بيت اهلي ج١ صافي هاني
لكن باسم كان مرتاح جدًا
قاعد يتكلم عن استثمارات وشغل جديد ومعارف مهمة
وبيمثل دور الراجل الناجح اللي صورته كلها معمولة بفلوس غيره
وفجأة تليفونه رن
بص للشاشة وابتسم
وقال دي أمي
قلبي اتقبض
رد وهو واثق إنها هتشكره على العربية
فضل مبتسم حوالي تلات ثواني
وبعدين اللون اختفى من وشه
ضهره شد
#حكايات_صافي_هاني
#حصري
والكوباية نزلت من إيده على الترابيزة بالراحة
أبويا رفع عينه من الطبق وبصله من غير أي تعبير
باسم فضل ساكت وهو بيسمع اللي بيتقال في التليفون
وبعدين قال بصوت واطي جدًا
يا أمي هو إنتي عملتي إيه في عربية جنا
ساعتها بس فهمت إن رسالة أبويا وصلت للشخص اللي كانت متوجهة له
وإن اللي بيحصل على الطرف التاني من المكالمة كان مجرد البداية
الباسم قام من على الكرسي مرة واحدة وهو حاطط الموبايل على ودنه ووشه بقى أصفر
قال بصوت متوتر
إزاي يعني أخدوها
فضل يسمع ثواني وبعدين بص ناحية أبويا بسرعة ورجع قال
طب استني أنا جاي حالًا
وقفل المكالمة وهو بيبلع ريقه بالعافية
أمي سألته
في إيه يا باسم
رد وهو بيحاول يبان هادي
مفيش… سوء تفاهم بسيط
لكن إيده كانت بترتعش وهو بياخد مفاتيحه
أبويا حط الشوكة جنب الطبق وقال بهدوء
خير يا باسم
باسم حاول يبتسم
أصل… العربية فيها مشكلة
أبويا هز راسه وقال
تقصد عربية جنا
سكت باسم
لأول مرة من يوم عرفته مالقاش كلام يقوله
أبويا كمل بنفس الهدوء
العربية اللي باسمها جنا… وفيها كل أوراقها… واتاخدت من اللي كان بيستخدمها من غير إذن صاحبتها
باسم حس إنه اتحاصر
قال بسرعة
يا دكتور حضرتك مكبرت الموضوع ليه
دي أمي
وأنا جوز جنا
أبويا ابتسم نفس الابتسامة الهادية
وقال
كونك جوزها مايديكش حق تتصرف في ملكها
ولو هي سامحتك
القانون مش بيسمي اللي حصل استئذان
ساعتها قلبي دق بعنف
أنا ماكنتش فاهمة هو عمل إيه
لكن كنت واثقة إنه مش بيتكلم من فراغ
باسم بصلي بعصبية
إنتي اشتكيتي
هزيت راسي بالنفي
والحقيقة إني ماكنتش أعرف أي حاجة
أبويا قال
بنتي ماتعرفش إني اتدخلت
لأنها طول عمرها بتحاول تستر عليك
لكن أنا دوري أحميها
باسم حاول يغير الكلام
يا جماعة دي مجرد عربية
أخويا لأول مرة اتكلم
وقال
لو مجرد عربية كنت رجعتها لما طلبتها
إنما إنت أخدتها واعتبرتها ملكك
طنط ليلى حاولت تهدي الجو
وقالت
خلاص يا جماعة بلاش مشاكل عشان لقمة العيش
