كفايه طيبه ج٢ منال علي

لكن بعد كل نوبة شوق، كنت بفتح الموبايل وأقرا رسايل الجروب تاني. كنت بقف عند جملته: *”هي بتهلل وتعارض في الأول بس في الآخر بتنزل على مفيش وبتعمل كل اللي بطلبه منها”.* الجملة دي بالذات كانت عاملة زي المطهر اللي بيتحط على الجرح؛ بتوجع وتشوط، بس بتصحيني من الوهم وبتشفي قلبي من أي حنين.

المحاكم وجلسات الطلاق كانت ناشفة ومليانة غل. أحمد حاول يرفع قضية “نشوز وطاعة” وادعى إني “سيبت بيت الزوجية وهربت”. بس الأستاذة نهاد الشافعي ردت بضربة قاضية؛ قدمت اسكرين شوتس من جروب الواتساب، كشوفات حساباتي البنكية اللي بتثبت إني أنا اللي شايلة البيت، وإنذار المحضر اللي بيثبت إنه كان جاي يقتحم الخصوصية ويسكن عشرات البشر في بيتي بدون موافقتي.بقلم منــال عــلي

وهناك في المحكمة، بدأت تظهر بلاوي تانية ماكنتش عارفاها؛ فيزا كارد إضافية كان بيستخدمها لمصاريف أمه، تحويلات شهرية لحساب الحجة كريمة كان بيكتبها في دفاتر البيت تحت بند “مصاريف صيانة وأمن الكومباوند”، وقروض بيديها لقرايبه من الفلوس اللي كنا بنحوشها سوا من غير ما يبلغني. كل حاجة لوحدها ممكن تبان بسيطة ويتقال عليها “معلش”، بس لما تحطهم جنب بعض.. بتشوف بشاعة الاستغلال.

أحمد ماكنش وحش كاسر ولا مجرم.. وده كان أصعب جزء في الحكاية لازم أتقبله. هو كان أسوأ وأخطر من كدة بكتير؛ كان نوع عادي جداً وموجود في بيوت كتير: راجل اتعود إن الستات اللي في حياته هما اللي يشيلوا شيلته ويتحملوا نتايج قراراته الطايشة. أمه شالت المرار علشانه وهو صغير، فبالتالي أنا لازم أشيل المرار عشان خاطر أمه. عيلته محتاجة تتباهى، فبالتالي أنا اللي لازم أدفع التمن. هو حاسس إنه مضغوط ومقيد، فبالتالي أنا اللي لازم أستوعب وأستحمل وأضحي. كل الكون كان بيلف حوالين “أحمد حاسس بإيه؟”، وعمره ما لف ثانية واحدة حوالين “نهى خسرت إيه من عمرها وصحتها؟”.
بعد 6 شهور مرمطة في المحاكم، وصلنا لتسوية. البيت رجع لي بالكامل، وعوضته عن الجزء البسيط اللي سهمه بيه في الأول (الـ 800 ألف جنيه)، مخصوم منهم المبالغ والديون اللي سحبها من ورايا وبدون إذني.. مليم مش أكتر. والحجة كريمة اتمنعت قانوناً من دخول الكومباوند أو عتبة البيت.

آخر يوم دخلت فيه البيت عشان أنقل حاجتي وأستقر فيه تاني، حسيت بإحساس غريب. ماكنش فرحة عارمة، ولا كان حزن.. كان نوع من أنواع “الاحترام”. كأن الحوائط والحيطان كانت مستنياني أبطل أعتذر وأبرر إني صاحبة المكان ده بفلوسي وشقايا.