وقف كريم قدام شاشة المراقبة الاحتياطية، اللي كانت شغالة على مولد كهربا منفصل. رغم إن معظم الكاميرات اتعطلت، كان لسه فيه كاميرا واحدة بتجيب صورة البوابة. العربية السودا وقفت. ونزل منها العم جلال. لابس بدلته الرمادي، وماسك عصايته الخشب اللي عمره ما فارقها. وراه رجالة كتير. كلهم واقفين في هدوء غريب. كريم قال في اللاسلكي: ـ محدش يضرب نار... إلا بأمري. الحارس رد: ـ حاضر يا باشا. بعدها بثواني... سُمع صوت العم جلال من سماعة البوابة. ـ يا كريم... افتح الباب. إحنا رجالتك. مش جايين نحاربك. كريم ضغط زر الميكروفون. ـ لو رجالة ليا... كنتوا جيتوا لوحدكم، مش بعشرين عربية. سكت جلال لحظة، وبعدها قال: ـ واضح إن حد لعب في دماغك. ـ الحقيقة هي اللي لعبت. ـ أي حقيقة؟ رفع كريم الصورة اللي لقاها في الصندوق، وخلاها قدام الكاميرا. ـ الحقيقة دي. أول ما شافها العم جلال... وشه اتغير للحظة. لكن بسرعة رجع ابتسم. ـ صور قديمة... ما تثبتش حاجة. رد كريم: ـ والملفات؟ ـ ملفات ممكن أي حد يزورّها. ـ وأمي؟ الابتسامة اختفت من وش جلال. ساد صمت طويل. وبعدين قال: ـ افتح الباب يا كريم... وهشرحلك كل حاجة. كريم هز راسه. ـ لا. ـ يبقى إنت اللي اخترت. أشار جلال بإيده. وفجأة... كل العربيات اللي وراه فتحت أنوارها العالية مرة واحدة. الجنينة كلها نورت. وفي نفس اللحظة... طلع قناصة فوق أسطح العربيات، ووجهوا أسلحتهم ناحية الفيلا. الحراس استخبوا بسرعة. واحد منهم صرخ: ـ يا باشا... قناصة! كريم لف لسعاد وملك. ـ انزلوا على الغرفة السرية تحت الأرض. سعاد قالت بخوف: ـ وإنت؟ ابتسم ابتسامة هادئة. ـ لو أنا نزلت... هيكسروا الباب في دقايق. لازم أفضل فوق. ملك جريت حضنته. ـ متسبنيش يا عمو. مسح على شعرها وقال: ـ أوعدك... هرجعلك. أول ما نزلت سعاد وملك مع اتنين من الحراس إلى الممر السري... رفع كريم جهاز اللاسلكي وقال: ـ اسمعوني كويس... اللي خايف يمشي دلوقتي، وأنا مش هحاسبه. ساد الصمت. ولا حارس اتحرك من مكانه. بعد لحظات، رد رئيس الحراسة: ـ إحنا دخلنا البيت ده بإرادتنا... ولو هنموت، هنموت وإحنا بنحميه. ابتسم كريم لأول مرة من قلبه. ومد إيده فتح درج المكتب. طلع منه مسد\س قديم، لونه فضي، عليه نقش صغير. كان آخر هدية من أبوه قبل وفاته. بصله ثواني... وهمس: ـ النهارده... يا إما أعرف مين قتل عيلتي... يا إما أتحاسب معاهم كلهم. وفي الخارج... رفع العم جلال إيده في الهواء. وانطلقت أول رصاصة... معلنة بداية المواجهة الحاسمة. حكايات شروق خالد مع أول رصاصة، دوّى صوت انفجار في سور الفيلا. الحجارة اتطايرت في كل اتجاه. الزجاج اتكسر، وإنذار الحريق اشتغل في كل الأدوار. لكن كريم ما اتحركش من مكانه. كان واقف قدام الشباك، وعينه على البوابة. رفع جهاز اللاسلكي وقال بهدوء: ـ المجموعة الأولى... على السطح. ـ المجموعة التانية... تحموا المدخل الشرقي. ـ محدش يطارد حد برا الفيلا. اللي يدخل... ما يخرجش. ردت الأصوات في اللاسلكي: ـ حاضر يا باشا. بدأ الهجوم. الرصاص نازل من كل ناحية. لكن رجال كريم كانوا حافظين المكان. كل متر في الفيلا كان معمول ليوم زي ده. بعد عشر دقايق من الاشتباكات... دخل أحد الحراس وهو بينهج. ـ يا باشا... صدينا أول هجوم. بس... ـ بس إيه؟ ـ العم جلال مش موجود. اتعقدت ملامح كريم. ـ يعني إيه مش موجود؟ ـ كان واقف قدام البوابة... وفجأة اختفى. في نفس اللحظة... اتفتح باب المكتب ببطء. كل الأسلحة اتوجهت ناحية الباب. لكن اللي دخل... كان راجل كبير في السن، هدومه مقطعة، ووشه مليان تراب. رفع إيده وقال بسرعة: ـ ما تضربوش... أنا جاي أنقذكم. كريم قرب منه بحذر. ـ إنت مين؟ الراجل بص في وشه وقال: ـ اسمي عبد التواب... وكنت السواق الخاص لأبوك. اتسعت عيون كريم. ـ السواق؟! ـ أيوه. افتكرتوا إني مت يوم الحادث. لكن الحقيقة... العم جلال هو اللي خباني. فضلت عايش سنين، وممنوع أتكلم. كريم قبض على ياقة هدومه. ـ اتكلم. دلوقتي. الراجل أخد نفس طويل. ـ أبوك ما ماتش في حادث. في الليلة دي... كنت أنا اللي بسوق. والفرامل كانت سليمة. لكن قبل ما نوصل الطريق الصحراوي... ركبت معانا عربية تانية. العم جلال كان فيها. وقفنا بحجة إن العربية فيها عطل. وأول ما أبوك نزل... ضربوه بالنار. كريم حس إن الدنيا بتلف حواليه. ـ وأمي؟ نزل الراجل عينه. ـ حاولت تهرب بيك. لكنهم لحقوها. ولما رفضت تمضي على أوراق التنازل... قتلوها هي كمان. ساد صمت ثقيل. قطع الصمت صوت ضحكة جاية من آخر الممر. لف كريم بسرعة. كان العم جلال واقف هناك... لوحده. من غير ولا حارس. ومن غير أي س\لاح ظاهر. وكان بيصفق بإيده ببطء. وقال بابتسامة باردة: ـ أخيرًا... سمعت الحكاية من شاهد عيان. بس للأسف... عبد التواب كداب. ثم أخرج من جيبه ظرفًا قديمًا، ورماه على الأرض أمام كريم. وقال: ـ افتحه... ولو لقيت فيه اللي أنا متوقعه... هتعرف إن الحقيقة أعقد بكتير من اللي متخيله. حكايات شروق خالد كريم فضل يبص للظرف ثواني. ما انحناش يجيبه على طول. عينه كانت على العم جلال. وقال بصوت ثابت: ـ إنت داخل بيتي لوحدك؟ ابتسم جلال. ـ لو كنت خايف منك... ماكنتش دخلت. ـ أو يمكن واثق إن في حد من رجالنا هيحميك. الابتسامة اختفت من وش جلال للحظة. لكن رجعت تاني. ـ افتح الظرف يا كريم. هتعرف إنك كنت بتكره الشخص الغلط طول السنين دي. كريم نزل، وفتح الظرف بحذر. كان فيه جواب قديم، اصفر من الزمن. وفي آخره توقيع... أبوه. بدأ يقرأ بصوت منخفض. "لو حصل لي حاجة، اعرف إن اللي بكتب الكلام ده بإرادتي... ولو ابني كريم كبر في يوم، أوعى يخلي الكراهية تعميه. العدو الحقيقي مش أقرب الناس لينا... العدو مستخبي وسط اللي محدش يشك فيهم." قلب الورقة. لقى صورة تانية. الصورة كانت لعيلته كلها. أبوه. وأمه. وهو طفل. وخلفهم... راجل واقف مبتسم. عبد التواب. السواق. رفع كريم عينه ببطء. بص لعبد التواب. الراجل بدأ يتراجع خطوة لورا. وقال بتوتر: ـ دي... دي صورة قديمة. العم جلال قال بهدوء: ـ كمّل قراءة. رجع كريم للورقة. وفي آخر سطر مكتوب: "لو عبد التواب حاول يحكي غير اللي يعرفه جلال... اعرف إنه بيكدب." سقطت الورقة من إيد كريم. عبد التواب صرخ: ـ لا... الكلام ده مزور. لكن جلال فتح جاكيته، وطلع جهاز تسجيل صغير. ضغط زر التشغيل. وفجأة... طلع صوت والد كريم. واضح جدًا. "عبد التواب... أنا وثقت فيك أكتر من إخواتي. ليه بعتنا؟" بعدها ثواني... خرج صوت عبد التواب من التسجيل، وهو بيبكي: "سامحني... هددوا ولادي... ماكنش قدامي حل." الغرفة كلها سكتت. الحراس بصوا لعبد التواب بصدمة. الراجل وقع على ركبته. وهو بيعيط قال: ـ أيوه... أنا خنت. بس أنا ما قتلتش. والله ما قتلت. أنا بس فتحت لهم الطريق. كريم كان واقف مكانه، مش قادر يستوعب. سنين وهو بيدور على الحقيقة... وكل دقيقة كانت بتكشف له كذبة جديدة. في اللحظة دي... رن هاتف العم جلال. بص للشاشة، واتغير لون وشه لأول مرة. كريم لمح الاسم المكتوب. "الرقم الخاص بالرئيس." رد جلال بسرعة، وما سمعوش غير جملة واحدة من الطرف التاني. الجملة دي خلت ملامحه تتبدل تمامًا. قفل المكالمة، وبص لكريم وقال بصوت منخفض: ـ اسمعني كويس... إحنا الاتنين بقينا في خطر. لأن الشخص اللي أمر بقتل أبوك وأمك... عرف إن الحقيقة بدأت تظهر. وهو دلوقتي... في طريقه للفيلا. حكايات شروق خالد كريم ضيق عينيه وهو بيبص للعم جلال. ـ يعني إيه... إحنا الاتنين؟ جلال أخد نفس طويل. ـ لأني من سنين افتكرت إني أقدر أسيطر عليه... لكن اكتشفت إني مجرد واحد بينفذ أوامر. عبد التواب صاح من مكانه: ـ ما تسمعش كلامه... ده بيكدب. لكن جلال بص له باحتقار وقال: ـ إنت آخر واحد يتكلم عن الكذب. قبل ما كريم يرد... صوت مروحية بدأ يقرب من الفيلا. الكل رفع راسه لفوق. الإضاءة القوية نورت الجنينة كلها. ورئيس الحراسة جري وهو بيصرخ: ـ يا باشا... مروحية جاية من ناحية البحر! بعدها بثواني... اتفتحت أبواب المروحية وهي لسه في الجو. ونزل منها أربعة رجال بالحبال. كلهم لابسين أسود، ووشوشهم مغطاة. واحد منهم أول ما لمس الأرض، رفع إيده. وفجأة... رجالة العم جلال كلهم نزلوا أسلحتهم على الأرض. كريم اتفاجئ. ـ إيه اللي بيحصل؟ العم جلال ابتسم بمرارة. ـ قلتلك... في حد أعلى مني. الرجل المقنع بدأ يمشي ناحيتهم بهدوء. ولا حد من الموجودين قدر يوجه س\لاحه ناحيته. كأن الكل عارفه. وقف قدام كريم مباشرة. وقال بصوت هادئ: ـ كبرت يا كريم. كريم عقد حواجبه. الصوت... كان مألوف. لكن مش قادر يفتكره. الرجل شال القناع ببطء. أول ما وشه ظهر... الصدمة جمدت كل اللي في المكان. حتى العم جلال رجع خطوة لورا. كريم همس: ـ مستحيل... كان الراجل هو... عادل الدمنهوري. أخو أبوه الأكبر. الراجل اللي العيلة كلها أعلنت وفاته من خمسة وعشرين سنة، واتعمله عزا، واتدفن نعش فاضي باسمه. ابتسم عادل وهو بيبص لكريم. وقال: ـ واضح إنهم قالولك إني مت. لكن الحقيقة... إني كنت عايش، وببني إمبراطورية أكبر من اللي أبوك كان يحلم بيها. كريم قال بغضب: ـ إنت اللي قتلت أبويا؟ عادل هز راسه. ـ لا. أبوك هو اللي اختار يموت. رفض يشتغل معايا. ورفض يبيعني الميناء. فكانت النهاية اللي اختارها بنفسه. صرخ كريم: ـ كداب! ابتسم عادل. ـ الحقيقة مرة يا ابن أخويا. ثم أخرج من جيبه فلاشة سوداء، ورماها تحت قدمي كريم. وقال: ـ عليها تسجيل كامل للي حصل في الليلة دي. لو عندك الشجاعة... اتفرج عليه. بس خلي بالك... بعد ما تشوفه... عمرك ما هتبص لأبوك بنفس النظرة تاني. حكايات شروق خالد كريم انحنى ببطء، والتقط الفلاشة من على الأرض. فضل يبص لها ثواني، وكأنها قطعة حديد سخنة. رفع عينه ناحية عادل. ـ لو فيها كدبة واحدة... أقسم بالله هتندم إنك جيت هنا. عادل ابتسم ابتسامة باردة. ـ أنا جاي عشان الحقيقة... حتى لو وجعتك. كريم أشار لرئيس الحراسة. ـ هات اللابتوب. بعد أقل من دقيقة، اتحط جهاز لابتوب على الترابيزة. ركب كريم الفلاشة. ظهر ملف واحد بس. تاريخه... خمسة وعشرين سنة فاتوا. ضغط تشغيل. الصورة كانت مهزوزة، كأنها متصورة بكاميرا مراقبة قديمة. ظهر أبوه في مخزن كبير قريب من الميناء. واقف قدام عادل. الصوت كان واضح. عادل قال: ـ آخر مرة هطلب منك. سلم الميناء... ونشتغل سوا. أبوه رد بحزم: ـ الميناء ده تعب أبويا... ومش هسلمه لتجارة الس\لاح. كريم اتشد انتباهه. دي أول مرة يسمع كلمة "تجارة الس\لاح". عادل ضحك. ـ الس\لاح مجرد بداية. الفلوس الحقيقية في اللي جاي. أبوه قرب منه وقال: ـ طول ما أنا عايش... مش هتستخدم اسم الدمنهوري في القرف ده. وفجأة... اتفتح باب المخزن. دخل راجل ملثم، وضرب رصاصة. لكن الكاميرا اهتزت في اللحظة دي. الصورة اختفت لثواني. ولما رجعت... كان أبو كريم واقع على الأرض. والراجل الملثم اختفى. الفيديو وقف. كريم ضرب الترابيزة بإيده. ـ فين باقي التسجيل؟ عادل رفع كتفه. ـ ده كل اللي عندي. ـ يعني إيه؟ ـ الكاميرا اتكسرت وقتها. كريم بص له بغضب. ـ يعني لسه مش عارف مين ضغط الزناد. في اللحظة دي... سعاد، اللي كانت واقفة ساكتة من أول الأحداث، قربت من الشاشة. عينيها فضلت مركزة على آخر ثانية في الفيديو. وفجأة قالت: ـ رجع اللقطة. كريم بص لها. ـ ليه؟ ـ رجعها بس. رجع الفيديو قبل لحظة إطلاق النار. سعاد أشارت ناحية رف حديد ظاهر في الخلفية. ـ كبر الصورة هنا. كبرها. الصورة بقت مشوشة. لكن بعد شوية... بان انعكاس في مراية معدنية معلقة على الحيطة. انعكاس الراجل اللي ضرب النار. وشه ماكانش واضح بالكامل... لكن كان فيه علامة مميزة. جرح طويل فوق الحاجب الشمال. عبد التواب شهق. ـ أنا أعرف العلامة دي. كل الأنظار اتجهت له. قال وهو بيترعش: ـ مستحيل يكون... كريم صرخ: ـ انطق! عبد التواب بلع ريقه وقال: ـ دي علامة... فوزي. السواق القديم بتاع عادل. عادل اتجمد مكانه. لأول مرة... ملامح الثقة اختفت من وشه. همس: ـ فوزي؟ وبص في الفراغ كأنه افتكر حاجة قديمة. ثم قال بصوت خافت: ـ لكن... فوزي مات بعدها بأسبوع. كريم قرب منه خطوة. ـ ولا يمكن... اللي خلاه يموت... كان بيخفي آخر شاهد على الجري*مة.
