ورث مراتي ج4 اماني السيد
عبير ضحكت بـ مرار وقالت: “يعني اللعبة ملعوبة صح.. صاحب العمارة والبلطجي متفقين علينا.”
عادل هز راسه بـ حزن: “آه يا أختي.. والسمسار بيقولي صابر العقرب ده مسنود، ومحدش بيعرف يخرجه من مكان حط رجله فيه إلا بـ حكم قضائي نهائي، وده ب بياخد من 3 لـ 5 سنين في المحاكم.. ده لو العمارة متهدتش بـ قرار الإزالة اللي ب بياكلوا بيه عيش في الحي!”
عبير بصت لـ عادل وقالت بـ قوة: “مش هنقعد 5 سنين يا عادل. أنا هسحب الـ 500 ألف جنيه بكره، وهنشوف صابر العقرب ده هيقعد فيها إزاي.”
عادل برّق عينيه وقال: “هتعملي إيه يا عبير؟ إياكي تفكري في السكك الشمال، إحنا طول عمرنا عايشين بـ الحلال وأبونا ربينا على الأصول!”
عبير زعقت: “والأصول بتقول إننا نسيب شقا أبونا لـ الحرامية يا عادل؟! طالما هما ب بيلعبوا بـ الصياعة، إحنا لازم نوريها لهم!”
فضلت واقف بينهم وحاسس إن البيت بيتحول لـ ساحة حرب. قولت لـ عادل: “اسمع يا عادل.. سيبك من كلام عبير دلوقتي، إحنا بكره الصبح هنروح لـ محامي كبير بيفهم في قضايا العقارات والشهر العقاري، ونشوف المحضر اللي عملناه في القسم وصل لإيه، ولازم نتحرك بـ القانون الأول، لو القانون سد، ساعتها نشوف حل تاني.. بس بلاش دم وبلاش مشاكل تودينا ورا الشمس.”
عادل وافقني وقال: “صح يا حسن، أنا هكلم محامي صاحبنا بكره الصبح ونتقابل عنده.”
عبير سكتت ومدرتش عليا، بس نظرة عينيها مكنتش مريحة أبداً، وحسيت إنها بتخطط لـ حاجة من ورا ضهري.
تاني يوم الصبح، نزلت أنا وعادل ورحنا للمحامي، وقعدنا معاه وشرحنا له كل حاجة بـ التفصيل ووريناه عقود أبو عبير ووصولات الأقساط كاملة. المحامي بص في الورق وهز راسه وقال: “الورق سليم 100%، بس المشكلة في ‘وضع اليد’. صابر العقرب والناس اللي معاه قاعدين جوه الشقة، والشرطة مش هتطردهم بـ المحضر ده، لازم نرفع قض..ية ‘طرد للغصب’ وبطلان العقد الجديد، وده ب بياخد وقت.. وحكاية قرار الإزالة دي لازم نعمل عليها ‘إشكال وقف تنفيذ’ في مجلس الدولة فوراً عشان نمنع الحي إنه يهد لحد ما القض..ية تخلص.”
عادل قال بـ قلق: “والكلام ده ب بياخد وقت قد إيه يا متر؟”
المحامي قال: “الشهور ب بتجر شهور يا عادل يا ابني، لازم تصبروا.”
خرجنا من عند المحامي وإحنا رجلينا مش شايلانا. كلمت طه خطيب شيرين عشان أفهمه الوضع وميفتكرش إننا بنتهرب منه، طه قال بـ جدعنة: “يا حسن يا اخويا، فداكم أي شيء، والشقة والفلوس تروح وتيجي، المهم أبلة عبير ترجع حق أبوها، وأنا وشيرين مستنيين، والشبكة والدبلة مش هتطلع من البيت، إحنا معاكم في المرة قبل الحلوة.”
