رحمه ج2 اماني السيد

تاني يوم، رحمة ركبت جنب عمران وهي ساكتة طول الطريق. كانت حاسة إن في حاجة كبيرة مستنياهم، لكن عمران كان سايق وعينيه ثابتة على الطريق، وإيده ماسكة إيدها كأنه هو كمان محتاج يطمن نفسه إنها لسه جنبه. وصلوا عند الدكتور، ودخلوا الاتنين. الدكتور قلب في التحاليل القديمة والجديدة أكتر من مرة، وبعدين رفع عينه لعمران وقال: ـ “إنت متأكد إن الدكتور اللي قالك إنك عقيم نهائيًا كان معاه كل التحاليل دي؟” عمران رد: ـ “أيوه، وقالي مفيش أمل.” الدكتور هز راسه: ـ “أنا شايف إن التشخيص القديم كان متسرع.” رحمة قربت من الكرسي: ـ “يعني إيه يا دكتور؟” قال: ـ “يعني عمران عنده مشكلة، لكن مش معناها إنه مستحيل يخلف. النسبة ضعيفة، والعلاج ممكن يحسنها بشكل كبير.” عمران فضل ساكت. كان كأنه نسي يتنفس. وبعد ثواني قال: ـ “يعني ممكن أخلف؟” ـ “أيوه… ممكن.” رحمة بصت لعمران، لكن بدل ما تفرح، شافت الدموع بتتجمع في عينيه. خرجوا من عند الدكتور، وقبل ما يركب العربية، عمران وقف قدام رحمة. ـ “أنا مش عايزك تفرحي.” رحمة استغربت: ـ “ليه؟” ـ “عشان أنا مش عايز يوم من الأيام تحسي إنك اتجوزتيني عشان الخلفة.” ابتسمت رحمة وقالت: ـ “وأنا مش عايزة طفل يغير اللي بينا.” قرب منها وقال: ـ “ولو ربنا رزقنا؟” ردت: ـ “نبقى أبو وأم كويسين.” ـ “ولو مرزقناش؟” ـ “نبقى رحمة وعمران.” ضم إيدها بين إيديه وقال: ـ “ربنا يخليكي ليا.” مرت سنة. عمران التزم بالعلاج، لكن رحمة كانت بتتعامل مع الموضوع كأنه مش أهم حاجة في الدنيا. لحد ما في صباح يوم، رحمة صحيت وهي حاسة بدوخة شديدة. أم عمران شافتها وقالت: ـ “إنتي وشك أصفر يا بنتي.” رحمة ردت: ـ “يمكن من قلة النوم.” لكن أم عمران أصرت إنها تروح تعمل تحليل. وفي نفس اليوم، كانت رحمة قاعدة قدام معمل التحاليل، وإيديها بتترعش وهي ماسكة الورقة. لما ظهرت النتيجة، فضلت باصة عليها ثواني طويلة. وبعدين دموعها نزلت. حامل. طلعت من المعمل، وبدل ما تكلم عمران، راحت على البيت. دخلت، لقت عمران قاعد قدام أمه. بص لها وقال: ـ “رحمة؟ إنتي كنتي فين؟” مردتش. قربت منه، ومدت له الورقة. عمران بص فيها. قرأ. رفع عينه لها. ـ “إنتي…” ضحكت وهي بتعيط: ـ “أيوه.” عمران قام مرة واحدة، ومسك وشها بين إيديه. ـ “بجد؟” ـ “بجد.” ضمها لصدره، ودموعه نزلت لأول مرة قدام أمه. أمه كانت واقفة بعيد وبتبكي وهي بتقول: ـ “الحمد لله يا رب… جبرت خاطر ابني.” لكن رحمة همست في ودن عمران: ـ “فاكر لما قلتلي إن الضنى مش كل الدنيا؟” ـ “فاكر.” ـ “دلوقتي عرفت إن أهم حاجة إن اللي ييجي الدنيا دي ييجي في بيت فيه حب.” خبر الحمل انتشر في البلد. والناس اللي كانت بتتكلم يوم جوازهم، رجعت تتكلم تاني. بس المرة دي الكلام كان مختلف. “أهو ربنا رزقه.” “شفتي اللي قالوا عليه مبيخلفش؟” “البنت دي وشها كان حلو عليه.” لكن عمران كان بيوقف أي حد يقول الكلام ده. وفي مرة واحد من قرايبه ضحك وقال: ـ “أهو يا عمران ربنا عوضك بعد ما طليقتك فضحتك.” عمران بص له بحدة وقال: ـ “متجيبش سيرة طليقتي.” ـ “ليه؟ ما هي قالت الحقيقة.” عمران رد بهدوء: ـ “الحقيقة إن الإنسان مش بيتقاس بقدرته على الخلفة.” وبص لرحمة اللي كانت واقفة بعيد. ـ “وأنا لو اتجوزت رحمة عشان أخلف منها، كنت خسرت أحسن إنسانة دخلت حياتي.” رحمة سمعت الكلام، ودموعها لمعت في عينيها. بعد تسعة شهور، ولدت رحمة بنت جميلة. وفي أول مرة عمران شالها بين إيديه، فضل باصصلها وقت طويل. أمه قربت منه وقالت: ـ “سميها إيه يا ابني؟” بص لرحمة. رحمة ابتسمت وقالت: ـ “إنت اختار.” عمران قال: ـ “اسمها أمل.” رحمة ضحكت: ـ “ليه أمل؟” بص لبنته وقال: ـ “عشان هي مش بس بنتي… دي الحاجة اللي خلتني أعرف إن الأمل ساعات بييجي بعد ما الإنسان يقتنع إن كل الأبواب اتقفلت.” رحمة قربت منه وقالت: ـ “بس متنساش حاجة.” ـ “إيه؟” ـ “إنت كنت هتتجوزني عشان تخبي كسـ,ـرتك.” ابتسم عمران وقال: ـ “وأهو ربنا بعثك عشان تجبريها.” هزت راسها: ـ “لأ يا عمران.” ـ “أمال؟” ـ “إحنا الاتنين كنا مكسورين… وربنا جمعنا عشان نصلح بعض.” بصلها عمران، وبعدين بص لبنته الصغيرة. وقال: ـ “يمكن دي كانت الحكاية كلها من البداية.” ومن يومها، كل ما حد يسأل رحمة: “إنتي إزاي وافقتي تتجوزي راجل الناس كلها قالت إنه مبيخلفش؟” كانت تبتسم وتقول: “أنا مكنتش بدور على راجل يخلّفلي طفل… كنت بدور على راجل أقدر أعيش معاه بأمان. والطفل كان رزق جه بعدين.” أما عمران، فكان دايمًا يقول: “رحمة مأنقذتنيش من كلام الناس وبس… دي علمتني إن الراجل مش ناقصه طفل عشان يبقى راجل، وإن الست مش ناقصها طفل عشان تبقى كاملة.” وعاشوا مع بنتهم وأم عمران حياة بسيطة، لكن مليانة حب. والأجمل إن عمران عمره ما نسي اليوم اللي وقف فيه قدام رحمة وقال لها الحقيقة كاملة، مستني منها الرفض… فقالت له: “الضنى مش كل الدنيا.” وساعتها فهم إن بعض الزيجات بتبدأ من وجع… لكن ربنا قادر يحول الوجـ,ـع ده لأجمل نعمة.

مقالات ذات صلة

لمده ست سنين ليلى كانت بتخمي جوزها وتخدمه

سهيله سعيد ج٢

غدر الزوج ج٣ منال علي

ايزيس ج٣

بنت عم جوزي ج١ زهره

قبل فرحي بخمس ايام

اترك تعليقاً إلغاء الرد