بنت سلفي ج٢ منى السيد

السكوت اللي نزل على الصالة في اللحظة دي كان أتقل من حجر طاحونة. أحمد واقف بيني وبين أخوه الكبير، كتافه مهدودة وعينيه رايحة جاية في الأرض، مش قادر يرفعها في وش عصام، ولا قادر يواجهني. أما عصام فكان واقف سادد الباب بجسمه العريض، بينهج وناره قايدة، مستني كلمة مني عشان يشوف هكسر راسه ولا هطاطي زي ما اتعودوا في البيت ده من سنين. من وراه على السلم، لمحت طرف عباية نادية، واقفة تمسح دموع التماسيح بطرحتها، بس عينيها كانت بتلمع بخبث، مستنية تشوفني مذلولة وأنا بنزل أبوس راسها عشان خاطر "اللمّة" و"عشان الأخوات ميتخاصموش". أحمد بلع ريقه، وبصلي بصوت كان بيترعش ويحاول يخليه هادي بالعافية: "أروى... انزلي مع نادية تحت، قولي لها كلمتين طيبين، وخلي الليلة تعدي... إحنا ملناش غير بعض، وعصام أخويا الكبير وميرضينيش زعله." حسيت بكهربا مشيت في جسمي كله، من صوابع رجلي لحد شعر راسي. الكلمة طلعت منه زي السكينة التلمة اللي بتدبح على البطيء. الراجل اللي اخترته وسيبت الدنيا عشانه، مستعد يدوس على شرفي وكرامتي وذمتي اللي اتهانت، عشان أخوه ميزعلش؟ عشان واحدة حرباية سرقت واجبي وعملت عليا نمرة؟ أخدت نفس طويل، طويل أوي لدرجة حسيت معاه إن صدري هيفرقع، وبصيت لأحمد في عينيه مباشرة، من غير ما أرمش ولا دمعة واحدة تنزل. وقلت بصوت واطي، بس حاد ورنان في هدوء الشقة: "أبوس راسها على إيه يا أحمد؟ على إنها سرقت تعبي؟ ولا على إنها خلت أمك وأختك ياكلوا في لحمي ويقولوا مرات الغالي بخيلة وجاية إيد ورا وإيد قدام؟ ولا أبوس راسها عشان هي كذابة وباعت ذمتها قدام حمايا وحماتي؟" عصام هنا ثار، وصوته رعد في الطرقة: "جرى إيه يا بت الناس! إنتِ هتعملي علينا أستاذة في الأصول؟! مراتي ستك وتاج راسك، ومشتكيكيش في مليم! الشيلة دي كلها هتدفع تمنها دلوقتي حالا، وحق مراتي هيرجع لها، لو مش برضاكي يبقى غصب عنك وعن اللي يتشددلك في البيت ده!" الكلمة طلعت منه، وكان قاصد بيها حمايا، وقاصد بيها أحمد اللي واقف زي خيال المآتة مش ناطق بكلمة. بس قبل ما حد فينا يتحرك، صوت جه من تحت، صوت خطوات تقيلة وثابتة، خطوات راجل شال البيت ده على كتافه خمسين سنة. حمايا طالع السلم، وحماتي وراه بتلهث وماسكة في درابزين السلم بالعافية، ومعاهم أم ملك، أختهم التالتة اللي بنتها تعبانة، وجوزها محسن سلفي التاني. البيت كله اتجمع على بسطة السلم في دقايق. حمايا وقف على أول عتبة الشقة، بص لعصام وهو رافع صباعه في وشه، وبص لنادية اللي اتكمشت ورا جوزها أول ما شافت حماها، وبعدين بص لأحمد اللي وشه جاب كل ألوان الطيف من الكسوف. حمايا قال بنبرة قطعت كل العروق الحامية: "وطي صوتك يا عصام! صوتك ميعلاش على أخوك في بيته وأنا لسه فيّا النفس! وإنت يا أحمد... خيبت رجائي فيك، واقف تسمع مراتك بتتهان في شرف أمانتها ومستني منها تطاطي؟ هي دي الرجولة اللي ربيتك عليها؟" أحمد وشه احمر ونزل راسه في الأرض زي التلميذ الخايب، ومقدرش ينطق حرف. عصام حاول يتماسك، وقال وهو بيبرر: "يا بويا إنت مش شايف مرات أحمد بتعمل إيه؟ قالبت البيت نكد وخراب عشان كيس زبادي وعصاير! ده كلام يتقال؟ مراتي متبهدلة تحت وبتبكي بالدموع، وإنت جاي تقف مع الغريبة ضد ابنك ومرات ابنك الكبيرة؟" حمايا ضحك ضحكة قصيرة مليانة مرار، وطلع من جيب جلابيته التليفون بتاعه، وبص لعصام بصه عمري ما هنساها. "غريبة مين يا عصام؟ أروى اللي صاينة ابنك ومربياه وعمرها ما طلعت سر برة بيتها ولا مدّت إيدها على حاجة مش بتاعتها، هي اللي غريبة؟ ولا مراتك اللي لولا ستر ربنا كان زمانك دافن راسك في الطين من فضيحتها النهاردة؟" نادية اتهزت ورا ضهر جوزها، وقالت بصوت مخنوق بالدموع: "يا عمي حرام عليك، هو أنا عملت إيه لكل ده؟ هو عشان شيلت الشنطة أبقى مجرمة؟!" حمايا التفت لها فجأة، وعينيه كانت بتطلع شرار: "اسكتي يا نادية! اسكتي بدل ما أفرّج الشارع كله على اللي مسجل عندي هنا! فاكرة إني راجل عجوز مخرف ومبعرفش اللي بيدور في بيتي؟" الصالة رجعت سكتت تاني، حتى الهوا حسيت إنه وقف. حمايا بص لأم ملك وقال: "افتحي يا أم ملك، قولي لأخوكي الكبير مراته قالت لك إيه امبارح بالليل في التليفون، قبل ما أروى تنزل من عندك بربع ساعة!" أم ملك كانت مكسورة، بصت لأخوها عصام وقالت بصوت واطي: "نادية اتصلت بيا أول ما نزلوا من عندي يا عصام... قالت لي: شفتي أروى؟ جاية ورايا بالعافية ومكنتش عايزة تيجي، وأنا اللي حلفت عليها واشتريت الشنطة الكبيرة دي من مالي الخاص عشان أعوض تقصيرها، وما ترضيش تقبلي منها حاجة لو جابتلك بعدين عشان دي عينها وحشة في البت!... ده اللي قالتهولي يا عصام، وده اللي خلاني الصبح أفرش الملاية لحماتي وأقول مرات الغالي جاية إيد ورا وإيد قدام!" لمحة نيوز عصام بص لنادية بصدمة، وشه اتغير 180 درجة، بؤبؤ عينيه وسع وكأنه بيشوف واحدة تانية خالص غير اللي عايشة معاه بقالها عشر سنين: "الكلام ده حصل يا نادية؟ إنتِ قلتي الكلام ده لأختي؟" نادية ارتبكت، وبدأت تتلفت يمين وشمال كأنها بتدور على مخرج طوارئ: "لا... محصلش! دي أم ملك بتتبلى عليا عشان تطلع هي المظلومة! والله العظيم كذب!" حمايا رفع التليفون بتاعه وداس على زرار، وطلع صوت نادية واضح ونقي من مكبر الصوت، تسجيل مكالمة كان حمايا مسجلها بالصدفة لما نادية اتصلت بيه الصبح بدري تسخنه على أروى قبل ما تيجي: صوت نادية طالع من السماعة بيلسع زي العقربة: (يا عمي إنت عارف غلاوتك، بس أروى دي نيتها سودة من ناحيتنا، امبارح دخلت على البت عيانة شربت الشربات وضحكت في وشنا ونزلت ولا عبرت، وأنا اللي قلبي وكلني وجبت الشنطة اللي كسر ضهري تمنها عشان محدش يشمت فينا... لازم توقف أحمد عند حده، دي بتعلم البخل على قفانا!) التسجيل وقف. والصمت اللي جه بعده كان صمت مقابر. عصام وقف مكانه مشلول، إيديه الاتنين نزلوا جنبه، ووشه بقى شبه الميتين. الفضيحة مكنتش بس إنها سرقت الكيس، الفضيحة إنها كانت بتخطط وتدبر وتوقع بين الإخوات بنية مسبقة، وبتلف على البيت كله تزرع الفتنة والغل، وتستغل طيبة الناس ومرض البت الصغيرة عشان تعمل لنفسها مقام على حساب كرامة غيرها. حماتي، اللي كانت طول عمرها بتميل لنادية عشان لسانها حلو وبتعرف تسايرها، لطمت على صدرها وقالت بصوت مسموع: "يا لهوي يا نادية... ده كله في قلبك السواد ده؟! بتوقعي بين ولادي عشان كيس زبادي وعصاير؟! ده إنتِ كنتِ هتخلّي الأخوات يدبحوا بعض النهاردة!" نادية وطت راسها في الأرض، ومقدرتش ترفع عينها في حد، الوش المزيف وقع، وبانت حقيقتها قدام البيت كله، قدام حماها وحماتها وسلفاتها وجوزها. عصام لف ببطء، بص لنادية وهو بيجز على سنانه لدرجة سمعت صوت احتكاكها: "انزلي على شقتك." نادية حاولت تتكلم: "عصام، اسمعني بس..." عصام صرخ فيها بصرخة خلت العمارة كلها تترج: "انزلييييي! مش عايز أسمع صوتك ولا أشوف وشك الليلة دي، انزلي لمي هدومك وروحي عند أمك لحد ما أشوف المصيبة اللي أنا اتدبست فيها دي حلها إيه!" نادية جريت على السلم بتعيط عياط حقيقي المرة دي، عياط الخزي والفضيحة، ونزلت لتحت وهي بتجر أذيال الخيبة، والباب رزع وراها في الدور التاني. عصام وقف مكانه، كتافه مهدودة كأنه شال جبل، بص لحمايا وقال بصوت مكسور: "حقك عليا يا با... أنا اتعميت، ومكنتش شايف." وبعدين لف وشه وبصلي أنا، وكان وشه في الأرض مش قادر يحطه في وشي: "حقك على راسي يا أروى... أنا ظلمتك، وكلامي اللي قلته من شوية كان جهل وغباء مني. إنتِ بنت أصول ومشوفتش منك العيبة في بيتي ولا بيت إخواتي، وحقك تاخديه من رقبتي ورقبها." هزيت راسي بهدوء، ومردتش بكلمة واحدة زيادة. السكوت في اللحظة دي كان أبلغ من مية عتاب. الحقيقة ظهرت، وربنا نصرني من غير ما أمد إيدي ولا أرد الإساءة بالإساءة، بس الوجع اللي كان في قلبي مكانش من عصام ولا من نادية... الوجع الحقيقي كان واقف جنبي، ساكت ومطأطأ راسه. حمايا طبطب على كتف عصام وقال له: "انزل يا ابني استهدى بالله وشوف بنتك التعبانة، والموضوع ده هيتقفل ومش عايز كلمة زيادة فيه في البيت ده لحد ما ملك تقوم بالسلامة، وبعدين ليا قعدة تانية معاك ومع مراتك." نزل عصام، ونزلت وراه أم ملك وهي بتبصلي بأسف واعتذار، وحماتي خدت جوزها ونزلوا، وفضل باب الشقة مفتوح، وأنا وأحمد واقفين في الصالة لوحدنا تاني. أحمد قفل الباب ببطء شديد، ولف وشه ليا. كان مكسور، عينه مش قادرة تلتقي بعيني. قرب خطوتين، وحط إيده على كتفي بصوت واطي ومتردد: "أروى... أنا..." شيلت إيده من على كتفي بهدوء شديد، ورجعت خطوة لورا. "متكملش يا أحمد." أحمد بصلي بلهفة: "والله العظيم كنت مزنوق ومضغوط، عصام أخويا الكبير وإنتِ عارفة طبعه الحامي، كنت عايز الليلة تعدي والبيت ميتخربش، مكنتش أقصد أهينك ولا أقلل منك..." بصيت له بحزن عميق، حزن الست اللي بتشوف شريك حياتها بيصغر قدام عينيها: "البيت مكنش هيتخرب لو وقفت في ضهري يا أحمد. البيت اتخرب في اللحظة اللي طلبت مني فيها أطاطي للباطل عشان تشتري خاطر أخوك. إنت مكنتش بتشتري خاطر أخوك، إنت كنت بتستسهل تكسرني أنا، عشان عارف إني طيبة وبسكت وبعمل خاطر للعشرة وللعيال." أحمد دمعت عينيه: "أنا غلطت يا أروى... والله العظيم غلطت، وجزمتك على راسي، بس متعمليش فيا كده، إحنا ملناش غير بعض." أخدت نفس عميق، ومشيت ناحية أوضة ابني، وقفت على الباب وبصيت له لآخر مرة في الليلة دي: "أنا هقعد في شقتي يا أحمد، عشان خاطر ابني، وعشان خاطر الراجل الطيب اللي تحت اللي نصرني ومرديش بالظلم في بيته. بس اللي اتكسر بيني وبينك النهاردة، مش هيتصلح بكلمة 'حقك عليا'... مكانتك اللي كانت هنا، اتهزت. وعشان ترجع زي الأول، محتاج تثبت لنفسك وليا إنك راجل البيت ده بجد، مش مجرد ظل لأخوك الكبير." دخلت الأوضة، وقفلت الباب ورايا. قعدت جنب ابني وهو نايم في سريره، حطيت إيدي على شعره الصغير وبصيت للسما من شباك الأوضة. الشنطة اللي جبتها لملك مكنتش مجرد جيلي وعصاير، كانت اختبار كبير كشف كل المعادن الصدية اللي حواليا. نادية خدت جزاء نيتها وغلها اللي فضحها قدام الكل، وأم ملك اتعلمت درس إنها متسمعش بودان غيرها، وأحمد عرف إن السكوت والطيبة مش ضعف، وإن الصبر له حدود لو اتعدت، محدش هيعرف يرجّع اللي راح. حطيت راسي على المخدة، ولأول مرة من يومين، أحس بهدوء حقيقي في قلبي. الظلم وحش وناره بتحرق، بس يقيني في إن ربنا مبيضيعش حق حد، كان هو البرد والسلام اللي طفّى النار دي كلها.

مقالات ذات صلة

ورطه السعاده نورهان العشري

روحت البنك عشان اسحب قرشين نور محمد

فشخره كدابه ج١ منى السيد

بنت الخدامه بقلم فريده

بعد ما خرجنا

جوزي فاكر انه قفل السكه

اترك تعليقاً إلغاء الرد