ساعه الدهب ج٢ منال علي

الراجل مد إيده بالظرف البني لمازن ومشي بسرعة من غير ما ينطق ولا كلمة. مازن فتح الظرف بإيدين بتترعش، وأول ما عينه وقعت على الورقة اللي جواه، وشه اتخطف تماماً، لونه بقى زي الجير، والورقة وقعت من بين صوابعه على أرضية القاعة. القاضي بص لمازن بنظرة حازمة وقال: "في إيه يا أستاذ؟ اتفضل امسك القلم ووقّع، القاعة وراها قضايا تانية." حماتي سعاد ما قدرتش تصبر، مدت راسها من ورا الحاجز وقالت بصوت ملهوف: "خير يا مازن يا ابني؟ ورقة إيه دي؟!" مازن ما ردش عليها، عينه كانت متسمرة عليا أنا. قرب مني خطوة، وصوته طالع مخنوق ومكتوم كأنه بيتحشر في زوره: "الساعة دي... الساعة دي كانت في خزنة البنك الأهلي. المفتاح الأصلي في مكتبي، والرقم السري محدش يعرفه في الدنيا دي غيري... دخلتي هناك إزاي؟ وخدتي إيه تاني مع الساعة؟!" ابتسمت ابتسامة هادية، وحطيت القلم على التربيزة قدام القاضي من غير ما أوقع. بصيت لمازن وقلتله بهمس ما يسمعوش غيره: "نسيت إنك لما فتحت الخزنة دي من سنتين، عملتها باسمي أنا وإنت شراكة؟ نسيت إنك وقتها كنت داخل مناقصة وخايف تتحجز على أملاكك فعملتلي حق التوقيع المنفرد؟ ولا افتكرت إن سلوى بتاعة حلوان هبلة وهتفضل نايمة على ودانها طول العمر؟" حماتي لما شافت الموقف مش مفهوم ورانيا أخته عمالة تبص للورقة اللي على الأرض، دخلت القاعة وقالت بصوت عالي: "يا سيادة القاضي، البت دي شكلها مدبرة مصيبة لابني! شوف الورقة دي فيها إيه!" القاضي خبط بالشاكوش على المنصة وقال بغضب: "اسكتي يا ست إنتِ! اطلعي برة القاعة حالاً! محامي المدعي والمدعى عليها يتقدموا لهنا!" المحامي بتاعي، أستاذ رفعت، اللي كان واقف ورايا بهدوء من أول الجلسة، طلع خطوة لقدام وقدم مذكرة عاجلة للقاضي وقال: "سيادة القاضي، بنطلب وقف إجراءات الطلاق الاتفاقي مؤقتاً، وضم محضر إثبات الحالة رقم 2145 جنح أموال عامة... لوجود نزاع جنائي حول تبديد أصول وتهريب أموال زوجية وتزوير توقيعات." مازن صرخ في وسط القاعة كالمجنون: "تزوير إيه؟! إنتِ عايزة تحبسيني يا سلوى؟! المحلات دي محلاتي، وتعب سنين عمري!" القاضي بص في الورق، وبص للظرف اللي كان على الأرض، وملامحه اتغيرت، وقال بلهجة حاسمة: "تؤجل الجلسة إدارياً، وتُحال الأوراق للنيابة العامة للفحص. تُرفع الجلسة!" خرجنا كلنا لممر المحكمة. الدنيا كانت مقلوبة. #حكايات_منــال_عـلـي سعاد مسكت مازن من قميصه وهي بتعيط بهستيريا: "فهمني يا ابني في إيه؟! حبس إيه وأموال عامة إيه؟! دي جاية تطلق وتاخد مؤخرها وتغور، إيه اللي وداكم للنيابة؟!" رانيا أخته كانت بتبصلي بغل وقالت: "حرباية! طول عمرك ساكتة ومكنكنة، طالعة تعملي فيها بريئة وإنتِ حية من تحت تبن!" أنا ما رديتش على أي واحدة فيهم. كنت واقفة، ضهري مفرود، وساعة الدهب في إيدي بتلمع تحت إضاءة الممر الباهتة. الساعة دي مازن ما اشتراهاش علشاني. الساعة دي كانت محطوطة في علبة قطيفة حمرا جوة الخزنة، وجنبها كارت مكتوب فيه: "إلى شريكة عمري ونجاحي القادم... ناردين". كانت محطوطة جنب عقود بيع ابتدائية لفرعين من أكبر فروع السلسلة، عقود مازن مضى عليها باسمي وبصم مكاني بتوكيل عام كان واخده مني زمان عشان يسهل إجراءات التراخيص! مازن زق أمه وأخته وبعدهم عنه، وقرب مني وشه أحمر وعروق رقبته ناطرة: "إنتِ فاكرة نفسك ذكية؟ فاكرة لما تروحي تفتحي الخزنة وتاخدي العقود والساعة وتبلغي عن التوكيل إنك كده كسبتي؟ إنتِ ما تعرفيش الورق ده وراه مين يا سلوى!" بصيتله في عينيه بمنتهى البرود وقلتله: "وراه 'ناردين'؟ البنت اللي شفتك معاها في مطعم الزمالك؟ اللي رايح تسجل باسمها تعب عشر سنين من شقاي أنا وأنت؟ اللي نسيت عشانها أول يوم فتحنا فيه في فيصل وكنا بنقسم ساندوتش الفول بالنص؟" مازن بلع ريقه، وبص حواليه برعب، وقال بصوت واطي مرعوب: "ناردين مش مجرد واحدة عرفتها... ناردين دي بنت المستشار اللي ماسك تصفية الديون بتاعة الموردين! الشغل كان هيقفل يا سلوى! كنا هنفلس! أنا كنت بخلّص نفسي وبأمّن مستقبلنا!" ضحكت بسخرية: "بتأمّن مستقبلنا؟ ولا بتأمّن نفسك وبتسيبني ألبس القروض والشيكات اللي ممضية باسم المحل القديم؟!" وقبل ما مازن يرد، سمعنا صوت كعب عالي بيرن في الممر الطويل بتاع المحكمة. الصوت كان سريع، والكل سكت والتفت يبص لمصدر الصوت. كانت داخلة ست في أواخر العشرينات، لابسة نضارة شمس سودا وبدلة كلاسيك شيك جداً، وماشية بكل ثقة، وفي إيدها شنطة جلد غالية. وقفت قدامنا، قلعت النضارة، وبصت لمازن بابتسامة باردة، وبعدين نقلت عينيها ليا... وعينها نزلت فوراً على ساعة الدهب اللي في إيدي. سعاد حماتي شهقت وقالت: "مين دي كمان؟!" الست قربت مني خطوتين، ومدت إيدها بكل هدوء وقالت بصوت واثق: "أهلاً يا مدام سلوى... أنا ناردين. بس شكلك فاهمة الموضوع غلط خالص... مازن ما كانش بيهرب بفلوسك ليا... مازن كان بيهرب بفلوسي أنا، والورق اللي في إيدك ده... يوديه ورا الشمس ويوديكي معاه!" مازن اتسمر مكانه، وإيديه سابت المذكرة، وبص لناردين برعب حقيقي وقال: "إنتِ... إنتِ جيتي هنا ليه؟!" #حكايات_منــال_عـلـي

مقالات ذات صلة

حماتي كانت بتبعتلي غسيل بنتها

نبع الغرام ج١

32 سنه لوحدي

اربعه على السفره

حكايات بسمه ج٣

الساعه ٦:٣٠ صباحا حكايات ميرا

اترك تعليقاً إلغاء الرد