنطة القديمة.
الكل وقف انتباه باحترام شديد. إبراهيم مشي بخطوات ثابتة، وبص للست أمينة وهز رأسه بابتسامة فخر، والست أمينة ردت له الابتسامة بدعوة صامتة من قلبها.
قبل ما يوصل للباب الخارجي، ليلى وقفته وشدت إيده: “بابا.. بص!”
إبراهيم التفت.. لقى على مكتب الاستقبال، في نفس الحتة اللي البنتين أهانوه فيها بالليل، فازة كريستال ضخمة ومحطوط فيها بوكيه ورد أحمر بلدي، لسه مفتح وعليه نقط الندى، وريحته مالية المكان كله.. بوكيه كان حازم بيه جابه مخصوص بأمر من الإدارة أول ما المحلات فتحت.
ليلى جريت على الفازة، سحبت وردة حمراء وراحت جِريت على أبوها، حطتها في جيب قميصه اللي ناحية قلبه وقالتله بضحكة رنت في الصالة كلها:
“دي عشانك يا أحلى بابا في الدنيا.. وعشان ماما تفضل شيفاك فرحان.”
إبراهيم وطى، شالها ورفعها لفوق، وبص للورد وبص لبنته، وحس لأول مرة من تلات سنين إن الشمس طلعت بجد.. أخد بنته في حضنه، وخرج بيها لباب الفندق، وساب وراه الماضي بكل آلامه، وبدأ خطوته الأولى في المستقبل الجديد.
