فاطيما يوسف

ام كريم بعصبيه
انا مش فاهمه مراتك رافضه ليه تعمل حقن مجهري
بقى لكم ثلاث سنين متجوزين وانت كل يوم تقول لي اصبري يا ماما اصبري يا ماما خلاص انا زهقت انا عايزه اشوف احفاد ليا قبل ما اموت .
كريم وهو بيحاول يهديها علشان زهق من الأسطوانه دي بتاعه كل يوم
يا أمي إحنا كشفنا إحنا الإثنين والدكتور قال إنها ماعندهاش عيب ولا أنا عندي عيب والمسألة مسألة وقت وعملنا كل التحاليل
ليه إنتي مصممة كل شوية تجرحيها بالكلام وكل شيء بأوان وقت ما ربنا يريد .
أم كريم
يعني ايه يا أستاذ هفضل مستنيه كده كتير
خلاص انت تروح تتجوز بقى وهي حرة عايزة تفضل على ذمتك تفضل عايزه تطلق تطلق إحنا مش هنقعد سنين كمان نستنى النصيب .
رد عليها كريم
يا أمي بلاش تتكلمي بالطريقه دي إنتي عندك بنت ومخطوبه و على وش جواز لو هي مكان نورا كنتي هتقولي كده برده .
ردت عليه امه بعصبية
ما تجيبش سيرة أختك على لسانك بعد الشړ عليها .
كريم لقى إن الكلام مع أمه مش هيجيب فايده فاستاذن منها وقام وسابها وهي شايطه زي كل يوم .
طلع كريم شقته لقى نورا قاعده مهمومه وحزينه سألها بحنيه
مالك يا حبيبتي شكلك متغير كده ليه
كانت نورا سرحانه وفي دنيا تانيه
نادي عليها كريم
نورا نورا معقوله ده كله مش سامعاني وأنا بكلمك!
فاقت نورا من سرحانها لما لقت كريم نادي عليها كذا مره وقالت له
بتقول حاجه يا كريم
استغرب كريم ورد عليها
معقوله يا نورا كل ده مش سامعه الندا اللي انا عماله انده ليكي ايه يا بنتي اللي واكل عقلك وشاغل بالك
ابتسمت له نورا وقامت وقفت قدامه وقالت
لا يا حبيبي اسم الله عليك انا بخير وكويسه الحمد لله كنت بفكر بس هعمل غدا ايه .
ضيق كريم عينيه وقال لها باستغراب اكتر
بعد النده ده كله بتفكري وسرحانه هتعملي غدا ايه!
مش على كريم يا نورا انا عارفك وحافظك وفاهمك كويس جدا اكثر ما انتي عارفه نفسك
مالك يا حبيبتي فيكي ايه
نورا بزيف
والله ما في حاجه يا كريم انا زي الفل والقرده قدامك اهو عايز تشغل بالك وخلاص يلا هدخل اجهز لك الغداء بقى
ومشيت نورا من قدامه وقلبها بيتقطع من اللي سمعته وبتسمعه من حماتها كل يوم يسمم بدنها
ويا ريت جت على حماتها بس حتى اخته كمان كل شويه تقول لها ايه ما فيش اخبار وتتدخل في شؤونها هي وكريم
وطبعا كريم علشان وحيد امه ما تقدرش تقول له ان احنا ناخد شقه بره ونستقل بحياتنا
المهم عدى يومين على قعدة كريم دي مع والدته
نورا كانت نازله رايحه السوبر ماركت ندهت عليها حماتها وقالت لها
إنتي رايحه فين
نورا سألتها
انا رايحه السوبر ماركت يا ماما اجيب طلبات مش عايزه حاجه اجيبها لك معايا وانا جايه
كانت والده كريم لابسه هدومها وقالت لها
انا عايزاكي تيجي معايا مشوار علشان مش قادره اروح لوحدي.
استغربت نورا جدا لأن حماتها قليل جدا لما تاخدها معاها مشوار او تطلب انها تخرج معاها في حته اصلا
هي مش بتحب تخرج معاها في حته علشان كل لما يقابلهم حد يسألها ربنا كرم مرات إبنك ولا لسة
وهي تقعد تتصعبن عليهم وتيجي تنكد عليا عيشتي
المهم قلت لها هستأذن من كريم الأول
وأذن لها كريم إنها تروح
وخلاص خرجوا و أم كريم بتكلم نورا علشان تلهيها عن الطريق ومتاخدش بالها منه
أم كريم
بقولك إيه يانورا هي أختك الصغيرة لسة مبتوافقش علي أي عريس يجي لها
نورا بتأثر وحزن
والله ياماما بيجي لها ناس كتير أوي بس مبتوافقش ودايما تقول مش مرتاحة مش دلوقتي
لحد ما ماما زهقت هي وبابا وسايبينها علي راحتها .
مصمصت حماتها شفايفها وقالت بتريقة
ليه إن شاء الله مبتوافقش هي البرنسيسة حاطة عينيها علي حد
اتضايقت نورا من تريقة حماتها علي أختها ومرضيتش ترد علشان متعملش معاها مشاكل توجع دماغها هي قبل منها
المهم إن نورا ركزت في الطريق وشايفة أنهم ماشيين تجاه شارع المقاپر
على طول سألت حماتها
ماما هو احنا جايين المقاپر هنا نعمل ايه
ردت عليها حماتها بثبات وجاوبتها
الشارع ده بيودينا المكان اللي احنا رايحينه بسهوله بدل ما نلف يمين وشمال وانت عارفاني ست كبيره ما اقدرش امشي كثير
وفضلت تلهيها كثير في الكلام لحد ما وصلت لتربه فاضيه كانت متفقه مع الحارس بتاعها ان هو يفتحها لها
وعلى فجاه راحت زقه نورا فيها!
نورا اټرعبت واتخضت وفورا خرجت من التربه ودموعها مغرقه وشها وقالت لحماتها
ايه اللي انت بتعمليه ده بترميني في التربه حرام عليك يا شيخه عملت لك ايه علشان تعملي فيا كل ده
لو بنتك هترضي تعملي فيها كده
عايزه افهم السبب اللي خلاكي عملتيه ده دلوقتي حالا
ما خفتيش إني أتلبس او اني اكون بخاف زياده عن اللزوم واموت من الخضه
ليه بتعملي فيا كده
وحطت ايدها على وشها وقعدت ټعيط بصوت عالي
اما حماتها ما رمشلهاش جفن وقالت لها وهي بتهددها بصريح العباره
حسك عينك تجيبي سيره لكريم عن اللي حصل او تقولي له عن اي حاجه انا جبتك هنا علشان بيقولوا ان الموضوع ده بياثر على الخلفه وممكن تخلفي بسببه
وراحت متكلمه وهي بتمثل الحنيه علشان خاطر نورا ما تقولش لابنها كريم عن اللي هي عملته وقالت لها
يا خايبه انا بعمل كل ده لمصلحتك علشان ربنا يكرمك وتشيلي لك حته عيل ولعل وعسي ربنا يكرمك من الخضة دي وبطنك تشيل عيل
اهم حاجه اوعاكي تجيبي سيره لجوزك علشان خاطر مش ناقصه صداع منه ۏجع دماغ .
استسلمت نورا لحماتها وردت بضعف
حاضر يا ماما ممكن بقى نروح دلوقتي
ام كريم
هو إنتي هتروحي إنتي مش كنتي رايحه السوبر ماركت
نورا وجسمها بيرتعش من اثر الخضه
لا مش هروح حتة أنا هروح على شقتي علشان حاسه اني دايخه وتعبانه .
ومشيوا من المقاپر ونورا حزينه من جواها على اللي حماتها بتعملوا فيها
روحت نورا البيت ودخلت على الحمام على طول اخدت دش علشان جسمها اللي اتبهدل من التراب اللي حماتها حدفتها فيه
وكمان الريحه بتاعه الترب وخلصت وكلمت صاحبتها في التليفون تشتكي لها همها زي ما بتشتكي كل يوم
هي الوحيده اللي بتقول لها علي كل حاجة لأنها مش بتحب تحكي حاجه لمامتها علشان ما تشيلش النفوس من بعضها
نورا لصاحبتها بعد ما ردت عليها
ازيك يا كريمان عامله ايه
كريمان
انا كويسه يا حبيبتي إنتي اللي عامله ايه صوتك مش عاجبني يا نورا .
نورا ودموعها سايله على وشها
انا مش بخير خالص يا نور وعمري ما هبقى بخير
انا تعبت من ملامه حماتي وبنتها و الجيران والناس علشان لسه ما خلفتش لحد دلوقتي
طيب انا ذنبي ايه هو انا اللي بحط النطفه ولا انا بايدي حاجه اعملها وما عملتهاش
تعبت خلاص وما بقتش قادره استحمل قولي لي
اعمل ايه
كريمان وقلبها بيوجعها على صاحبتها
ليه بس بتقولي كده يا نورا ايه اللي حصل تاني خلاكي مڼهاره بالطريقه دي
نورا بنحيب
تصوري يا كريمان كنت نازله رايحه السوبر ماركت اجيب طلبات لشقتي
حماتي قابلتني وقالت لي تعالي معايا مشوار وطاوعتها ورحت معاها
ودتني الترب ورمتني في تربه قال ايه علشان اتخض واحمل بسرعه .
كريمان وهي بټضرب
ايدها على

صدرها
يا نهار ابيض هي الوليه دي اټجننت ازاي تعمل فيكي كده
وما اتصلتيش علي جوزك وحكيتي له على اللي حصل ده ليه
الست دي خلاص ما بقاش ينفع يتسكت عليها ما تقولي لهم بقى وخلاص ان العيب من ابنها وان هو بيتعالج وان خلاص العلاج قرب يجيب نتيجه
وحتى لو العيب منك انت ليه يعملوا فيكي كده ايه الجهل ده
نوره بعصبيه وهي بتمسح دموع وشها بايديها
لا يا كريمان ما تقوليش كده ما تندمينيش ان انا كشفت لك سري انا عمري ما افكر اطلع كريم معيوب قدامهم
لانه اصلا مش معيوب كريم مريض وبيتعالج وانا هفضل جنبه لحد ما نوصل لسكه السلامه انا وهو .
كريمان وهي بتتاسف لها
معلش يا نورا حقك عليا بس انا بجد صعبتي عليا خالص بسبب اللي حماتك بتعمله فيكي هقول لك ايه اصبري واحتسبي امرك عند الله وهو اللي عنده التدابير وان شاء الله ربنا يكرمك في القريب العاجل .
نوره بتسالها وهي قلقانه
طب افرضي طلبت مني ان انا اعمل حاجه تاني اعمل ايه
كريمان وهي بتنصحها
بعد كده قبل ما تقول لك تعالي معايا او اعملي حاجه اسالي الاول عن الهوا قبل ما تعمليه
مش كفايه قبل كده الحاجات اللي هي خليتك تعمليها عشان كل ده فاكره ان العيب منك
وأنتي يا عيني بتعملي اللي هي عايزاه علشان وضع جوزك لكن دي اخر حاجه تطلبها منك وتعمليها
بعد كده تقولي لكريم وهو يتصرف معاها مش هتنك شايله قرفها لوحدك انت كده ممكن يجرا لك حاجه يا حبيبتي .
وافقت نورا على كلام كريمان لانها خلاص ما بقتش قادره تستحمل وقفلت معاها السكه وقامت تشوف هتعمل ايه في البيت
وما فيش ساعه وكريم رجع البيت نادي عليها خرجت له وقالت له
حمد لله على السلامه يا حبيبي نورت بيتك.
كريم حس ان عيونها كانت بټعيط و وشها مش طبيعي فورا راح عليها واخدها في حضنه وقال لها
مالك يا نورا بټعيطي ليه وما تحاوليش تكذبي ولا تحوري علشان باين على وشك خالص ان إنتي كنتي بټعيطي وقولي لي الصراحه
وراح جايب مصحف ومسكها المصحف بين ايديها وقال لها
احلفي لا تقولي لي الصراحه .
اتلجلجت نورا وحاولت تفلت من الحلفان بس هو صمم مش كل يوم هيجي يلاقيها بالمنظر ده ويسكت ويتغاضي ويسيبها تواجه مشكلته هو لوحده
خلاص مش هيسكت تاني
كريم بتصميم وهو ماسك المصحف
هتحلفي يعني هتحلفي على المصحف انت فيكي ايه علشان ما تحاوليش تكدبي .
نورا حست خلاص انها مش قادره تفلت منه وقالت له
هحكي لك بس من غير حلفان ومش هكذب عليه
وحكيت له على كل حاجه من اول ما خرجت لحد ما رجعت .
كريم اڼصدم اللي سمعوا وفورا نزل على والدته تحت وخبط على الباب بزهق
والدته فتحت له
في ايه يا ابني في حد يخبط ويرزع لحد بالمنظر ده !
كريم من غير مقدمات
إنتي ازاي تاخدي نورا المقاپر وتفتحي تربه وترميها فيها جالك قلبي تعملي كده في نورا يا ماما
ترضي ان انتي تعملي كده في بنتك علشان خاطر الجهل إللي مشيتي وراه .
ام كريم قلبها وقع في رجليها وما كانتش متوقعه ان نورا تقول له
كانت مفكره ان نورا هتداري عليها زي كل مره ومش هتقول له حاجه فردت عليه بلجلجه
يا ابني انا بعمل كل ده لمصلحتك نفسي اشوف لك عيل قبل ما اموت وافارق الدنيا دي غلطتي يعني ان انا بعمل من ناحيه وانت من ناحيه علشان ربنا يعجل بأوانه .
كريم وهو مبرق عينيه
تقومي ترمي مراتي في تربه هي وصلت بيكي الحاله للدرجه دي !
افرضي كانت ماټت ساعتها من الخضه ولا جرى لها حاجه ساعتها كنت هعمل ايه
ام كريم بتافف
يا اخويا هي ولا جرى لها حاجه ولا محتاجه هي رجعت زي القرده فوق اهيت وعلى طول اتصلت بيك وشحنتك عليا
مع اني قايله لها ومحلفاها ما تقولكش علشان خاطر عارفه ان انت قلبك خفيف هو مش هتستحمل .
كريم بعصبيه اكتر
معنى كده بقى ان إنتي عملتي حاجات قبل كده كتير معاها وهي يا عيني ما كانتش بتحكي لي
هي ما كانتش هتحكي اصلا لولا لما لقيتها معيطه ومفلوقه من العياط وحلفتها علي المصحف .
ام كريم بتريقه
على ايه يعني بټعيط لا هي اول ولا اخر واحده شقت الترب علشان تحمل ما تبقاش انت خيخه كده واجمد وانشف شويه .
كريم وهو بيحاول يهدي نفسه علشان مهما كانت دي والدته
لو سمحتي يا ماما ده اخر انذار ليكي ما تتدخليش ما بيني وبين مراتي تاني انا حر انا وهي في حياتنا نخلف ما نخلفش دي حياتنا واحنا حرين فيها واحنا مستنيين لما ربنا يريد
هتعترضي كمان على حكم ربنا .
ام كريم وهي بتمثل الزعل والعياط
كده يا كريم كده بتزهق علي أمك ده اللي ربنا قال لك عليه
بتزعق لي علشان خاطر نفسي اشوف لك حته عيل وامسكه بايدي تحرم علي انت ومراتك وبيتك العمر كله ومن النهارده ما ليش داخله لك بيت تاني .
زهق كريم وخرج وساب لأمه البيت كله وراح يتمشى شويه على البحر لوحده من هموم الدنيا كلها اللي اتجمعت فوق دماغه
وكلم واحد صاحبه يجي له ومفيش عشر دقايق ووصل عنده وقعد جمبه وأول ما شاف ملامح وشه سأله
مالك يا صاحبي إيه إللي مغير حالك ومعكر بالك شكلك مايطمنش
كريم وهو بيتنهد بتعب
تعبت ياصاحبي من المعافرة لا الدنيا رحماني والزمن رباني والأهل غماني .
صاحبة وهو بيخفف عنه
ومين فينا خالي ومن الهم بالي ومن العيون متداري
كل واحد عنده همه إللي مكفيه وزيادة ومفكر إن مفيش حد مهموم زيه بس للأسف ياصاحبي إللي يشوف بلاوي الناس تهون عليه بلوته هونها علي نفسك ياحبيب أخوك وخليها بسيطة هتتبسط وهتبقي ميه ميه .
كريم باستغفار
لا حول ولا قوة الا بالله العلي العظيم
طيب قولي أعمل إيه في سري إللي بحوط عليه وشكل الحيطان مش سايعاه
صاحبه جاوبه بعقل
وقت مالحيطان تضيق عليك وتطبق علي نفسك هدها يا صاحبي قبل مايجي زلزال ويهدها علي دماغك
يعني مراتك مش هتفضل مستحملة إهانات وملامات واختراعات من بتاعت الست الوالدة
قول لها وريح المسكينة إللي شايلة الملامات لوحدها ودي مش رجولة منك متزعلش مني إنك تحطها في وش المدفع وتقول لها استحملي .
يعني أنت شايف إني لما أستر المكشوف إني كدة هرتاح
قالها كريم بتوهان لصاحبه .
صاحبه وهو بيحط له النتايج
قدامه
إنت كدة كدة مش مرتاح ومش لوحدك مراتك كمان أمك معيشاها في الچحيم في حاجة ملهاش ذنب فيها
كفاية عليها ملامة الناس اللي برة وتريقتهم إللي مبتخلصش مش هيبقي جوة وبرة يا غالي
وكمل وهو بيحفزه إنه يقدم علي الخطوة دي بشجاعة وقلب جامد
وبعدين إنت خلاص قربت تخف وعلاجك إللي إنت ماشي عليه بقالك سنتين
الدكتور قال لك إنه خلاص أوشكت علي الشفا
يعني بإذن الله لما تعرف هم مش هتطول
بس أنا هقول لك على حاجة .
كريم وهو منتبه لكلام صاحبه ومركز
قول ياصاحبي أنا كلي آذان صاغية .
كمل صاحبة بذكاء وعقلانية أكبر
طالما الأمور مستقرة والأمن مستتب والنفوس هادية شوية متفصحش
عن المكتوب دلوقتى
أول ما