عيون معصوبه دفنا عمر

_وانا بتعب في ايه وبعدين تعبك راحة يا ضنايا.. بص انت ابعتلي الشهرية علي بعضها زي ما كنت بتعمل.. وانا هوصل المبلغ اللي هتقول عليه لإيد مراتك.. والباقي هسد به الفواتير زي منا متعودة.. ولا عايز تحسسني كده اني مبقاش ليه لازمة عندك واتركنت علي الرف خلاص؟
_ ازاي يا أمي ده انتي على راسي من فوق.. خلاص ولا يهمك.. كل شهر هبعت الفلوس ليكي وانتي اتصرفي.. راضية عني يا أمي؟
_ قلبي وربي راضين عنك يا يونس يا ابن بطني.. إلهي يرزقك ويطول في عمرك ويسلمك من كل شر..

_ الله يا أمي.. دعواتك دي بالدنيا عندي.. أنا عايش ببركة دعاكي وبس..
_ داعيالك يا ابني كل أذان.. ربنا يرجعك من غربتك سالم غانم قادر ياكريم..
_____________

النقود معها اقتربت أن تنفذ وزوجها لم يرسل شهريتها كما اتفقا.. كلما حاولت تذكيره تنسى، اليوم ستذكره بها وهي تهاتفه ليلا گ المعتاد..
…….
عبر الهاتف
_ الفلوس اللي نزلت بيها قربت تخلص يا يونس، هتبعتلي شهريتي امتى؟
_ منا بعتها من كان يوم يا رضوي.. هي ماما مش قالتلك؟
_ بعتها ازاي وإيه علاقة والدتك بالموضوع؟ مش اتفقنا انك هتبعتلي كل شهر وانا اللي هوصل فلوس مامتك واتصرف في الباقي؟
_ كنت ناوي علي كده الله، بس شكل امي بقيت حساسة اوي.. افتكرتني خلاص بلغيها وزعلت اني مش هبعتلها هي.. فقلت اراضيها والمصلحة واحدة.. ولما هي تاخد الفلوس توصلك المبلغ اللي يخصك انتي والبنات..
_ وفين بقي المبلغ؟؟؟ وبعدين انا مش موافقة فلوسي تكون مع والدتك يا يونس.. دي أمور خاصة.. بعتلي قرش بعتلي عشرة ده بنا ومحدش من حقه يعرفه..
_ انتي مكبرة الحكاية ليه بس مش فاهم.. ما قولت امي هتديكي..
_ وما ادتنيش ليه لحد دلوقت؟ كانت منتظرة ايه؟
_ عادي يمكن نسيت جلا من لا يسهو يا ستي..

مسحت علي وجهها مستغفرة ثم قالت: طب بعتلي كام وانا هنزل اخدهم منها..
_ بعتلك خمس تلاف جنية..اعتقد يكفوا.. ماتخليش البنات محتاجة حاجة.
_ حاضر ماتقلقش..

انهت المكالمة معه وهبطت إليها لتطالب بنقودها.. لكن الغريب أنها راوغتها وأخبرتها أنها ستحضر لها النقود في الصباح لأنها نسيت أين احتفظت بهم..

لم تصدقها رضوي وشعرت بالريبة ومع هذا انتظرت أن ترى على ماذا سيرسو إليه الأمر..فالصباح ليس ببعيد..
___________