على كان واقف في مكتبه
هدير كانت واقفة على الباب وسمعت كل حاجة، قالت لمياده يا مياده عشان خاطري، وعشان خاطر الناس الغلابة اللي شغالة هنا، ساعديهم، وانا عارفة انك طيبة ومتشيليش من حد، مياده بصت لعلي وقالت له موافقة بس بشرط، هترجم العقد وهحضر الاجتماع، بس هتخليني انا اللي اتكلم باسم الشركة، وانت هتسمع كلامي، ومش هتقاطعني، ولو كسبنا العقد هتعتذرلي قدام الوفد كله.
علي وافق فورا، طول الليل مياده وعلي وحسين قاعدين بيجهزوا العرض، مياده كانت بتترجم بسرعة رهيبة وبتشرح لعلي كل كلمة معناها ايه، وعلي كان مبهور بذكائها، اول مرة يشوفها بجد، شاف بنت قوية ومثقفة وبتحب شغلها، مش البنت الفقيرة اللي كان شايفها، الفجر طلع وهم لسه مخلصوش، مياده كانت تعبانة جدا بس متحمسة.
تاني يوم الصبح الوفد الصيني وصل، ومعاهم علياء مصطفي داخلة بكل ثقة ولابسة براندات وبتضحك معاهم، اول ما شافت علي قالت له بكل شماتة سمعت ان المترجم بتاعك عمل حادثة، يا خسارة، كنت اتمنى يبقى فيه منافسة شريفة، علي سكت ومرضش عليها، دخل الوفد قاعة الاجتماعات، علياء مصطفي بدأت تعرض عرضها بالانجليزي ومعاها مترجم صيني بيترجم للغة القديمة بس كان بيتلخبط كتير والوفد شكله مش مقتنع.
جه الدور على علي، قام وقال احنا هنقدم عرضنا بلغة الهاكا الاصلية احتراما لثقافتكم، الوفد اتفاجئ، مياده قامت وقفت بكل ثقة، كانت لابسة بدلة بسيطة بس شكلها محترم، وبدأت تتكلم باللغة الصينية القديمة بطلاقة غريبة، صوتها كان واثق وعينيها بتلمع، كانت بتشرح خطة الاحتكار كلمة كلمة، وكانت مزودة حاجات من عندها تخلي العقد مربح للطرفين، الوفد كان مبهور، رئيس الوفد كان بيبصلها باعجاب شديد.
علياء مصطفي وشها جاب الوان، حاولت تقاطعها بس رئيس الوفد شاور لها تسكت، مياده خلصت العرض والكل سقف، رئيس الوفد قام وسلم عليها وقال لها انتي بتتكلمي لغتنا احسن مننا، انتي درستي فين، مياده قالت له انا درستها لوحدي من كتب قديمة في مكتبة الجامعة، الراجل انبهر اكتر وقال يبقى انتي عبقرية.
رئيس الوفد بص لعلي وقال له شركتك محظوظة ان عندها موظفة زي دي، احنا موافقين نمضي عقد الاحتكار معاكم، بس بشرط ان الانسة مياده هي اللي تبقى مسئولة التواصل بيننا طول مدة العقد، علي فرح جدا وقال موافق طبعا، علياء مصطفي لمت حاجتها وخرجت وهي بتغلي من جواها.
